ປະທານປະເທດ ເຈືອງເຕີນຊາງ ເຮັດວຽກກັບກະຊວງຕຳຫຼວດກ່ຽວກັບການປະຕິຮູບດ້ານຕຸລາການ
(ພາບ:nguyentandung.org)
(vovworld) - ວັນທີ 2/7, ຢູ່ຮ່າໂນ້ຍ, ທ່ານປະທານປະເທດ ຫວຽດນາມ ເຈືອງເຕີນຊາງ, ຫົວໜ້າຄະນະຊີ້ນຳການປະຕິຮູບດ້ານຕຸລາການສູນກາງມີການເຮັດວຽກກັບຄະນະພັກຕຳຫຼວດສູນກາງ, ຜັນຂະຫຍາຍປະຕິບັດມະຕິເລກທີ 49 ຂອງກົມການເມືອງ ກ່ຽວກັບຍຸດທະສາດປະຕິຮູບດ້ານຕຸລາການຮອດປີ 2020. ທ່ານປະທານປະເທດ ເຈືອງເຕີນຊາງ ຍ້ອງຍໍຊົມເຊີຍຄະນະພັກຕຳຫຼວດສູນກາງ, ການນຳກະຊວງຕຳຫຼວດ ແລະ ກຳລັງຕຳຫຼວດປະຊາຊົນ ມີຄວາມພະຍາຍາມ ແລະ ບັນລຸໄດ້ໝາກຜົນສຳຄັນຫຼາຍຢ່າງ ໃນວຽກງານປະຕິຮູບດ້ານຕະລາການໃນໄລຍະຜ່ານມາ. ພ້ອມທັງຮຽກຮ້ອງໃຫ້ຄະນະພັກຕຳຫຼວດສູນກາງ ແລະ ການນຳກະຊວງຕຳຫຼວດຄວນສືບຕໍ່ຮີບເຮັ່ງ, ຈັດຕັ້ງການຄົ້ນຄ້ວາ, ວາງອອກບັນດາມາດຕະການລະອຽດເພື່ອຍູ້ແຮງການປະຕິບັດແຜນນະໂຍບາຍປະຕິຮູບດ້ານຕຸລາການໃນກຳລັງຕຳຫຼວດປະຊາຊົນໃນໄລຍະຈະມາເຖິງ. ທ່ານປະທານປະເທດ ເຈືອງເຕີນຊາງ ຮຽກຮ້ອງໃຫ້ຄະນະພັກຕຳຫຼວດສູນກາງຈັດຕັ້ງປະຕິບັດມະຕິກ່ຽວກັບຍຸດທະສາດປະຕິຮູບດ້ານຕຸລາການ, ຮັບປະກັນຖືກຕາມຄວາມຄືບໜ້າ, ຄຸນນະພາບ, ຕອບສະໜອງຈຸດໝາຍ, ຄວາມຮຽກຮ້ອງເຊິ່ງຄະນະຊີ້ນຳປະຕິຮູບດ້ານຕຸລາການສູນກາງໄດ້ວາງອອກ. ຜ່ານການສະຫລຸບ, ຄະນະພັກຕຳຫຼວດສູນກາງ ຄວນເຮັດໃຫ້ຈະແຈ້ງກ່ຽວກັບບັນດາໝາກຜົນ, ຂໍ້ຈຳກັດ, ສິ່ງກີດຂວາງ, ຄວາມຫຍຸ້ງຍາກ... ໃນວິວັດການຜັນຂະຫຍາຍປະຕິບັດມະຕິ, ພ້ອມທັງເປັນເສນາທິການ, ສະເໜີຕໍ່ກົມການເມືອງ ແລະ ຄະນະຊີ້ນຳປັບປຸງບັນດາບັນຫາທີ່ຍັງບໍ່ທັນເໝາະສົມ, ເພີ່ມເຕີມບັນດາໜ້າທີ່, ມາດຕະການເພື່ອຍູ້ແຮງເລື່ອງປະຕິບັດຍຸດທະສາດປະຕິຮູບດ້ານຕຸລາການຮອດປີ 2020 ແລະ ຊຸມປີຕໍ່ໄປ.