ປະທານາທິບໍດີ ອາເມລິກາ ປະກາດກອງທຶນ 1 ຕື້ USD ໜູນຊ່ວຍບັນດາປະເທດພວມພັດທະນາຮັບມືກັບການປ່ຽນແປງຂອງດິນຟ້າອາກາດ
(VOVWORLD) - ໃນໄລຍະດຳລົງຕຳແໜ່ງປະທານາທິບໍດີ, ທ່ານ Joe Biden ໄດ້ໃຫ້ຄຳໝັ້ນສັນຍາຈະນຳການປ່ຽນແປງດິນຟ້າອາກາດກາຍເປັນບຸລິມະສິດແຖວໜ້າໃນບັນດານະໂຍບາຍ.
 ທ່ານປະທານາທິບໍດີ ອາເມລິກາ Joe Biden (ພາບ: Reuters) |
ວັນທີ 20 ເມສາ, ທ່ານປະທານາທິບໍດີ ອາເມລິກາ Joe Biden ໄດ້ປະກາດແຜນການເພີ່ມກອງທຶນໜູນຊ່ວຍບັນດາປະເທດພວມພັດທະນາໃນການຮັບມືກັບການປ່ຽນແປງຂອງດິນຟ້າອາກາດ ແລະ ໄພທຳລາຍປ່າ Amazon ຢູ່ ບຣາຊິນ. ກ່າວຄຳເຫັນທີ່ກອງປະຊຸມແບບທາງໄກທີ່ມີຊື່ວ່າ ເວທີປາໄສພະລັງງານ ແລະ ດິນຟ້າອາກາດຂອງບັນດາພື້ນຖານເສດຖະກິດໃຫຍ່”, ທ່ານ Joe Biden ໄດ້ປະກາດຈະປະກອບເງິນຈຳນວນ 1 ຕື້ USD ເຂົ້າກອງດິນຟ້າອາກາດສີຂຽວ, ເຊິ່ງແມ່ນການເງິນອຸປະຖຳໃຫ້ແກ່ບັນດາໂຄງການກ່ຽວກັບພະລັງງານສະອາດ ແລະ ການຮັບມືກັບການປ່ຽນແປງຂອງດິນຟ້າອາກາດ ຢູ່ບັນດາປະເທດພວມພັດທະນາ. ທ່ານກໍ່ປະກາດແຜນການຮຽກຮ້ອງບ້ວງເງິນຈຳນວນ 500 ລ້ານ USD ໃນໄລຍະ 5 ປີຈະມາເຖິງໃຫ້ແກ່ກອງທຶນ Amazon ເພື່ອແນໃສ່ຮັບມືກັບໄພທຳລາຍປ່າ Amazon ຢູ່ ບຣາຊິນ ແລະ ບັນດາການເຄື່ອນໄຫວທີ່ກ່ຽວຂ້ອງ. ໃນໄລຍະດຳລົງຕຳແໜ່ງປະທານາທິບໍດີ, ທ່ານ Joe Biden ໄດ້ໃຫ້ຄຳໝັ້ນສັນຍາຈະນຳການປ່ຽນແປງດິນຟ້າອາກາດກາຍເປັນບຸລິມະສິດແຖວໜ້າໃນບັນດານະໂຍບາຍ, ໃນນັ້ນ ວາງເປົ້າໝາຍຮອດປີ 2030, ຈະຫຼຸດການປ່ອຍອາຍພິດຂອງ ອາເມລິກາ ລົງແຕ່ 50 ຫາ 52%