(vovworld) - ໃນຂອບເຂດການຢ້ຽມຢາມ ອາເມລິກາ ຢ່າງເປັນທາງການ, ຕອນບ່າຍວັນທີ 25/7, ທ່ານປະທານປະເທດ ເຈືອງເຕີນຊາງ ມີບົດກ່າວປາໄສຢູ່ສູນຄົ້ນຄ້ວາຍຸດທະສາດ ແລະ ສາກົນ (CSIS), ກ່ຽວກັບການພົວພັນ ຫວຽດນາມ - ອາເມລິກາ ໃນສະພາບແວດລ້ອມອາຊີ - ປາຊີຟີກ. ທ່ານປະທານປະເທດ ຊີ້ແຈ້ງວ່າ: ການພົວພັນຫວຽດນາມ - ອາເມລິກາ ໄດ້ຮັບການເປີດກ້ວາງ ແລະ ຍົກລະດັບໃນຫຼາຍຂົງເຂດ. ສຳລັບ ຫວຽດນາມ ແລ້ວ, ເລື່ອງເພີ່ມທະວີການພົວພັນກັບ ອາເມລິກາ ແມ່ນນອນໃນແນວທາງການຕ່າງປະເທດເອກະລາດ, ເປັນເຈົາຕົນເອງ, ຫຼາຍຮູບຫຼາຍແບບ, ເປັນເຈົ້າການ ແລະ ຕັ້ງໜ້າເຊື່ອມໂຍງເຂົ້າກັບສາກົນ, ນຳບັນດາສາຍພົວພັນກັບບັນດາຄູ່ຮ່ວມມືສຳຄັນກ້າວເຂົ້າສູ່ລວງເລິກ ແລະ ເປັນປົກກະຕິ. ຫວຽດນາມ ແລະ ອາເມລິກາ ເຫັນດີເປັນເອກະສັນສ້າງຂອບເຂດການພົວພັນຄູ່ຮ່ວມມືຮອບດ້ານ. ຕາມນັ້ນແລ້ວ, ການຮ່ວມມືລະຫວ່າງ 2 ປະເທດຈະລວມມີທຸກໆຂົງເຂດຄື: ການເມືອງ - ການຕ່າງປະເທດ, ເສດຖະກິດ, ການຄ້າ, ການລົງທຶນ...
ມີເນື້ອໃນສຳຄັນໜຶ່ງອີກນັ້ນແມ່ນ: ຫວຽດນາມ ແລະ ອາມລິກາ ໄດ້ຢັ້ງຢືນຄວາມຕັດສິນໃຈ ແລະ ໃຫ້ຄຳໝັ້ນສັນຍາພ້ອມກັບບັນດາປະເທດສະມາຊິກສຳເລັດການເຈລະຈາສັນຍາຄູ່ຮ່ວມມືຂ້າມ ປາຊີຟີກ (TPP) ຕາມເສັນທາງທີ່ໄດ້ວາງອອກ, ມຸ່ງໄປເຖິງສັນຍາມີຄວາມດຸ່ນດຽງເພື່ອການພັດທະນາ.
ໄປຄຽງຄູ່ກັບຂອບເຂດ TPP, ຫວຽດນາມ ຈະຍູ້ແຮງການຮ່ວມມືກັບ ອາເມລິກາ ໃນຫຼາຍຂົງເຂດດື່ນໆ, ໃນນັ້ນມີບັນດາກົນໄກຂອງ ອາຊຽນ, ຮ່ວມມືໃນຂອບເຂດອະນຸພາກພື້ນແມ່ນ້ຳຂອງ, ກອງປະຊຸມຂັ້ນສູງ ອາຊີຕາເວັນອອກ ແລະ APEC. ຕາມທ່ານປະທານປະເທດ ເຈືອງເຕີນຊາງ ແລ້ວ, ພ້ອມກັບບາດກ້າວຂະຫຍາຍຕົວຂອງການພົວພັນ, ວິທີການພົວພັນລະຫວ່າງ 2 ຝ່າຍພວມປ່ຽນແບງເທື່ອລະກ້າວ. ທ່ານປະທານປະເທດ ເຈືອງເຕີນຊາງ ເນັ້ນໜັກວ່າ:
“ສານເທີ່ພວກຂ້າພະເຈົ້າຢາກເນັ້ນໜັກແມ່ນ: ຫວຽດນາມ ຫວັງວ່າ: 2 ປະເທດຈະເພີ່ມທະວີການຮ່ວມມືຮອບດ້ານເພື່ອຜົນປະໂຫຍດຂອງປະຊາຊົນ 2 ປະເທດ, ຮ່ວມແຮງຮ່ວມໃຈປະກອບສ່ວນ ແລະ ເພີ່ມພຸນຄຸນສ້າງໃຫ້ແກ່ ອາຊີ - ປາຊີຟີກ ແຫ່ງສັນຕິພາບ, ສະຖຽນລະພາບ, ຂະຫຍັນຂັນເຄື່ອນ ແລະ ວັດທະນາຖາວອນ. ແລະ ພວກເຮົາຄວນມານະພະຍາຍາມຈົນສຸດຄວາມສາມາດຂອງຕົນເພື່ອຮ່ວມມືນຳກັນບົນຈິດໃຈເຄົາລົບນັບຖື, ສະເໝີພາບ ແລະ ຕ່າງຝ່າຍຕ່າງມີຜົນປະໂຫຍດເພື່ອຈຸດໝາຍລວມນັ້ນ.”
ການຢ້ຽມຢາມອາເມລິກາຢ່າງເປັນທາງການຂອງທ່ານປະທານປະເທດຫວຽດນາມ ເຈືອງເຕີ້ນຊາງ ແລະ ພິເສດແມ່ນເລື່ອງ 2 ປະເທດປະກາດ ຍົກລະດັບການພົວພັນເປັນຄູ່ຮ່ວມມື ຮອບດ້ານໄດ້ດຶງດູດ ຄວາມ ສົນໃຈ ຈາກວົງການນັກສັງເກດການ. ທ່ານ Enrnest Bower ທີ່ປຶກສາລະດັບສູງ, ນັກ ຊ່ຽວຊານຄົ້ນຄ້ວາກ່ຽວກັບອາຊີຕາເວັນອອກສ່ຽງໃຕ້ຂອງສູນ CSIS ໃຫ້ຂໍ້ສັງເກດວ່າ : ນີ້ແມ່ນມື້ເລີກງາມຍາມດີຂອງສາຍພົວພັນລະຫວ່າງ 2 ປະເທດ. ທ່ານ Enrnest Bower ຊີ້ແຈ້ງວ່າ ການຢ້ຽມຢາມອາເມລິກາຢ່າງເປັນທາງການຂອງທ່ານປະທານປະເທດຫວຽດນາມ ເຈືອງເຕີ້ນຊາງ ແລະ ບັນດາຄຳກ່າວປາໄສ ຂອງປະມຸກລັດ ຂອງ 2 ປະເທດ ໄດ້ສະແດງໃຫ້ເຫັນວ່າ ຫວຽດນາມ ແລະ ອາເມລິກາ ໄດ້ມີຄວາມ ເຊື່ອໝັ້ນ ຕໍ່ກັນ ເພືອ່ສ້າງ ການຮ່ວມມື, ນຳການພົວພັນ 2 ຝ່າຍໃຫ້ຂຶ້ນສູ່ລະດັບສູງໃໝ່. ຕາມທ່ານ Bower ແລ້ວ, ການພົວພັນ ຫວຽດນາມ ແລະ ອາເມລິກາ ໃນອະນາຄົດ ອາດຈະບັນລຸບັນດາ ຄວາມກ້າວໜ້າ ໃນຫຼາຍດ້ານ ຈາກເສດຖະກິດເຖິງການປ້ອງກັນຄວາມສະຫງົບ, ແມ່ນບາດກ້າວເດີນ ເພື່ອນຳ 2 ປະເທດກາຍເປັນຄູ່ຮ່ວມມືຍຸດທະສາດຮອບດ້ານ ໃນອະນາຄົດ. ແລະກໍເນື່ອງໃນໂອກາດນີ້, ອະດີດເອກອັກຄະລັດຖະທູດ ອາເມລິກາປະຈຳຫວຽດນາມ, ທ່ານ Michael Michalak ໃຫ້ຂໍ້ສັງເກດວ່າ ການພົວພັນລະຫວ່າງ 2 ປະເທດໃນຊຸມປີທີ່ຜ່ານມາໄດ້ພັດທະນາຢ່າງດີງາມ ແລະ ໃນໄລຍະທີ່ຈະເຖິງ ຍັງຈະດີງາມກ່ວາອີກ.