ພະບາດສົມເດັດພະເຈົ້າມະຫາຊີວິດໄທຮຽກຮ້ອງປັບປຸງຮ່າງລັດຖະທຳມະນູນ
ພະບາດສົມເດັດພະເຈົ້າມະຫາຊີວິດແຫ່ງລາຊະອານາຈັກໄທ ວາຊີຣາລົງກອນ
|
(vovworld) - ວັນທີ 10/1, ທ່ານນາຍົກລັດຖະມົນຕີ ໄທ ປຣະຢຸດ ຈັນໂອຈາ ໃຫ້ຮູ້ວ່າ, ພະບາດສົມເດັດພະເຈົ້າມະຫາຊີວິດແຫ່ງລາຊະອານາຈັກໄທ ວາຊີຣາລົງກອນ ໄດ້ຮຽກຮ້ອງປັບປຸງບັນດາມາດຕາໃນຮ່າງລັດຖະທຳມະນູນ ທີ່ກ່ຽວຂ້ອງເຖິງພະບໍລົມວົງສານຸວົງ. ກ່າວຄວາມເຫັນຕໍ່ນັກຂ່າວພາຍຫຼັງການປະຊຸມຄະນະລັດຖະບານປະຈຳສັບປະດາ, ທ່ານນາຍົກລັດຖະມົນຕີ ໄທ ປຣະຢຸດ ຈັນໂອຈາ ຊີ້ແຈ້ງວ່າ, ບັນຫານີ້ບໍ່ກ່ຽວພັນເຖິງບັນດາສິດ ແລະ ຄວາມເສລີຂອງປະຊາຊົນ, ເຖິງຢ່າງໃດກໍ່ຕາມ, ທ່ານບ່ໍໃຫ້ຮູ້ລາຍລະອຽດເທື່ອ. ຕາມທ່ານແລ້ວ, ກອງທັບ ແລະ ຄະນະລັດຖະບານໄດ້ເຫັນດີເປັນເອກະພາບຕໍ່ການປັບປຸງຮ່າງລັດຖະທຳມະນູນແລ້ວ. ການປັບປຸງຈະຕ້ອງເສຍເວລາປະມານ 2 ເຖິງ 3 ເດືອນ ຍ້ອນລັດຖະບານຕ້ອງປັບປຸງລັດຖະທຳມະນູນສະບັບຊົ່ວຄາວກ່ອນ, ຫຼັງຈາກນັ້ນຈຶ່ງປັບປຸງຮ່າງລັດຖະທຳມະນູນນີ້. ຮ່າງລັດຖະທຳມະນູນນີ້ ໄດ້ຮັບຄວາມເຫັນດີເຫັນພ້ອມໃນການລົງປະຊາມະຕິເມື່ອເດືອນ 8/2016 ແລະ ພວມລໍຖ້າ ພະບາດສົມເດັດພະເຈົ້າມະຫາຊີວິດແຫ່ງລາຊະອານາຈັກໄທ ໃຫ້ສັດຕະຍາບັນ. ກອງທັບໄທໄດ້ປະກາດວ່າການເລືອກຕັ້ງທົ່ວປະເທດຈະດຳເນີນໃນທ້າຍປີ 2017 ແລະ ວັນທີ 10/1, ທ່ານນາຍົກລັດຖະມົນຕີ ໄທ ປຣະຢຸດ ຈັນໂອຈາ ກໍ່ໄດ້ຢືນຢັນວ່າຂັ້ນຕອນປັບປຸງນີ້ແມ່ນບໍ່ປ່ຽນແປງ.