(vovworld) - ກອງປະຊຸມວຽກງານພັກຕ່າງປະເທດປີ 2013 ຖືກຈັດຂຶ້ນໃນວັນທີ 23/12 ຢູ່ ຮ່າໂນ້ຍ ເພື່ອແນໃສ່ຕີລາຄາ 3 ປີແຫ່ງການປະຕິບັດມະຕິກອງປະຊຸມໃຫຍ່ທົ່ວປະເທດຄັ້ງທີ 11 ຂອງພັກກອມມູນິດ ຫວຽດນາມ ແລະ ກຳນົດທິດທາງ, ໜ້າທີ່ຂອງຄະນະພັກໃນຊຸມປີຕໍ່ໄປ.
ຜ່ານ 3 ປີແຫ່ງການປະຕິບັດມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 11 ຂອງພັກ, ວຽກງານພັກຢູ່ຕ່າງປະເທດບັນລຸໄດ້ບັນດາໝາກຜົນພົ້ນເດັ່ນ. ບັນດາອົງການຜູ້ຕາງໜ້າໄດ້ຕັ້ງໜ້າ ແລະ ເປັນເຈົ້າການຊຸກຍູ້ການເຄື່ອນໄຫວທາງດ້ານການທູດຮັບໃຊ້ເສດຖະກິດ, ການທູດວັດທະນະທຳ, ພ້ອມທັງປະຕິບັດວຽກງານໂຄສະນາແນວທາງ, ນະໂຍບາຍຂອງພັກ ແລະ ລັດເປັນຢ່າງດີ, ໂຄສະນາພາບພົດຂອງປະເທດຊາດ ແລະ ຊາວ ຫວຽດນາມ.
ກ່າວຄຳເຫັນຊີ້ນຳກອງປະຊຸມ, ທ່ານ ເລຮົ່ງແອງ, ກຳມະການກົມການເມືອງ, ຜູ້ປະຈຳການຄະນະເລຂາສູນກາງພັກ, ຮຽກຮ້ອງໃຫ້ຄະນະພັກ ຢູ່ຕ່າງປະເທດ ແລະ ຄະນະພັກທຸກຂັ້ນ ປ່ຽນໃໝ່, ມີຫົວຄິດປະດິດສ້າງ, ກຳແໜ້ນສະພາບການຕົວຈິງ, ເປັນເສນາທິການໃຫ້ແກ່ສູນກາງພັກ, ຄະນະເລຂາກ່ຽວກັບວຽກງານກໍ່ສ້າງພັກຢູ່ຕ່າງປະເທດ:
“ຄະນະພັກຢູ່ຕ່າງປະເທດ, ບັນດາອົງການ, ຂະແໜງການ, ອົງການຈັດຕັ້ງມະຫາຊົນຄວນສົມທົບກັນຢ່າງແໜ້ນແຟ້ນ, ຊີ້ນຳໃຫ້ຄະນະພັກ, ອົງການພັກຢູ່ຕ່າງປະເທດ ປະຕິບັດພາລະໜ້າທີ່ໄດ້ຮັບມອບໝາຍເປັນຢ່າງດີ, ປະຕິບັດແນວທາງການຕ່າງປະເທດຂອງພັກ ແລະ ລັດ ຢ່າງເຂັ້ມງວດ ປະກອບສ່ວນຮັກສາສະພາບແວດລ້ອມສັນຕິພາບ, ສ້າງຄວາມສະດວກໃຫ້ແກ່ການຍູ້ແຮງການຫັນເປັນປະເທດອຸດສາຫະກຳ ແລະ ທັນສະໄໝ, ປົກປັກຮັກສາເອກະລາດ, ອະທິປະໄຕ, ເປັນເອກະພາບ ແລະ ຜືນແຜ່ນດິນອັນຄົບຖ້ວນຢ່າງໝັ້ນຄົງ, ຍາດແຍ່ງຄວາມເຫັນດີເຫັນພ້ອມ, ການສະໜັບສະໜູນຂອງເພື່ອນມິດສາກົນທີ່ມີຕໍ່ພາລະກິດສ້າງສາ ແລະ ປົກປັກຮັກສາປະເທດຊາດ, ຍົກສູງທີ່ຕັ້ງບົດບາດຂອງ ຫວຽດນາມ ໃນເວທີສາກົນ.”