ພິທີລົງນາມໂຄງການສົມທົບກັນໂຄສະນາ
ກ່ຽວກັບໜ້າທີ່ການທະຫານ, ປ້ອງກັນຊາດ
(vovworld) - ຕອນເຊົ້າວັນທີ 18/08, ກົມໃຫຍ່ການເມືອງ - ກອງທັບປະຊາຊົນ ຫວຽດນາມ ແລະ ວິທະຍຸກະຈາຍສຽງ ຫວຽດນາມ, ໂທລະພາບ ຫວຽດນາມ ໄດ້ລົງນາມໂຄງການສົມທົບກັນໂຄສະນາກ່ຽວກັບໜ້າທີ່ການທະຫານ, ການປ້ອງກັນຊາດລະຫວ່າງ 3 ອົງການ. ນີ້ແມ່ນການເຄື່ອນໄຫວແນໃສ່ຍົກສູງປະສິດທິຜົນຖະແຫຼງຂ່າວ, ໂຄສະນາກ່ຽວກັບໜ້າທີ່ການທະຫານ, ການປ້ອງກັນຊາດ, ສ້າງພື້ນຖານປ້ອງກັນຊາດທົ່ວປວງຊົນ ແລະ ກຳລັງປະກອບອາວຸດປະຊາຊົນຜ່ານພາລະກິດສ້າງສາ ແລະ ປົກປັກຮັກສາປະເທດຊາດໃນບັນດາພາຫະນະສື່ມວນຊົນ. ຍູ້ແຮງການໂຄສະນາກ່ຽວກັບວຽກງານພົວພັນກັບຕ່າງປະເທດປ້ອງກັນຊາດ, ຈຸດສຸມແມ່ນສ່ອງແສງການເຄື່ອນໄຫວພົວພັນຕ່າງປະເທດ 2 ຝ່າຍ, ຫລາຍຝ່າຍລະຫວ່າງ ກອງທັບປະຊາຊົນ ຫວຽດນາມ ກັບກອງທັບ, ກຳລັງປະກອບອາວຸດບັນດາປະເທດໃນໂລກ, ພິເສດແມ່ນກັບ ຈີນ, ລາວ, ກຳປູເຈຍ, ບັນດາປະເທດ ອາຊຽນ, ບັນດາປະເທດໃຫຍ່ ແລະ ປະເທດເພື່ອນມິດທີ່ເປັນມູນເຊື້ອຕ່າງໆ…ທ່ານພົນຕີ ຫງວຽນຈ້ອງເຫງ໋ຍ, ຮອງຫົວໜ້າກົມໃຫຍ່ການເມືອງ ກອງທັບປະຊາຊົນ ຫວຽດນາມ ເນັ້ນໜັກວ່າ:
“ ຂ້າພະເຈົ້າສະເໜີບັນດາອົງການ, ຫົວໜ່ວຍໃນທົ່ວກອງທັບ, ພິເສດແມ່ນລະບົບສື່ມວນຊົນກອງທັບ ຄວນສືບຕໍ່ສົມທົບກັນຢ່າງແໜ້ນແຟ້ນກັບໂທລະພາບ ຫວຽດນາມ ແລະ ວິທະຍຸກະຈາຍສຽງ ຫວຽດນາມ ຄົ້ນຄວ້າ, ສະເໜີບັນດາເນື້ອໃນ, ຮູບການຖະແຫຼງຂ່າວ, ໂຄສະນານັບມື້ນັບມີປະສິດທິຜົນ, ໃກ້ຊິດຕິດແທດກັບໜ້າທີ່ດ້ານການເມືອງຂອງກອງທັບ, ປະກອບສ່ວນປຸກລະດົມ, ລະດົມກຳລັງໃຈທົ່ວພັກ, ທົ່ວກອງທັບ, ທົ່ວປວງຊົນ ປະຕິບັດສ້າງສາປະເທດຊາດ ຫວຽດນາມ ສັງຄົມນິຍົມໃຫ້ໝັ້ນຄົງເຂັ້ມແຂງ. ”
ກ່າວຄຳເຫັນທີ່ພິທີລົງນາມ, ທ່ານ ຫງວຽນເທກີ໋ ຜູ້ອຳນວຍການໃຫຍ່ວິທະຍຸກະຈາຍສຽງ ຫວຽດນາມ ຢືນຢັນວ່າ: ພາຍຫລັງພິທີລົງນາມ, ການນຳບັນດາລະບົບ, ຫົວໜ່ວຍຕ່າງໆຂອງ ວິທະຍຸກະຈາຍສຽງ ຫວຽດນາມ ຈະຊີ້ນຳພະນັກງານ, ນັກບັນນາທິການຫັນເນື້ອໃນໂຄງການສົມທົບດັ່ງກ່າວ ກາຍເປັນບັນດາລາຍການ, ຄໍລຳ, ໃຫ້ເປັນລະອຽດ ແລະ ມີຊີວິດຊີວາ ເພື່ອໂຄສະນາຜ່ານບັນດາຮູບການສື່ມວນຊົນຂອງວິທະຍຸກະຈາຍສຽງ.