( vovworld.vn ) ນັກຂ່າວວິທະຍຸກະຈາຍສຽງ ຫວຽດນາມ ປະຈຳ ລັດເຊຍໃຫ້ຂ່າວວ່າ, ວັນທີ 7 ກຸມພາ, ທ່ານລັດຖະມົນຕີການຕ່າງປະເທດ ລັດເຊຍ Sergei Lavrov ທີ່ພວມຢູ່ຢ້ຽມຢາມ ຊີຣີ ໄດ້ມີການປະຊຸມກັບປະທານາທິບໍດີ ຊີຣີ Bashar al-Assad. ສຳນັກຂ່າວສານ ລັດເຊຍ RIA ໄດ້ຄັດຄຳເວົ້າຂອງທ່ານລັດຖະມົນຕີການຕ່າງປະເທດ ລັດເຊຍ Sergei Lavrov ໃນການທີ່ພົບປະວ່າ, ລັດເຊຍ ຢາກໃຫ້ປະຊາຊົນບັນດາປະເທດ ອາຣັບ ໄດ້ດຳລົງຊີວິດໃນສັນຕິພາບ ແລະ ບັນດາການນຳ ຊີຣີ ຄວນຮັບຮູ້ໜ້າທີ່ຮັບຜິດຊອບຂອງຕົນ. ທ່ານ Lavrov ກໍ່ເວົ້າວ່າ ກຳລັງຝ່າຍຄ້ານຢູ່ ຊີຣີ ຄວນແບ່ງປັນໜ້າທີ່ຮັບຜິດຊອບກັບລັດຖະບານ ຊີຣີ ຕໍ່ໜ້າສະພາບໃຊ້ຄວາມຮຸນແຮງຢູ່ປະເທດນີ້.
ກອນໜ້ານັ້ນ, ກະຊວງການຕ່າງປະເທດ ລັດເຊຍ ໃຫ້ຮູ້ວ່າ, ການໄປຢ້ຽມຢາມແມ່ນປະຕິບັດຕາມຄຳສັ່ງຂອງທ່ານປະທານາທິບໍດີ ລັດເຊຍ Dmitry Medvedev. ທ່ານ Lavrov ກໍ່ຖະແຫຼງວ່າ ລັດເຊຍ ບໍ່ມີແນວຄວາມຄິດຈະປ່ຽນແປງຫຼັກໝັ້ນຂອງຕົນກ່ຽວກັບ ຊີຣີ ແລະ ບັນຫາສຳຄັນໃນປະຈຸບັນແມ່ນ ຊີຣີ ຕ້ອງສະກັດກັ້ນການໃຊ້ຄວາມຮຸນແຮງພາຍໃນ, ຕ້ານການແຊກແຊງທີ່ໃຊ້ຄວາມຮຸນແຮງຈາກພາຍນອກ ແລະ ດຳເນິນການເຈລະຈາດ້ານການເມືອງໂດຍໄວ. ຜູ້ຕາງໜ້າປະຈຳການຂອງ ລັດເຊຍ ປະຈຳ ສະຫະປະຊາຊາດ Churkin ຊີ້ແຈງວ່າ, ການຢ້ຽມຢາມຄັ້ງນີ້ແມ່ນຄວາມມານະພະຍາຍາມແນໃສ່ປະກອບສ່ວນແກ້ໄຂວິກິດການດ້ານການເມືອງຢູ່ ຊີຣີ.
ບັນດານັກສັງເກດການ ອາຣັບ ໄດ້ຖືວ່າ, ພາຍຫຼັງປະຕິເສດຮ່າງມະຕິຂອງສະພາຄວາມໝັ້ນຄົງສະຫະປະຊາຊາດກ່ຽວກັບການເພີ່ມທະວີການລົງໂທດ ຊີຣີ, ປະຈຸບັນ ລັດເຊຍ ແລະ ຈີນ ພວມມານະພະຍາຍາມຮຽກຮ້ອງປະເທດນີ້ມີບາດກ້າວຢ່າງລະອຽດເພື່ອແກ້ໄຂບັນດາການປະທະກັນຢູ່ພາຍໃນປະເທດ.