(vovworld) – ຕອນຄຳ່ວັນທີ 12/11, ທ່ານປະທານາທິບໍດີ ລັດເຊຍ Vladimir Putin ໄດເດີນທາງອອກຈາກ ຮ່າໂນ້ຍ, ສິ້ນສຸດການຢ້ຽມຢາມທາງລັດຖະກິດຫວຽດນາມ ຕາມຄຳເຊື້ອເຊີນຂອງທ່ານປະທານປະເທດ ເຈືອງເຕີນຊາງ.
ກ່ອນທີ່ເດີນທາງອອກຈາກ ຫວຽດນາມ, ທ່ານປະທານາທິບໍດີ Vladimir Putin ໄດ້ເຂົ້າຮ່ວມພິທີໄຂ “ຊຸມວັນວັດທະນະທຳ ລັດເຊຍ ຢູ່ຫວຽດນາມ ປີ 2013” ຖືກດຳເນີນໃນຕອນຄຳ່ວັນທີ 12/11 ຢູ່ໂຮງລະຄອນໃຫຍ່ ຮ່າໂນ້ຍ. ກ່າວຄຳເຫັນໄຂພິທີ, ທ່ານປະທານປະເທດ ເຈືອງເຕີນຊາງ ເນັ້ນໜັກວ່າ:
“ຊຸມວັນວັດທະນະທຳ ລັດເຊຍ ຢູ່ ຫວຽດນາມ ໄດ້ຮັບການຈັດຕັ້ງກົງກັບໂອກາດທ່ານປະທານາທິບໍດີ ສະຫະພັນ ລັດເຊຍ Vladimir Putin ຢ້ຽມຢາມ ຫວຽດນາມ, ແມ່ນເຫດການມີຄວາມໝາຍສຳຄັນ, ປະກອບສ່ວນຢ່າງແທດຈິງເຂົ້າໃນການເພີ່ມທະວີການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງ 2 ປະເທດ ຫວຽດນາມ - ລັດເຊຍ ແລະ ຄວາມສາມັກຄີ, ມິດຕະພາບອັນຍາວນານລະຫວ່າງ 2 ຊາດ.”
ສ່ວນທ່ານປະທານາທິບໍດີ Vladimir Putin ເຊື່ອໝັ້ນວ່າ: ບັນດາການເຄື່ອນໄຫວໄດ້ຮັບການຈັດຕັ້ງໃນຊຸມວັນວັດທະນະທຳນີ້ຈະປະກອບສ່ວນປັບປຸງສາຍພົວພັນ 2 ຝ່າຍ ຄູ່ຮ່ວມມືຍຸດທະສາດລະຫວ່າງ 2 ປະເທດ ສະຫະພັນ ລັດເຊຍ - ຫວຽດນາມ. ລັດເຊຍ ເຊື່ອໝັ້ນວ່າ: ຊຸມວັນວັດທະນະທຳ ຫວຽດນາມ ຢູ່ ລັດເຊຍ ໃນປີ 2014 ຈະບັນລຸຜົນສຳເລັດ.
ກ່ອນໜ້ານັ້ນ, 2 ປະເທດໄດ້ອອກຖະແຫຼງການຮ່ວມ. ໃນນັ້ນ 2 ຝ່າຍໄດ້ຢືນຢັນເຖິງ ລັກສະນະຖືກຕ້ອງຂອງການຍົກລະດັບການພົວພັນຄູ່ຮ່ວມມືຍຸດທະສາດ ຫວຽດນາມ - ສະຫະພັນ ລັດເຊຍ ຂຶ້ນເຖິງລະດັບຮອບດ້ານ, ເປີດບັນດາກາລະໂອກາດໃໝ່ກ່ຽວກັບຄຸນນະພາບເພື່ອແນໃສ່ຊຸກຍູ້ການຮ່ວມມືຕ່າງຝ່າຍຕ່າງມີຜົນປະໂຫຍດໃນຫຼາຍຂົງເຂດ. 2 ຝ່າຍຢັ້ງຢືນຈະສືບຕໍ່ເພີ່ມທະວີການຮ່ວມມືໃນຂົງເຂດສຳຫຼວດຂຸດຄົ້ນນ້ຳມັນອາຍແກດໃນເຂດໄຫຼ່ທະວີບ ຫວຽດນາມ ເໝາະສົມກັບກົດໝາຍສາກົນ. 2 ຝ່າຍຕີລາຄາສູງຂໍ້ຕົກລົງສ້າງຕັ້ງກົນໄກສົນທະນາຍຸດທະສາດຂັ້ນຮອງລັດຖະມົນຕີປ້ອງກັນປະເທດ 2 ປະເທດ. ຕີລາຄາສູງເລື່ອງໃຫ້ສັດຕະຍາບັນສັນຍາລະຫວ່າງລັດຖະບານ ຫວຽດນາມ ແລະ ລັດຖະບານ ສະຫະພັນ ລັດເຊຍ ກ່ຽວກັບເລື່ອງພົນລະເມືອງ 2 ປະເທດເຮັດວຽກໃນຜືນແຜ່ນດິນຂອງກັນ, ສ້າງເງື່ອນໄຂເພີ່ມທະວີການຮ່ວມມືແຮງງານລະຫວ່າງ 2 ປະເທດ.
2 ຝ່າຍຢັ້ງຢືນຢາກປັບປຸງລັດທິຫຼາຍຝ່າຍທາງດ້ານການເມືອງໂລກ, ປະຕິບັດບັນດາຫຼັກການຂອງກົດບັດ ສປຊ ຢ່າງເຂັ້ມງວດ. 2 ຝ່າຍສະໜັບສະໜູນເພີ່ມທະວີຄວາມມານະພະຍາຍາມສາກົນເພື່ອແນໃສ່ຮັບມືກັບບັນດາການທ້າທາຍທົ່ວໂລກຄືການປ່ຽນແປງຂອງດິນຟ້າອາກາດ, ສະພາວະສຸກເສີນ, ໄພພິບັດທຳມະຊາດ, ຄຸ້ມຄອງແຫຼ່ງນ້ຳແບບຍືນຍົງ. ບົນຈິດໃຈນັ້ນ, 2 ຝ່າຍຈະຮ່ວມມືຢ່າງແໜ້ນແຟ້ນໃນບັນດາຂົງເຂດນີ້ ທັງ 2 ຝ່າຍກໍ່ຄືບັນດາເວທີປາໄສ, ອົງການຈັດຕັ້ງສາກົນ, ພາກພື້ນເຊິ່ງທັງ 2 ຝ່າຍເປັນສະມາຊິກ.
2 ຝ່າຍໄດ້ເຊັນເອກະສານຮ່ວມມື 17 ສະບັບໃນບັນດາຂົງເຂດເສດຖະກິດ, ການຄ້າ, ການເງິນ, ການປ້ອງກັນຊາດ, ປ້ອງກັນຄວາມສະຫງົບ, ນຳ້ມັນອາຍແກດ, ສາທາລະນະສຸກ ແລະ ການສຶກສາ.