ປະທານປະເທດ ເຈືອງເຕີນຊາງ ສິ້ນສຸດການຢ້ຽມຢາມ ຮູງການຣີ ແລະ ເລີ່ມຕົ້ນການຢ້ຽມຢາມ ແດນມາກ
ທ່ານປະທານປະເທດ ຫວຽດນາມ ເຈືອງເຕີນຊາງ ແລະ ທ່ານປະທານາທິບໍດີ ຮູງກາຣີ Ader Janos
(ພາບ: TTXVN)
(vovworld) – ວັນທີ 18/9, ທ່ານປະທານປະເທດ ຫວຽດນາມ ເຈືອງເຕີນຊາງ ໄດ້ເດີນທາງອອກຈາກນະຄອນຫຼວງ Budapest, ສິ້ນສຸດການຢ້ຽມຢາມ ຮູງກາຣີ ແລະ ເລີ່ມຕົ້ນການຢ້ຽມຢາມທາງລັດຖະກິດ ແດນມາດ ແຕ່ວັນທີ 18 – 20/9, ຕາມຄຳເຊື້ອເຊີນຂອງພະລາຊິນີ ແດນມາກ Margrethe II. ພາຍຫຼັງພາກຂ່າວ, ບັນນາທິການວິທະຍຸກະຈາຍສຽງ ຫວຽດນາມ ຂໍ້ແນະນຳບົດຂຽນທີ່ມີຫົວຂໍ້ວ່າ: “ຫວຽດນາມ - ແດນມາດ ມຸ່ງໄປເຖິງການພົວພັນຮ່ວມມືຢ່າງໝັ້ນຄົງ”.
ກ່ອນໜ້ານັ້ນ, ພາຍຫຼັງການເຈລະຈາລະຫວ່າງທ່ານປະທານປະເທດ ເຈືອງເຕີນຊາງ ແລະ ທ່ານນາຍົກລັດຖະມົນຕີ ຮູງກາຣີ Viktor Orban ເມື່ອຕອນບ່າຍວັນທີ 17/9, ການນຳ 2 ທ່ານໄດ້ຈັດການປະຊຸມຮ່ວມ ແລະ ຕອບບາງຄຳຖາມຂອງສື່ມວນຊົນກ່ຽວກັບແງ່ຫວັງການພົວພັນລະຫວ່າງ 2 ປະເທດ. ການນຳ 2 ປະທານຖືວ່າ: ການຢ້ຽມຢາມທາງລັດຖະກິດ ຮູງກາຣີ ຂອງທ່ານປະທານປະເທດ ເຈືອງເຕີນຊາງ ຈະເປັນຂີດໝາຍໃໝ່ໃນປະຫວັດສາດແຫ່ງການຮ່ວມມືລະຫວ່າງ 2 ປະເທດ. ທ່ານນາຍົກລັດຖະມົນຕີ Viktor Orban ຢືນຢັນ ຫວຽດນາມ ຍາມໃດກໍ່ແມ່ນໜຶ່ງໃນບັນດາຄູ່ຮ່ວມມືສຳຄັນທີ່ສຸດຂອງ ຮູງກາຣີ ໃນຈຳນວນປະເທດສະມາຊິກ ອາຊຽນ, ຕີລາຄາບົດບາດນັບມື້ນັບເພີ່ມຂຶ້ນຂອງ ຫວຽດນາມ ຢູ່ພາກພື້ນ ແລະ ຢູ່ໃນໂລກ ດ້ວຍການເຕີບໂຕທາງເສດຖະກິດກະໂດດຂັ້ນ ແລະນະໂຍບາຍການຕ່າງປະເທດຕັ້ງໜ້າ, ເປັນເຈົ້າການ. ສ່ວນທ່ານປະທານປະເທດ ເຈືອງເຕີນຊາງ ກໍ່ຕີລາຄາສູງຄວາມເອົາໃຈໃສ່ຂອງ ຮູງກາຣີ ທີ່ມີຕໍ່ພາກພື້ນ ອາຊີຕາເວັນອອກສຽງໃຕ້ ແລະ ອາຊີ - ປາຊີຟິກ ກໍ່ຄືເລື່ອງ ຮູງກາຣີ ສະຫງວນບຸລິມະສິດໃຫ້ແກ່ ຫວຽດນາມ, ພ້ອມທັງຢືນຢັນ ຫວຽດນາມ ກຽມພ້ອມຮ່ວມມືກັບ ຮູງກາຣີ.
ກໍ່ໃນຕອນບ່າຍວັນທີ 17/9, ທ່ານປະທານປະເທດ ເຈືອງເຕີນຊາງ ໄດ້ເຂົ້າຮ່ວມ ແລະ ມີບົດກ່າວປາໄສທີ່ເວທີປາໄສວິສາຫະກິດ ຫວຽດນາມ - ຮູງກາຣີ. ທ່ານປະທານປະເທດ ຢືນຢັນວ່າໃນແຜນນະໂຍບາຍພັດທະນາ ແລະ ເຊື່ອມໂຍງຂອງຕົນ, ຫວຽດນາມ ຖືເປັນສຳຄັນການຮ່ວມມືກັບບັນດາປະເທດເພື່ອນມິດທີ່ເປັນມູນເຊື້ອ, ໃນນັ້ນມີ ຮູງກາຣີ, ເນັ້ນໜັກວ່າການຮ່ວມມືຢ່າງແໜ້ນແຟ້ນລະຫວ່າງ ຫວຽດນາມ - ຮູງກາຣີ ບໍ່ພຽງແຕ່ຊ່ວຍໃຫ້ 2 ປະເທດເຊື່ອມຕໍ່ນຳກັນເທົ່ານັ້ນ ຫາກຍັງສ້າງຕັ້ງບັນດາເຄືອຂ່າຍຮ່ວມມື ອີກດ້ວຍ, ຜ່ານນັ້ນໜູນຊ່ວຍວິສາຫະກິດ ຮູງກາຣີ ເຊື່ອມຊຶມເຂົ້າຕະຫຼາດ ອາຊຽນ ແລະ ອາຊີ ກໍ່ຄືບັນດາວິສາຫະກິດ ຫວຽດນາມ ເຊື່ອມຊຶມຢ່າງເລິກເຊິ່ງເຂົ້າຕະຫຼາດສະຫະພາບ ເອີລົບ. ທ່ານປະທານປະເທດ ເຈືອງເຕີນຊາງ ຊີ້ແຈ້ງວ່າ:
“ພວກຂ້າພະເຈົ້າໃຫ້ຄຳໝັ້ນສັນຍາວ່າ: ຍາມໃດ ຫວຽດນາມ ຂຳ່ນັບຮັບຕ້ອນບັນດານັກລົງທຶນ ຮູງກາຣີ ມາດຳເນີນທຸລະກິດຢູ່ ຫວຽດນາມ. ພວກຂ້າພະເຈົ້າກໍ່ໃຫ້ຄຳໝັ້ນສັນຍາວ່າຈະສ້າງສະພາບແວດລ້ອມທີ່ງ່າຍດາຍ, ສະດວກເພື່ອໃຫ້ພວກເພື່ອນດຳເນີນທຸລະກິດຢ່າງມີປະສິດທິຜົນ. ໃນວິວັດການນັ້ນ, ຖ້າຫາກມີສິ່ງທີ່ຍັງຄົງຄ້າງ, ພວກຂ້າພະເຈົ້າພ້ອມແລ້ວທີ່ຈະຮັບຟັງ ແລະປັບປຸງນະໂຍບາຍໃຫ້ເໝາະສົມເພື່ອສ້າງເງື່ອນໄຂສະດວກທີ່ສຸດເພື່ອໃຫ້ພວກເພື່ອນເຄື່ອນໄຫວນັບມື້ນັບມີປະສິດທິຜົນຢູ່ ຫວຽດນາມ.”
ໃນບົດກ່າວປາໄສຊົມເຊີຍເວທີປາໄສ ວິສາຫະກິດ 2 ປະເທດ, ທ່ານຮອງນາຍົກລັດຖະມົນຕີ ຮູງກາຣີ Navracsics Torbo ໃຫ້ຮູ້ວ່າ ຮູງກາຣີ ຖືການພັດທະນາການພົວພັນທາງດ້ານເສດຖະກິດ ການຄ້າກັບບັນດາປະເທດເພື່ອນມິດທີ່ເປັນມູນເຊື້ອເປັນສຳຄັນ ໃນນັ້ນມີ ຫວຽດນາມ, ເຊິ່ງແມ່ນປະເທດພວມມີການພັດທະນາຢ່າງວ່ອງໄວ ແລະ ມີບົດບາດສຳຄັນໃນພາກພື້ນ ອາຊຽນ. ໃນເວທີປາໄສ, 2 ຝ່າຍໄດ້ລົງນາມໃນເອກະສານຮ່ວມມືທາງດ້ານການຄ້າ, ການສຶກສາ ແລະ ຮັກສາສິ່ງແວດລ້ອມ 3 ສະບັບ.