(ພິທີສະຫຼຸບສຳເລັດໂຄງການປັກຫຼັກໝາຍຖີ່ແລະບຸລະນະ
ລະບົບຫຼັກໝາຍຊາຍແດນຫວຽດນາມ-ລາວ)
(vovworld) - ວັນທີ 16/3, ຢູ່ ຮ່າໂນ້ຍ, ພິທີສະຫຼຸບລະດັບລັດ ກ່ຽວກັບເລື່ອງສຳເລັດໂຄງການປັກຫຼັກໝາຍຖີ່ ແລະບຸລະນະລະບົບຫຼັກໝາຍຊາຍແດນ ຫວຽດນາມ-ລາວ ຖືກຈັດຕັ້ງ, ດ້ວຍການເຂົ້າຮ່ວມຂອງທ່ານ ຫງວຽນເຕິ໋ນຢຸງ, ນາຍົກລັດຖະມົນຕີ ຫວຽດນາມ ແລະ ທ່ານ ທອງສິງ ທຳມະວົງ, ນາຍົກລັດຖະມົນຕີ ລາວ, ພ້ອມກັບຜູ້ຕາງໜ້າບັນດາກະຊວງ, ຂະແໜງການສູນກາງ ແລະ ບັນດາແຂວງທີ່ມີເສັ້ນຊາຍແດນຮ່ວມຂອງສອງປະເທດ.
ກ່າວຄວາມເຫັນທີ່ພິທີ ທ່ານ ຫງວຽນເຕິ໋ນຢຸງ, ນາຍົກລັດຖະມົນຕີ ຫວຽດນາມ ແລະ ທ່ານ ທອງສິງ ທຳມະວົງ, ນາຍົກລັດຖະມົນຕີ ລາວ, ຢືນຢັນວ່າ, ໂຄງການນີ້ແມ່ນປະກົດການທີ່ມີຊີວິດຊີວາແຫ່ງສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງສອງປະເທດ ບົນຫຼັກການເຄົາລົບເອກະລາດ, ອະທິປະໄຕ, ຜືນແຜ່ນດິນອັນຄົບຖ້ວນ ແລະ ຜົນປະໂຫຍດອັນຊອບທຳຂອງກັນ, ສະເໝີພາບ, ຕ່າງຝ່າຍຕ່າງມີປະສິດທິຜົນ, ເພື່ອເສັ້ນຊາຍແດນສັນຕິພາບ, ສະຖຽນລະພາບ, ຮ່ວມມືພ້ອມກັນພັດທະນາ, ເພື່ອຜົນປະໂຫຍດຂອງປະຊາຊົນສອງປະເທດ. ນາຍົກລັດຖະມົນຕີທັງສອງທ່ານ ເນັ້ນໜັກວ່າ, ໂຄງການນີ້ຍັງປະກອບສ່ວນສ້າງຄວາມສະດວກໃຫ້ແກ່ການຮ່ວມມືດ້ານການຄ້າ, ການລົງທຶນ ແລະ ການແລກປ່ຽນທາງດ້ານເສດຖະກິດ, ວັດທະນະທຳ, ການທ່ອງທ່ຽວລະຫວ່າງສອງປະເທດ, ຜ່ານນັ້ນຊຸກຍູ້ການພົວພັນມິດຕະພາບ, ການຮ່ວມມືຮອບດ້ານລະຫວ່າງສອງປະເທດ.
ທີ່ພິທີ, ດ້ວຍການເປັນສັກຂີພິຍານຂອງນາຍົກລັດຖະມົນຕີສອງປະເທດ, ທ່ານ ຟ້າມບິ່ງມິງ, ຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ ຫວຽດນາມ ແລະ ທ່ານ ທອງລຸນ ສີສຸລິດ, ຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ ລາວ ໄດ້ລົງນາມໃນເອກະສານດ້ານກົດໝາຍທີ່ສຳຄັນ 02 ສະບັບ, ນັ້ນແມ່ນ “ອະນຸສັນຍາກ່ຽວກັບເສັ້ນຊາຍແດນ ແລະ ຫຼັກໝາຍຊາຍແດນ“ ແລະ “ສັນຍາກ່ຽວກັບລະບຽບການຄຸ້ມຄອງຊາຍແດນ ແລະ ດ່ານຊາຍແດນທາງບົກລະຫວ່າງລັດຖະບານແຫ່ງ ສສ ຫວຽດນາມ ແລະ ລັດຖະບານແຫ່ງ ສປປ ລາວ“.