ທ່ານເລຂາທິການໃຫ່ຍຫງວຽນຟູຈ້ອງອ່ານບົດສະດຸດີທີ່ພິທີ
(ພາບ: vov)
(vovworld)- ໃນເວລາ 7 ໂມງເຊົ້າຂອງວັນທີ 13/10, ພິທີໄຫ້ວອາໄລທ່ານພົນເອກຫວໍ້ງວຽນຢາບ-ອະດີດກຳມະການກົມການເມືອງ, ອະດີດເລຂາຄະນະພັກການທະຫານສູນກາງ, ອະດີດຮອງນາຍົກລັດຖະມົນຕີຜູ້ປະຈຳການລັດຖະບານ, ອະດີດລັດຖະມົນຕີກະຊວງປ້ອງກັນປະເທດ, ຜູ້ບັນຊາການສູງສຸດກອງທັບ ປຊຊ ຫວຽດນາມ ໄດ້ຖືກຈັດຂຶ້ນຢ່າງສົມກຽດຢູ່ຫໍຈັດງານສົບແຫ່ງຊາດ-ຮ່າໂນ້ຍ. ບັນດາການນຳ, ອະດີດການນຳຂັ້ນສູງຂອງພັກ, ລັດ, ສະພາແຫ່ງຊາດ, ລັດຖະບານ, ກອງທັບ; ບັນດາຄະນະຜູ້ແທນການນຳຂັ້ນສູງຕ່າງປະເທດ; ການນຳບັນດາກະຊວງ, ຄະນະ, ຂະແໜງການ, ອົງການຈັດຕັ້ງມະຫາຊົນສູນກາງ ແລະ ບັນດາແຂວງ, ນະຄອນພ້ອມດ້ວຍຄອບຄົວ ທ່ານພົນເອກຫວໍ້ງວຽນຢາບ ໄດ້ເຂົ້າຮ່ວມພິທີໄຫ້ວອາໄລ.
(ພາບ: vnexpress.net)
ໃນບົດສະດຸດີອ່ານທີ່ພິທີ, ທ່ານເລຂາທິການໃຫ່ຍຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູຈ້ອງ ຊີ້ແຈງວ່າ: ທ່ານພົນເອກຫວໍ້ງວຽນຢາບ ເຖິງແກ່ມໍລະນະກຳແມ່ນຄວາມສູນເສຍອັນໃຫ່ຍຫຼວງຂອງພັກ, ລັດ, ກອງທັບ, ປຊຊ ແລະ ຄອບຄົວທ່ານພົນເອກຫວໍ້ງວຽນຢາບ. ທ່ານເລຂາທິການໃຫ່ຍຫງວຽນຟູຈ້ອງ ຢືນຢັນວ່າ: ໃນຕະຫຼອດ 80 ກ່ວາປີເຄື່ອນໄຫວປະຕິວັດ, ທ່ານພົນເອກຫວໍ້ງວຽນຢາບ ມີຜົນງານອັນໃຫ່ຍຫຼວງຫຼາຍຢ່າງ ແລະ ອຸທິດສ່ວນເປັນພິເສດທີ່ສຸດຕໍ່ພາລະກິດການປະຕິວັດຂອງພັກກອມມູນິດຫວຽດນາມ ແລະ ຊາດຫວຽດນາມ. ທ່ານເລຂາທິການໃຫ່ຍຫງວຽນຟູຈ້ອງ ໃຫ້ຮູ້ວ່າ: ຊີວິດການເຄື່ອນໄຫວຂອງທ່ານພົນເອກຫວໍ້ງວຽນຢາບ ຕິດພັນກັບບັນດາບາດກ້າວພັດທະນາຂອງການປະຕິວັດຫວຽດນາມ ແລະ ຂີດໝາຍປະຫວັດສາດທີ່ສຳຄັນ, ສະຫງ່າງອົ່ງອາດ. ຊື່ສຽງຂອງທ່ານພົນເອກຫວໍ້ງວຽນຢາບ ຕິດພັນກັບໄຊຊະນະອັນຍິ່ງໃຫ່ຍຂອງການຕໍ່ຕ້ານຕ້ານຈັກກະພັດອາເມລິກາ ແລະ ພວກລ່າເມືອງຂຶ້ນຝະລັ່ງ ແລະ ພາລະກິດສ້າງສາ ແລະ ປົກປັກຮັກສາປະເທດຊາດຂອງຊາດ. ຕາມທ່ານເລຂາທິການໃຫ່ຍຫງວຽນຟູຈ້ອງ ແລ້ວ, ໄຊຊະນະດັ່ງກ່າວແມ່ນມາຈາກກຳລັງແຮງຂອງກຸ່ມກ້ອນມະຫາສາມັກຄີທົ່ວປວງຊົນທັງຊາດ, ໄດ້ຮັບການຊີ້ນຳນຳພາຢ່າງຖືກຕ້ອງ ແລະ ມີຫົວຄິດປະດິດສ້າງຂອງພັກກອມມູນິດຫວຽດນາມ ແລະ ປະທານໂຮ່ຈິມິນ. ໄດ້ຮັບການສ້າງຂຶ້ນດ້ວຍເຈດຈຳນົງຕັດສິນໃຈຕໍ່ສູ້ຍາດເອົາໄຊຊະນະຂອງ ປຊຊ ຫວຽດນາມ, ໄດ້ຮັບການນຳພາຈາກຖັນແຖວພະນັກງານທີ່ມີຄວາມສາມາດ, ມີປະສົບການໄດ້ຮັບການຝຶກຝົນຫຼໍ່ຫຼອມໃນວິວັດການຕໍ່ສູ້ປະຕິວັດ ຊື່ງທ່ານພົນເອກຫວໍ້ງວຽນຢາບ ແມ່ນແບບຢ່າງດີເດັ່ນ. ວິວັດການເຂົ້າຮ່ວມຊີ້ນຳນຳພາ, ຕໍ່ສູ້ປະຕິວັດພ້ອມກັບສູນກາງພັກ, ປະທານໂຮ່ຈິມິນ, ທ່ານພົນເອກຫວໍ້ງວຽນຢາບ ມີຄຸນງາມຄວາມດີອັນໃຫ່ຍຫຼວງ, ປະກອບສ່ວນສ້າງ ແລະ ພັດທະນາທິດສະດີການທະຫານ, ແນວທາງສົງຄາມ ປຊຊ ພິເສດສະເພາະຂອງຫວຽດນາມ ໃນຍຸກສະໄຫມໂຮ່ຈິມິນ. ທິດສະດີນັ້ນແມ່ນສືບທອດ, ພັດທະນາ, ນຳໃຊ້ສິລະປະການທະຫານຫວຽດນາມ ແລະ ໂລກ, ສິລະປະຕີສັດຕູຂອງລຸ່ນພໍ່ລຸ່ນອ້າຍຫວຽດນາມ ຢ່າງມີຫົວຄິດປະດິດສ້າງ, ຊີ້ນຳທົ່ວພັກ, ທົ່ວກອງທັບ, ທົ່ວປວງຊົນຫວຽດນາມ ສ້າງເປັນໄຊຊະນະອັນຍິ່ງໃຫ່ຍໃນພາລະກິດປົດປ່ອຍຊາດ ແລະ ປົກປັດຮັກສາປະເທດຊາດ.
(ພາບ: vnexpress.net)
“ພັກ, ລັດ ແລະ ປະຊາຊົນຫວຽດນາມ ຕີລາຄາສູງການອຸທິດສ່ວນຂອງພົນເອກຫວໍງວຽນຢາບ. ກອງທັບປະຊາຊົນຫວຽດນາມ ລຸ່ນຕ່າງໆໄດ້ຖືພົນເອກຫວໍງວຽນຢາບ ແມ່ນອ້າຍກົກຂອງກອງທັບປະຊາຊົນຫວຽດນາມ. ບຸກຄະລິກ ແລະ ການອຸທິດສ່ວນອັນໃຫຍ່ຫຼວງຂອງພົນເອກຫວໍງວຽນຢາບ ໄດ້ຝັງເລິກໃນດວງໃຈຂອງປະຊາຊົນ, ທ່ານແມ່ນນາຍພົນຂອງປະຊາຊົນ ແລະ ຖືກຮັກສາໄວ້ໃນປະຫວັດສາດຂອງຊາດຕະຫຼອດໄປ. ສຳເລັບຂະບວນການຕິວັດຂອງໂລກ, ການອຸທິດສ່ວນຂອງພົນເອກໄດ້ປະກອບສ່ວນເຂົ້າໃນການລະດົມກຳລັງໃຈຕໍ່ສູ້ເພື່ອສັນຕິພາບ, ເອກະລາດແຫ່ງຊາດ, ຄວາມກ້າວໜ້າຂອງສັງຄົມ, ຕ້ານການກົດຂີ່ຂູດຮີດ, ຂາດຍຸຕິທຳຢູ່ບັນດາປະເທດຫົວເມືອງຂຶ້ນໃນອາຊີ, ອາຟລິກາ, ອາຟລິກາລາຕິນ ຢ່າງແຮງ. ຊື່ສຽງຂອງເພີ່ນ ໄດ້ຮັບການເຊີດຊູຈາກໂລກ ແລະ ປະຊາຊົນຜູ້ຮັກຮອມສັນຕິພາບ ”.
ທ່ານເລຂາທິການໃຫຍ່ ຫງວຽນຟຸຈ້ອງ ພ້ອມກັບບັນດາການນຳຂັ້ນສູງພັກ, ລັດ, ສະພາແຫ່ງຊາດ, ລັດຖະບານ, ກອງທັບ; ບັນດາຄະນະຜູ້ແທນການນຳຂັ້ນສູງຕ່າງປະເທດ, ການນຳບັນດາກະຊວງ, ຄະນະ, ຂະແໜງການ, ໝູ່ຄະນະສູນກາງ. ຮ່າໂນ້ຍ ແລະ ບັນດາແຂວງ, ນະຄອນພ້ອມກັບຄອບຄົວພົນເອກຫວໍງວຽນຢາບ ໄດ້ສະຫງວນເວລາ 1 ນາທີເພື່ອໄຫວ້ອາໄລພົນເອກຫວໍງວຽນຢາບ.
ບັນດາການນຳ, ອະດີດການນຳຂັ້ນສູງຂອງພັກ, ລັດ, ກອງທັບ, ບັນດາການຳຂັ້ນສູງຕ່າງປະເທດ, ບັນດາຄະນະທຸຕານຸທູດ, ກະຊວງ, ຂະແໜງການສູນກາງ ແລະ ບັນດາແຂວງ, ນະຄອນໄດ້ໄປອ້ອມໂລງຂອງພົນເອກຫວໍງວຽນຢາບ.
ພາຍຫລັງສິ້ນສຸດພິທີໄຫວ້ອາໄລ ແມ່ນດຳເນີນພິທີສົ່ງໂລງສົບ ພົນເອກ ຫວໍງວຽນຢາບ. ກ່ອນເດີນທາງໄປສະຫນາມບິນສາກົນ ໂນ້ຍບາຍ ບົນເສັ້ນທາງໄປຂະບວນລົດສົ່ງໂລງສົບ ພົນເອກ ຫວໍງວຽນຢາບ ໄດ້ຢຸດຕິຢູ່ເຮືອນສ່ວນຕົວຂອງເພີ່ນ ເລກທີ 30 ຖະຫນົນ ຮ່ວາງຢ້ຽວ ຮ່າໂນ້ຍ ເພື່ອທຳພິທີຈິດວິນຍານ.
ເວລາ 10 ໂມງ 30 , ເຮືອບິນພິເສດໝາຍເລກ VN 103 ບິນຈາກສະຫນາມບິນ ໂນ້ຍບາຍ ໄດ້ນຳສົ່ງໂລງສົບ ພົນເອກ ຫວໍງວຽນຢາບ ໄປຍັງສະຫນາມບິນ ດົງເຮີຍ ແຂວງ ກວ໋າງບີ່ງ ເວລາ 12 ໂມງ 25 ນາທີ. ຫລັງຈາກນັ້ນ ຂະບວນລົດນຳສົ່ງໂລງສົບ ພົນເອກ ຫວໍງວຽນຢາບ ເດີນທາງຈາກສະຫນາມບິນ ດົງເຮີຍ ໄປຕາມເສັ້ນທາງ 1 A ເຖິງສະຖານທີ່ປົງສົບ ພົນເອກ ຫວໍງວຽນຢາບ ຢູ່ ຫວູງຈົວ ບ້ານ ທໍ້ເຊີນ ຕາແສງ ກວາງດົງ, ເມືອງ ກວາງແຈກ ແຂວງ ກວ໋າງບີງ.
ກົງກັບເວລາຈັດພິທີໄຫວ້ອາໄລ ພົນເອກ ຫວໍງວຽນຢາບ ຢູ້ຫໍຈັດງານສົບແຫ່ງຊາດຢູ່ ຮ່າໂນ້ຍ, ພິທີສົບ ພົນເອກ ຫວໍງວຽນຢາບ ກໍໄດ້ຈັດຕັ້ງຂຶ້ນຢູ່ສຳນັກງານຄະນະກຳມະການປະຊາຊົນແຂວງ ກວ໋າງບີງ ຊື່ງແມ່ນບ້ານເກີດເມືອງນອນຂອງເພີ່ນ ແລະ ຢູ່ຫໍປະຊຸມເອກະພາບນະຄອນ ໂຮ່ຈິມີນ.
ເວລາ 16 ໂມງຕອນບ່າຍວັນທີ 13/10, ພິທີປົງສົບພົນເອກ ຫວໍງວຽນຢາບກໍ່ດຳເນີນໄປຢູ່ເຂດ ຫວຸງຈົ່ວ( ເມືອງທໍ້ເຊີນ, ຕາແສງກວາງດົງ, ເມືອງກວາງແຈກ, ແຂວງກວາງບີ່ນ) ທ່ານປະທານປະເທດ ເຈືອງເຕີ໋ນຊາງ, ທ່ານ ເລຮົ່ງແອງ, ກຳມະການກົມການເມືອງ, ຜູ້ປະຈຳການຄະນະເລຂາສູນກາງພັກກອມມູນິດຫວຽດນາມ, ທ່ານຮອງນາຍົກລັດຖະມົນຕີ ຫງວຽນຊວນຟຸກ, ທ່ານຮອງປະທານສະພາແຫ່ງຊາດ ອວງຈູລືວ, ລັດຖະມົນຕີກະຊວງປ້ອງກັນປະເທດ ຟຸ່ງກວາງແທງ... ແລະ ບັນດາສະມາຊິກໃນຄອບຄົວພົນເອກ ຫວໍງວຽນຢາບ ໄດ້ມີໜ້າໃນພິທີປົງສົບ. ພິທີປົງສົບພົນເອກ ຫວໍງວຽນຢາບໄດ້ສິ້ນສຸດໃນຄວາມທຸກເສົ້າເສຍດາຍຂອງປະຊາຊົນນັບໝື່ນຄົນ.
ພົນເອກ ຫວໍງວຽນຢາບ ເຖິງແກ່ມໍລະນະກຳໃນວັນທີ 4/10/2013 ລວມອາຍຸ 103 ປີ. ທີ່ພິທີໄຫວ້ອາໄລຖືກຈັດຂຶ້ນຢ່າງເປັນທາງການ ໃນວັນທີ 12/10 ຢູ່ຫໍຈັດງານສົບຢູ່ຮ່າໂນ້ຍ, ຮອດເວລາ 21 ໂມງ ມີກວ່າ 20.000 ເທື່ອຄົນເຂົ້າໄຫວ້ອາໄລ, ໃນນັ້ນ ມີການນຳຫລາຍປະເທດ ແລະ ຄະນະຜູ້ແທນສາກົນກວ່າ 200 ຄະນະ ມາຖະຫວາຍທູບທຽນອາໄລຫາ ພົນເອກ ຫວໍງວຽນຢາບ. ສ່ວນຢູ່ແຂວງ ກວ໋າງບີງ ແລະ ນະຄອນໂຮ່ຈິມີນ ມີກວ່າ 90.000 ເທື່ອຄົນໄດ້ເຂົ້າໄຫວ້ອາໄລ ພົນເອກ ຫວໍງວຽນຢາບ.