(vovworld) - ວັນທີ 07/01, ປະຊາຊົນຫວຽດນາມ ແລະ ກຳປູເຈຍ ໄດ້ຈັດພິທີສະເຫຼີມສະຫຼອງ 35 ປີແຫ່ງວັນທີທະຫານອາສາສະໝັກຫວຽດນາມ ຊ່ວຍເຫຼືອປະຊາຊົນກຳປູເຈຍ ຫຼຸດພົ້ນອອກຈາກລະບອບດັບສູນເຊື້ອຊາດ (07/01/1979 – 07/01/2014).
ໃນໜ້າພິເສດທີ່ມີຫົວຂໍ້ວ່າ “ຍ້ອງຍໍສັນລະເສີນໄຊຊະນະ ແລະ ນ້ຳໃຈສາມັກຄີແບບພິເສດລະຫວ່າງຫວຽດນາມ - ກຳປູເຈຍ”, ໜັງສືພິມປະຊາຊົນໄດ້ລົງພິມບົດຂຽນຫຼາຍບົດ ຫວນຄືນບັນດາອານຸສອນກ່ຽວກັບຄວາມສາມັກຄີ, ສັດຊື່ບໍລິສຸດຂອງ 2 ປະເທດໃນອະດິດຕະການ ກໍ່ຄືພາລະກິດຟື້ນຟູ ແລະ ພັດທະນາປະເທດກຳປູເຈຍ ຄືໃນປະຈຸບັນ. ພິເສດບົດນຳຂອງໜັງສືພິມປະຊາຊົນດ້ວຍຫົວຂໍ້ວ່າ “ຄວາມເອກອ້າງຖະໜົງໃຈກ່ຽວກັບພາລະກິດເປັນທຳ, ຄວາມສາມັກຄີແບບພິເສດລະຫວ່າງຫວຽດນາມ - ກຳປູເຈຍ” ໄດ້ຢືນຢັນວ່າ ໄຊຊະນະຕ້ານລະບອບດັບສູນເຊື້ອຊາດ Polpot ແມ່ນເຫດການສຳຄັນຍິ່ງໃນໜ້າປະຫວັດສາດທີ່ອົ່ງອາດກ້າຫານຂອງ 2 ຊາດ, ທັງຊ່ວຍຫວຽດນາມ ປົກປັກຮັກສາຜືນແຜ່ນດິນແດນອັນຄົບຖ້ວນ, ທັງນຳປະຊາຊົນກຳປູ້ເຈຍ ຫຼຸດພົ້ນອອກຈາກລະບອບດັບສູນເຊື້ອຊາດທີ່ຮ້າຍແຮງທີ່ສຸດໃນປະວັດສາດຂອງມວນມະນຸດ ແລະ ປະຕິບັດພາລະກິດຟື້ນຟູ, ພັດທະນາປະເທດຊາດ. ໄຊຊະນະກ່ອນນີ້ 35 ປີ ແມ່ນໄຊຊະນະຂອງຄວາມເປັນທຳ, ຂອງຄວາມສາມັກຄີ, ສັດຊື່ບໍລິສຸດລະຫວ່າງຫວຽດນາມ - ກຳປູເຈຍ, ນຳປະຫວັດສາດຂອງ 2 ປະເທດກ້າວເຂົ້າສູ່ໄລຍະໃໝ່.
ບົດນຳ “ເສີມຂະຫຍາຍຄູນຄ່າຂອງໄຊຊະນະປະຫວັດສາດ, ຍົກສູງການພົວພັນສາມັກຄີ, ມິດຕະພາບ ແລະ ການຮ່ວມມືລະຫວ່າງຫວຽດນາມ - ກຳປູເຈຍ” ຂອງໜັງສືພິມກອງທັບປະຊາຊົນຫວຽດນາມ ຢືນຢັນວ່າ ຍາມໃດ ຫວຽດນາມ ກໍ່ຢາກພັດທະນາມູນເຊື້ອສາມັກຄີ, ມິດຕະພາບ, ການຮ່ວມມື ແລະ ຊ່ວຍເຫຼືອເຊິ່ງກັນ ແລະ ກັນລະຫວ່າງປະຊາຊົນ 2 ປະເທດຢ່າງສະເໝີຕົ້ນສະເໝີປາຍ, ສືບຕໍ່ນຳການພົວພັນລະຫວ່າງ 2 ປະເທດຂຶ້ນສູ່ລະດັບສູງໃໝ່.
ກ່າວຄຳເຫັນເນື່ອງໃນໂອກາດນີ້, ບັນດາຜູ້ນຳກຳປູເຈຍ ຢັ້ງຢືນວ່າ: ກຳປູເຈຍ ຮູ້ບຸນຄຸນພັກ, ລັດ, ປະຊາຊົນ ແລະ ກອງທັບຫວຽດນາມ ຕະຫຼອດໄປ ທີ່ໄດ້ກູ້ຊ່ວຍປະເທດ ແລະ ປະຊາຊົນ ກຳປູເຈຍ ຫລຸດພົ້ນອອກຈາກໄພດັບສູນເຊື້ອຊາດ, ເພື່ອໃຫ້ປະເທດ ກຳປູເຈຍ ໄດ້ຟື້ນຕົວ ແລະ ພັດທະນາຄືໃນທຸກວັນນີ້. ທ່ານນາງ Men Sam An , ຮອງນາຍົກລັດຖະມົນຕີ ກຳປູເຈຍ, ປະທານສະມາຄົມມິດຕະພາບ ກຳປູເຈຍ - ຫວຽດນາມ, ໃຫ້ຮູ້ວ່າ:
“ຂ້າພະເຈົ້າຂໍສະແດງຄວາມຮູ້ບຸນຄຸນຢ່າງເລິກເຊິ່ງຕໍ່ບັນດາພະນັກງານ, ທະຫານອາສາສະໝັກ ຫວຽດນາມ ທີ່ໄດ້ເສຍສະຫຼະຊີວິດເພື່ອປະເທດ ກຳປູເຈຍ. ຖ້າຫາກບໍ່ມີການຊ່ວຍເຫຼືອຂອງທະຫານອາສາສະໝັກ ຫວຽດນາມ ຈະບໍ່ມີປະເທດ ກຳປູເຈຍ ຄືປະຈຸບັນ. ດັ່ງນັ້ນ, ປະຊາຊົນ 2 ປະເທດຕ້ອງສືບຕໍ່ຮັກສາຜົນງານ, ຄວາມສາມັກຄີ, ການຮ່ວມມືນັບມື້ໃຫ້ນັບໝັ້ນຄົງ, ເຂັ້ມແຂງກ່ວາອີກ”
ທ່ານ Chum Mey, ປະທານສະມາຄົມຜູ້ປະສົບເຄາະຮ້າຍຈາກລະບອບດັບສູນເຊື້ອຊາດ Pol Pot, ໄດ້ຈົດຈຳຈຸດເວລາທີ່ທະຫານ ຫວຽດນາມ ໄດ້ກູ້ຊ່ວຍທ່ານຢູ່ຄຸກ Tuon Sleng ຂອງ ຂະເມ ແດງ. ມີທະຫານຫວຽດນາມຜູ້ໜຶ່ງຊື່ ດົງ ໄດ້......ເສື້ອໃຫ້ທ່ານ. ທ່ານ Chum Mey ເວົ້າວ່າ:
“ຂ້າພະເຈົ້າເຂົ້າໃຈໄດ້ກ່ຽວກັບການພົວພັນລະຫວ່າງ ຫວຽດນາມ ແລະ ກຳປູເຈຍ. ຂ້າພະເຈົ້າຮູ້ວ່າ: ມີພຽງ ຫວຽດນາມ ຈຶ່ງຊ່ວຍເຫຼືອ ກຳປູເຈຍ ໄດ້. ຫວຽດນາມ ໄດ້ຊ່ວຍເຫຼືອ ກຳປູເຈຍ ຢ່າງທັນການ. ພວກຂ້າພະເຈົ້າຂໍ້ສະແດງຄວາມຮູ້ບຸນຄຸນຕໍ່ປະຊາຊົນ ແລະ ທະຫານ ຫວຽດນາມ ເຊິ່ງໄດ້ຊ່ວຍເຫຼືອປະຊາຊົນ ແລະ ປະເທດ ກຳປູເຈຍ”
ແລະ ໃນຕອນເຊົ້າວັນທີ 07/01, ດ້ວຍການເຂົ້າຮ່ວມຂອງບັນດາການນຳກະຊວງປ້ອງກັນປະເທດ, ກົມໃຫຍ່ການເມືອງກອງທັບປະຊາຊົນຫວຽດນາມ, ບັນດານາຍພົນ, ພະນັກງານຂັ້ນສູງ, ອະດີດຜູ້ຊ່ຽວຊານ, ອະດີດທະຫານອາສາສະໝັກຫວຽດນາມ ທີ່ໄດ້ເຂົ້າຮ່ວມການຕໍ່ສູ້ປົກປັກຮັກສາເຂດຊາຍແດນ ທິດຕາເວັນຕົກ - ພາກໃຕ້ຫວຽດນາມ.
ທີ່ພິທີ, ບັນດາຜູ້ແທນລ້ວນແຕ່ຖືວ່າ, ໄຊຊະນະຕໍ່ພວກປະຕິການ Polpot ວັນທີ 07/01/1979 ຂອງປະຊາຊົນກຳປູເຈຍ ມີການປະກອບສ່ວນບໍ່ໜ້ອຍຂອງບັນດາຜູ້ຊ່ຽວຊານ ແລະ ທະຫານອາສາສະໝັກຫວຽດນາມ. ກ່າວຄຳເຫັນທີ່ພິທີສະເຫຼີມສະຫຼອງ, ພົນຕີ ຟ້າມວັນຢີ້, ກຳມະການການເມືອງທະຫານເຂດ 7, ເນັ້ນໜັກວ່າ.
“ຕ້ອງສືບຕໍ່ສຶກສາຈິດໃຈສາກົນທີ່ໂປ່ງໄສ “ຊ່ວຍເພື່ອນກໍ່ຄືຊ່ວຍຕົນເອງ”, ເພີ່ມທະວີຄວາມສາມັກຄີລະຫວ່າງກຳລັງປະກອບອາວຸດເຂດທະຫານ ກັບອຳນາດການປົກຄອງ ແລະ ກອງທັບກຳປູເຈຍ, ປະກອບສ່ວນຮັກສາຄວາມສະຖຽນລະພາບເຂດຊາຍແດນ, ສັນຕິພາບ, ມິດຕະພາບ ເພື່ອສືບຕໍ່ສ້າງສາ ແລະ ພັດທະນາປະເທດຊາດ”.
ໃນວັນດຽກັນ, ປະຊາຊົນກຳປູເຈຍ ກໍ່ໄດ້ຈັດພິທີສະເຫຼີມສະຫຼອງ 35 ປີແຫ່ງວັນໄຊຊະນະລະບອບດັບສູນເຊື້ອຊາດ ຂະແມແດງ (07/01/1979 – 07/01/2014) ຢ່າງສົມກຽດ. ພິທີສະເຫຼີມສະຫຼອງວັນໂຄ່ນລົ້ມລະບອບດັບສູນເຊື້ອຊາດ ຂະແມແດງ ຖືກດຳເນີນຢູ່ສູນການຄ້າ, ວາງສະແດງ, ເຂດບັນເທິງຢູ່ເກາະ Koh Pich, ນະຄອນຫຼວງ ພະນົມເປັນ. ພ້ອມກັບພິທີໂດຍສູນກາງພັກປະຊາຊົນກຳປູເຈຍ ຈັດຕັ້ງຢູ່ນະຄອນຫຼວງພະນົມເປັນ, ອົງຄະນະພັກປະຊາຊົນກຳປູເຈຍ ຢູ່ 23 ແຂວງ, ນະຄອນຍັງເຫຼືອໃນທົ່ວປະເທດ ກໍ່ໄດ້ຈັດພິທີສະເຫຼີມສະຫຼອງ 35 ປີແຫ່ງວັນໄຊຊະນະລະບອບດັບສູນເຊື້ອຊາດ Pol Pot ຢ່າງສົມກຽດເຊັ່ນດຽວກັນ. ພິທີສະເຫຼີມສະຫຼອງກໍ່ແມ່ນອກາດເພື່ອມໃຫ້ລັດຖະບານ ແລະ ປະຊາຊົນກຳປູເຈຍ ຕອບບຸນແທນຄຸນການຊ່ວຍເຫຼືອຂອງທະຫານອາສາສະໝັກຫວຽດນາມ ເພື່ອໃຫ້ປະຊາຊົນກຳປູເຈຍ ຍາດເອົາໄຊຊະນະໃນການຕ້ານລະບອບດັບສູນເຊື້ອຊາດ Pol Pot.