ປະທານກຸຍບາ Raul Castro ຕ້ອນຮັບແລະເຈລະຈາກັບທ່ານປະທານປະເທດເຈີນດ້າຍກວາງ

ວັນພະຫັດ ທີ 17 ພະຈິກ ຄ.ສ. 2016 | 16:57:32

(ທ່ານປະທານກຸຍບາ Raul Castro ຕ້ອນຮັບ
ທ່ານປະທານປະເທດເຈີນດ້າຍກວາງ)

(vovworld) - ວັນທີ 16/11, ພິທີຕ້ອນຮັບທ່ານປະທານປະເທດຫວຽດນາມ ເຈີນດ້າຍກວາງ ແລະ ພັນລະຍາ ໄປຢ້ຽມຢາມປະເທດສ.ກຸຍບາ ຢ່າງເປັນທາງການ ໃນລະຫວ່າງວັນທີ 15 – 17/11, ຖືກດຳເນີນຢູ່ຫໍປະຕິວັດ ທີ່ນະຄອນຫຼວງ ລາຮາວານ, ດ້ວຍວິທີການສົມກຽດທີ່ສະຫງວນໃນປະມຸກລັດ. ພາຍຫຼັງພິທີຕ້ອນຮັບ, ທ່ານປະທານສະພາແຫ່ງລັດ ແລະ ສະພາລັດຖະມົນຕີກຸຍບາ Raul Castro ແລະ ທ່ານປະທານປະເທດ ເຈີນດ້າຍກວາງ ໄດ້ດຳເນີນການເຈລະຈາ. ທີ່ການເຈລະຈາ, ການນຳ 2 ທ່ານໄດ້ເຫັນດີເປັນເອກະສັນໂດຍຖືວ່າ, 2 ປະເທດຍັງມີຄວາມສາມາດບົ່ມຊ້ອນ ແລະ ການຮ່ວມມືຫຼາຍຢ່າງທີ່ສາມາດຂຸດຄົ້ນໄດ້, ໂດຍສະເພາະແມ່ນໃນບັນດາຂົງເຂດເສດຖະກິດ, ການຄ້າ, ການລົງທຶນ, ວິທະຍາສາດ - ເຕັກໂນໂລຊີ, ກະສິກຳ, ສິນໃນນ້ຳ… ການນຳ 2 ທ່ານໄດ້ຕົກລົງສືບຕໍ່ຊີ້ນຳເພື່ອຍົກສູງປະສິດທິຜົນບັນດາໂຄງການຮ່ວມມືກ່ຽວກັບກະສິກຳ ແລະ ສິນໃນນ້ຳ, ຜັນຂະຫຍາຍບັນດາໂຄງການຮ່ວມມື ແລະ ລົງທຶນໃນບັນດາຂົງເຂດກໍ່ສ້າງພື້ນຖານໂຄງລ່າງທ່ອງທ່ຽວ, ຜະລິດວັດສະດຸກໍ່ສ້າງ, ເຄື່ອງໃຊ້ສອຍ. 2 ຝ່ານຢືນຢັນສືບຕໍ່ເພີ່ມທະວີການສົມທົບກັນ, ຮ່ວມມື ແລະ ສະໜັບສະໜູນເຊິ່ງກັນແລະກັນ ຢູ່ບັນດາອົງການຈັດຕັ້ງສາກົນ ແລະ ເວທີປາໄສຫຼາຍຝ່າຍ ເພື່ອແນໃສ່ປົກປ້ອງສິດຜົນປະໂຫຍດອັນຊອບທຳ, ກໍຄືຍົກສູງອິດທິພົນຊື່ສຽງ ແລະ ທີ່ຕັ້ງຂອງແຕ່ລະປະເທດ, ທັງປະກອບສ່ວນຢ່າງຕັ້ງໜ້າເຂົ້າໃນການຕໍ່ສູ້ລວມ ເພື່ອສັນຕິພາບ, ສະຖຽນລະພາບ, ການຮ່ວມມື ແລະ ພັດທະນາຢູ່ 2 ພາກພື້ນ ແລະ ໃນໂລກ.

ແລະກໍໃນວັນທີ 16/11, ທີ່ການພົບປະເຈລະຈາກັບທ່ານປະທານສະພາແຫ່ງຊາດກຸຍບາ Esteban Lazo, ທ່ານປະທານປະເທດ ເຈີນດ້າຍກວາງ ສະເໜີໃຫ້ 2 ອົງການນິຕິບັນຍັດໝາຍຂອງ 2 ປະເທດ ສືບຕໍ່ສະໜັບສະໜູນ ແລະ ຕິດຕາມກວດກາການປະຕິບັດບັນດາຂໍ້ຕົກລົງ, ຄຳໝັ້ນສັນຍາລະຫວ່າງລັດ, ລັດຖະບານ 2 ປະເທດ ເພື່ອແນໃສ່ຍົກສູງປະສິດທິຜົນຂອງບັນດາກົນໄກ ແລະ ການເຄື່ອນໄຫວຮ່ວມມື 2 ຝ່າຍ, ໂດຍສະເພາະແມ່ນດ້ານເສດຖະກິດ, ການຄ້າ, ການລົງທຶນ ກໍຄືສືບຕໍ່ປັບປຸງການພົວພັນຮ່ວມມືໃນບັນດາຂົງເຂດປ້ອງກັນຊາດ, ປ້ອງກັນຄວາມສະຫງົບ ແລະ ການພົວພັນຕ່າງປະເທດ.

ກ່າວຄຳເຫັນທີ່ການຕ້ອນຮັບທ່ານຮອງປະທານສະພາລັດຖະມົນຕີ, ທັງເປັນລັດຖະມົນຕີກະຊວງເສດຖະກິດ ແລະ ແຜນການກຸຍບາ Ricardo Cabrisas ໃນວັນດຽວກັນ, ທ່ານປະທານປະເທດ ເຈີນດ້າຍກວາງ ສະເໜີໃຫ້ລັດຖະບານ 2 ປະເທດສືບຕໍ່ເອົາໃຈໃສ່ຊີ້ນຳ ເພື່ອແນໃສ່ຍົກສູງປະສິທິຜົນບັນດາກົນໄກ ແລະ ການເຄື່ອນໄຫວຮ່ວມມື 2 ຝ່າຍ.

ໃນວັນດຽວກັນ, ທ່ານປະທານປະເທດ ເຈີນດ້າຍກວາງ ແລະ ພັນລະຍາ ໄດ້ໄປຢ້ຽມຢາມໂຮງຮຽນປະຖົມ ຫງວຽນວັນໂຈ້ຍ ຢູ່ນະຄອນຫຼວງ ລາຮາວານ. ຕອນຄ່ຳວັນທີ 16/11, ສະພາແຫ່ງລັດກຸຍບາ ໄດ້ມອບຫຼຽນໄຊ Jose Marti, ເຊິ່ງເປັນຂອງຂວັນອັນສູງສົ່ງທີ່ສຸດຂອງລັດກຸຍບາ ທີ່ສະຫງວນໃຫ້ທ່ານປະທານປະເທດ ເຈີນດ້າຍກວາງ.