ບັນດາລັດຖະມົນຕີກະຊວງປ້ອງກັນປະເທດ ອາຊຽນ ລົງນາມໃນຖະແຫຼງການຮ່ວມ
(vovworld) – ດ້ວຍຫົວຂໍ້ວ່າ “ສົ່ງເສີມການພົວພັນຮ່ວມມືວຽກງານປ້ອງກັນຊາດ ເພື່ອຄວາມເຂັ້ມແຂງຂອງປະຊາຄົມ ອາຊຽນ”, ກອງປະຊຸມລັດຖະມົນຕີກະຊວງປ້ອງກັນປະເທດ ອາຊຽນ ຄັ້ງທີ 10 (ADMM – 10) ໄດ້ສິ້ນສຸດລົງ ແລະ ບັນລຸຜົນສຳເລັດໃນຕອນບ່າຍວັນທີ 25/5, ທີ່ຫໍປະຊຸມແຫ່ງຊາດຢູ່ນະຄອນຫຼວງ ວຽງຈັນ, ປະເທດລາວ. ສິ້ນສຸດກອງປະຊຸມ, ລັດຖະມົນຕີກະຊວງປ້ອງກັນປະເທດ ຂອງ 10 ປະເທດອາຊຽນ ໄດ້ລົງນາມໃນຖະແຫຼງການຮ່ວມ. ຖະແຫຼງການຮ່ວມຊີ້ແຈ້ງວ່າ: ຈະຢືດໝັ້ນບັນດາຄຳໝັ້ນສັນຍາກ່ຽວກັບຈຸດປະສົງ ແລະ ຫຼັກການຂອງກົດບັດ ອາຊຽນ ເພື່ອແນໃສ່ຮັບໃຊ້ຈຸດໝາຍຂອງປະຊາຊົນບັນດາປະເທດສະມາຊິກອາຊຽນ ແລະ ເພື່ອແນໃສ່ຮັບປະກັນໃຫ້ປະຊາຊົນໄດ້ດຳລົງຊີວິດໃນສັນຕິພາບຕາມຫຼັກມູນຂອງ ອາຊຽນ “ວິໄສທັດໜຶ່ງດຽວ, ສີສັນໜຶ່ງດຽວ, ປະຊາຄົມເອົາໃຈໃສ່ ແລະ ແບ່ງປັນ”, ຊົມເຊີຍເລື່ອງຮັບຮອງເອົາຖະແຫຼງການ “ອາຊຽນ 2025: ພ້ອມກັນກ້າວຂຶ້ນຢ່າງໝັ້ນຄົງ”, ພິເສດແມ່ນວິໄສທັດປະຊາຄົມການເມືອງ - ຄວາມໝັ້ນຄົງ 2025 ທີ່ກອງປະຊຸມສຸດຍອດ ອາຊຽນ ຄັ້ງທີ 27 ຢູ່ Kuala Lumpur, ປະເທດ ມາເລເຊຍ, ວາງອອກກຳນົດທິດໃຫ້ແກ່ການຮ່ວມມືດ້ານປ້ອງກັນຊາດຢ່າງແທດຈິງ ແລະ ສ້າງກຳລັງຄວາມສາມາດລະຫວ່າງກຳລັງປ້ອງກັນຊາດບັນດາປະເທດ ອາຊຽນ ແລະ ບັນດາປະເທດຄູ່ຮ່ວມມືໃນການຮັບມືກັບບັນດາສິ່ງທ້າທາຍໃນປະຈຸບັນ ແລະ ອະນາຄົດ.
ຖະແຫຼງການຮ່ວມໄດ້ຢັ້ງຢືນຄືນຄວາມສຳຄັນຂອງເລື່ອງຮັກສາສັນຕິພາບ ສະຖຽນລະພາບກໍ່ຄືການຮັກສາ ຄວາມເສລີໃນການເດີນທະເລ, ການບິນຢູ່ທະເລຕາເວັນອອກຕາມບັນດາຫຼັກການ ໄດ້ຮັບການຮັບຮອງ ຈາກກົດໝາຍສາກົນ, ລວມມີສົນທິສັນຍາສາກົນກ່ຽວກັບກົດໝາຍວ່າດ້ວຍທະເລປີ 1982 . ການ ຮ່ວມມືນຳກັນ ເພື່ອຕ້ານຄືນ ລັດທິກໍ່ການຮ້າຍ ດ້ວຍທຸກຮູບການ ແລະ ປະກົດການເຊິ່ງ ລວມມີການຮ່ວມມືໃນທຸກຂົງເຂດຄື ແບ່ງປັນຂໍ້ມູນຂ່າວສານ ແລະ ສືບລາດຊະການລັບ; ດຳເນີນບັນດາບັ້ນຮົບປະສົມຢູ່ບັນດາສະຖານທີ່ຕ້ອງການປະຕິບັດ, ແລະ ຍົກສູງປະສິດທິຜົນບັນດາກົນໄກ ສ້າງຄວາມໄວ້ເນື້ອເຊື່ອໃຈ ແລະ ສ້າງກຳລັງຄວາມສາມາດ.
ຖະແຫຼງການຊົມເຊິີຍໝາກຜົນສຳຄັນຂອງກອງປະຊຸມ ADMM ຄັ້ງທີ 10 ເຊິ່ງໄດ້ຈັດຕັ້ງຢູ່ນະຄອນຫລວງ ວຽງຈັນ ປະເທດ ລາວ ດ້ວຍຫົວຂໍ້ “ສົ່ງເສີມການພົວພັນຮ່ວມມືວຽກງານປ້ອງກັນຊາດ ເພື່ອຄວາມເຂັ້ມແຂງຂອງປະຊາຄົມ ອາຊຽນ” ເພື່ອແນໃສ່ປັບປຸງປະຊາຄົມສາມັກຄີ, ຍືນຍົງ ແລະ ວັດທະນາຖາວອນ; ຊົມເຊີຍ ຟີລີບຟິນ ຮັບດຳລົງຕຳແໜ່ງເປັນປະທານ ອາຊຽນ, ປະທານ ADMM ຄັ້ງທີ 11 ແລະ ADMM+ ຄັ້ງທີ 4 ໃນປີ 2017.