ຄົນງານຫວຽດນາມ ຢູ່ລີບີ ກັບຄືນເມືອປະເທດ
|
(vovworld)- ຕອນບ່າຍວັນທີ 31/7 ຕາມເວລາຫວຽດນາມ, ຫນ່ວຍປະຕິບັດງານຂອງສະຖານທູດຫວຽດນາມ ປະຈຳ ຕວກກີ ໂດຍທ່ານ ຫງວຽນເທເກືອງ, ເອກອັກຄະລັດຖະທູດຫວຽດນາມ ປະຈຳ ຕວກກີ ນຳຫນ້າ ໄດ້ເດີນທາງເຖິງ Istanbul ເພື່ອພົບປະກັບ ຄົນງານຫວຽດນາມ 93 ຄົນ ທີ່ຍັງເຫລືອໃນຈຳນວນຄົນງານ ຫວຽດນາມ ຢູ່ ລີບີ 206 ຄົນທີ່ຖືກຍ້າຍໄປ ຕວກກີ ເພື່ອກັບເມືອປະເທດ. ເມື່ອແລກປ່ຽນກັບນັກຂ່າວວິທະຍຸກະຈາຍສຽງຫວຽດນາມ, ທ່ານເອກອັກຄະລັດຖະທູດ ຫງວຽນເທເກືອງ ໃຫ້ຮູ້ວ່າ: ປະຈຸບັນຫນ່ວຍປະຕິບັດງານຂອງສະຖານທູດຫວຽດນາມ ປະຈຳ ຕວກກີ ໄດ້ພົບປະກັບກຳມະກອນຫວຽດນາມ ທີ່ຍັງເຫລືອ 93 ຄົນ ແລະ ຈະເຮັດວຽກກັບບໍລິສັດຂອງ ຕວກກີ ເພື່ອຊອກຫາມາດຕະການສົ່ງຈຳນວນຄົນງານດັ່ງກ່າວກັບເມືອປະເທດຢ່າງປອດໄພໂດຍໄວ.
“ພວກຂ້າພະເຈົ້າກະກຽມເຄື່ອງຂອງທີ່ຈຳເປັນເພື່ອຫນູນຊ່ວຍຄົນງານຫວຽດນາມ, ພິເສດແມ່ນເບິ່ງແຍງສຸຂະພາບ. ພວກຂ້າພະເຈົ້າໄດ້ສົ່ງຈົດໝາຍທາງການໃຫ້ແກ່ອົງການອົບພະຍົບສາກົນ (IOM) ຢູ່ Ankara ແລະ Istanbul. ພວກຂ້າພະເຈົ້າກໍ່ຈະເຮັດວຽກໂດຍກົງກັບຫ້ອງການຜູ້ຕາງຫນ້າ IOM ປະຈຳ Istanbul ເພື່ອຊອກຫາຂ່າວຄາວຕື່ມອີກກ່ຽວກັບບັນດາກຸ່ມຄົນງານອື່ນຂອງຫວຽດນາມ ຖ້າຫາກມີ.”
ໃນຂະນະນັ້ນ ສະຖານທູດຫວຽດນາມ ປະຈຳ ລີບີ ກໍໄດ້ວາງແຜນຮັບປະກັນຄວາມສະຫງົບປອດໄພໃຫ້ແກ່ສຳນັກງານ, ບັນດາພະນັກງານ, ລັດຖະກອນ ແລະ ປະຊາຄົມຊາວຫວຽດນາມອາໄສຢູ່ ລີບີ ເຊັ່ນດຽວກັນ.