(vovworld)- ງານໂຮມຊຸມນຸມມິດຕິງດຳເນີນໄປໃນຕອນເຊົ້າວັນທີ 5/1/2014 ຢູ່ ຮ່າໂນ້ຍ ໂດຍມີການເຂົ້າຮ່ວມຂອງທ່ານປະທານປະເທດຫວຽດນາມ ເຈືອງເຕີນຊາງ, ປະທານສະພາແຫ່ງຊາດກຳປູເຈຍ Samdec Heng Samrin, ທ່ານນາງຮອງນາຍົກລັດຖະມົນຕີ ກຳປູເຈຍ Men Sam An ພ້ອມດ້ວຍການນຳພັກ, ລັດຫວຽດນາມຫລາຍທ່ານ. ງານໂຮມຊຸມນຸມມິດຕິງແມ່ນເພື່ອຮັບຮູ້ເຫດການປະຫວັດສາດຍິ່ງ ດ້ວຍການຊ່ວຍເຫລືອອັນໃຫຍ່ຫລວງຂອງພັກ, ລັດຫວຽດນາມ, ການສະຫນັບສະຫນູນຢ່າງສຸດຈິດສຸດໃຈຂອງກອງທັບ ແລະ ປະຊາຊົນຫວຽດນາມ, ບັນດາກຳລັງຮັກຊາດຂອງກຳປຸູເຈຍ ໄດ້ປົດປ່ອຍປະເທດຊາດ, ລົບລ້າງລະບອບດັບສູນເຊື້ອຊາດເພື່ອເປີດໄລຍະໃຫມ່ໃຫ້ແກ່ປະເທດກຳປູເຈຍ.
ບັນດາຜູ້ແທນເຂົ້າຮ່ວມງານໂຮມຊຸມນຸມມິດຕິງ
photo:baomoi.com
|
ອ່ານສູນທອດພົດທີ່ພິທີ, ທ່ານປະທານປະເທດ ເຈືອງເຕີນຊາງ ຢືນຢັນ: 35 ປີກ່ອນນີ້ ປະຊາຊົນຫວຽດນາມ ແລະ ກຳປູເຈຍ ປາດຖະຫນາຢາກໄດ້ດຳລົງຊີວິດໃນສັນຕິພາບເພື່ອຟື້ນຟູ ແລະ ພັດທະນາປະເທດຊາດພາຍຫລັງສົງຄາມມາເປັນເວລາຫລາຍປີ ແຕ່ ກຸ່ມ Polpot, Ieng Sary, Khieu Samphan ໄດ້ປະຕິບັດນະໂຍບາຍດັບສູນເຊື້ອຊາດຢູ່ ກຳປູເຈຍ ແລະ ຮຸກຮານເຂດຊາຍແດນທາງທິດຕາເວັນຕົກພາກໃຕ້ຫວຽດນາມ. ໃນເວລາ 3 ປີ 8 ເດືອນ 20 ວັນ, ລະບອບ Pol Pot ໄດ້ເຂັ່ນຂ້າຊາວກຳປູເຈຍ ເກືອບ 3 ລ້ານຄົນ, ລົບລ້າງທຸກຮາກຖານສັງຄົມ ແລະ ຍູ້ປະເທດກຳປູເຈຍ ຕົກເຂົ້າສູ່ໄພຖືກດັບສູນ.
ສຳລັບຫວຽດນາມ, ພວກເຂົາໄດ້ເສກສັນປັ້ນແຕ່ງປະຫວັດສາດ, ລະດົມກຳລັງແຮງການທະຫານເພື່ອດຳເນີນສົງຄາມຮຸກຮານເຂດຊາຍແດນທາງທິດຕາເວັນຕົກພາກໃຕ້ຂອງຫວຽດນາມ. ໄປຮອດໃສພວກເຂົາກໍທຳລາຍບ້ານເມືອງ, ເຂັ່ນຂ້າປະຊາຊົນຢ່າງທໍລະມານ ນັບທັງຜູ້ເຖົ້າຜູ້ແກ່, ແມ່ຍິງເດັກນ້ອຍ, ລະເມີດເອກະລາດ, ອະທິປະໄຕ ແລະ ຜືນແຜນດິນອັນຄົບຖ້ວນຂອງຫວຽດນາມ.
ຕໍ່ຫນ້າບັນດາການກະທຳຮຸກຮານ ແລະ ດັບສູນຢ່າງທໍລະມານຂອງລະບອບ Pol Pot, ໂດຍຕອບຄຳຮຽກຮ້ອງຂອງແນວໂຮມສາມັກຄີກູ້ຊາດ ກຳປູເຈຍ, ຂອງປະຊາຊົນກຳປູເຈຍ, ພັກ, ລັດ, ປະຊາຊົນ ແລະ ກອງທັບຫວຽດນາມ ໄດ້ປະຕິບັດສິດປ້ອງກັນຕົນເອງອັນຊອບທຳ, ພ້ອມກັບກຳລັງປະກອບອາວຸດ, ປະຊາຊົນກຳປູເຈຍ ແລະ ການສະຫນັບສະຫນູນຂອງເພື່ອນມິດສາກົນຕີເອົາຊະນະລະບອບດັບສູນເມື່ອວັນທີ 7/1/1979. ທ່ານປະທານປະເທດເຈືອງເຕີນຊາງ ເນັ້ນຫນັກວ່າ:
“ໄຊຊະນະປະຫວັດສາດນີ້ແມ່ນໄຊຊະນະລວມ, ຄວາມເບິກບານມ່ວນຊື່ນລວມຂອງປະຊາຊົນສອງປະເທດ, ປົກປັກຮັກສາເອກະລາດ, ອະທິປະໄຕ, ຜືນແຜນດິນອັນຄົບຖ້ວນຂອງກຳປູເຈຍ ແລະ ຫວຽດນາມ ຢ່າງໝັ້ນຄົງ, ອັດຫນ້າປະຫວັດສາດອັນມືດມົວທີ່ສຸດຂອງປະເທດກຳປູເຈຍ, ກູ້ເອົາຊີວິດຂອງປະຊາຊົນກຳປູເຈຍ ຫລຸດພົ້ນອອກຈາກໄພດັບສູນ, ເປີດສັງກາດເອກະລາດ, ເສລີພາບ, ສັນຕິພາບ, ເປັນກາງ ແລະ ພັດທະນາຂອງປະຊາຊົນກຳປູເຈຍ”
ທ່ານປະທານປະເທດເຈືອງເຕີນຊາງ ເນັ້ນຫນັກວ່າ: ຄວາມສາມັກຄີບໍລິສຸດຜຸດຜ່ອງລະຫວ່າງປະຊາຊົນສອງປະເທດຈະໄດ້ຈົດໄວ້ໃນປະຫວັດສາດຕະຫລອດໄປ ແລະ ບໍ່ມີກຳລັງທີ່ເປັນປໍລະປັກໃດສາມາດເສກສັນປັ້ນແຕ່ງໄດ້.
ຕາງຫນ້າໃຫ້ຄະນະຜູ້ແທນລາຊະອານາຈັກ ກຳປູເຈຍ ກ່າວຄຳເຫັນນະພິທີ, ທ່ານປະທານສະພາແຫ່ງຊາດ ກຳປູເຈຍ ຢືນຢັນ: ເລື່ອງທະຫານອາສາສະໝັກ ຫວຽດນາມ ຊ່ວຍເຫລືອປົດປ່ອຍປະຊາຊົນກຳປູເຈຍ ຫລຸດພົ້ນອອກຈາກລະບອບດັບສູນເຊື້ອຊາດ ແລະ ຍາດເອົາມະຫາໄຊເມື່ອວັນທີ 7/1/1979 ກາຍເປັນມື້ສະຖາປະນາທີ 2 ຂອງປະຊາຊົນ ກຳປູເຈຍ.
“ງານໂຮມຊຸມນຸມມື້ນີ້ ແມ່ນເຫດການສຳຄັນຍິ່ງຂອງພັກ, ລັດ ແລະ ປະຊາຊົນຫວຽດນາມ ທີ່ໄດ້ເສຍສະຫລະທຸກດ້ານເພື່ອປະຊາຊົນກຳປູເຈຍ ແລະ ກໍແມ່ນໂອກາດເພື່ອໃຫ້ປະຊາຊົນກຳປູເຈຍ ສະແດງຄວາມເຄົາລົບນັບຖື ແລະ ຄວາມຮູ້ບຸນຄຸນອັນໃຫຍ່ຫລວງຂອງທະຫານອາສາສະໝັກ ຫວຽດນາມ ແລະ ບາງປະເທດເພື່ອນມິດໃນໂລກ. ຄວາມຈິງ ບໍ່ມີການເສຍສະຫລະອັນສູງສົ່ງຂອງທະຫານຫວຽດນາມ, ປະເທດກຳປູເຈຍ ບໍ່ມີກາລະໂອກາດເພື່ອຍາດເອົາໄຊຊະນະປະຫວັດສາດເມື່ອວັນທີ 7/1/1979 ໄດ້.”
ກ່ອນຫນ້ານັ້ນ ໃນໂອກາດຄະນະຜູ້ແທນຂັ້ນສູງສະພາແຫ່ງຊາດ ກຳປູເຈຍມາຢ້ຽມຢາມຫວຽດນາມ, ທ່ານ ເລຂາທິການໃຫຍ່ ຫງວຽນຟູຈ້ອງ, ທ່ານປະທານປະເທດເຈືອງເຕີນຊາງ ແລະ ທ່ານປະທານສະພາແຫ່ງຊາດ ຫງວຽນຊີງຮຸ່ງໄດ້ຕອ້ນຮັບທ່ານປະທານສະພາແຫ່ງຊາດກຳປູເຈຍ. ທີ່ການພົບປະ, ການນຳຫວຽດນາມ ຢືນຢັນ: ຍາມໃດຫວຽດນາມກໍຖືເປັນສຳຄັນ ແລະ ສະຫງວນບຸລິມະສິດຕົ້ນຕໍໃຫ້ແກ່ການປັບປຸງ ແລະ ພັດທະນາສາຍພົວພັນຖານບ້ານໃກ້ເຮືອນຄຽງອັນດີງາມ, ນຳ້ໃຈມິດຕະພາບທີ່ເປັນມູນເຊື້ອ, ການຮ່ວມມືຮອບດ້ານ, ໝັ້ນຄົງ, ຍາວນານ ລະຫວ່າງຫວຽດນາມ ແລະ ກຳປູເຈຍ.