ສືບຕໍ່ປ່ຽນໃໝ່ວຽກງານ ເປັນເສນາທິການສັງລວມ, ຮັບໃຊ້ການບໍລິຫານ ຂອງລັດຖະບານ
ກອງປະຊຸມຖືກຈັດຕັ້ງໃນຕອນເຊົ້າວັນທີ 21/1
(ພາບ: VGP/Nhật Bắc)
(vovworld) – ກ່າວຄຳເຫັນທີ່ກອງປະຊຸມໂດຍກົງຜ່ານເຄືອຂ່າຍ ອີນເຕີເນັດ ສະຫລຸບວຽກງານ ປີ 2013, ຜັນຂະຫຍາຍໜ້າທີ່ປີ 2014 ຂອງຫ້ອງວ່າການລັດຖະບານຖືກຈັດຂຶ້ນໃນຕອນເຊົ້າວັນທີ 21/1, ຢູ່ ຮ່າໂນ້ຍ, ທ່ານນາຍົກລັດຖະມົນຕີ ຫງວຽນເຕີນຢູ້ງ ເນັ້ນໜັກວ່າ: ຫ້ອງວ່າການລັດຖະບານຄວນຕັ້ງໜ້າ, ເປັນເຈົ້າການ, ປະຕິບັດວຽກງານເປັນເສນາທິການ, ຊ່ວຍວຽກງານສັງລວມ, ຮັບໃຊ້ວຽກງານຊີ້ນຳບໍລິຫານຂອງລັດຖະບານ, ນາຍົກລັດຖະມົນຕີຢ່າງມີປະສິດທິຜົນ. ບົນຈິດໃຈນັ້ນ, ທ່ານນາຍົກລັດຖະມົນຕີ ຫງວຽນເຕີນຢູ້ງ ຊີ້ນຳວ່າ: ກ່ອນອື່ນໝົດ, ຫ້ອງວ່າການລັດຖະບານຄວນເພີ່ມທະວີການສົມທົບກັບບັນດາກະຊວງ, ຂະແໜງການ, ທ້ອງຖີ່ນ ເພື່ອສືບຕໍ່ປະຕິບັດວຽກງານກໍ່ສ້າງ, ຄຸ້ມຄອງ, ຕິດຕາມກວດກາ, ຊຸກຍູ້, ຕີລາຄາການປະຕິບັດລາຍການວຽກງານຂອງລັດຖະບານເປັນຢ່າງດີ, ເພີ່ມເຕີມ, ປັບປຸງແຜນການຢ່າງທັນການ. ແຜນການດຳເນີນງານຂອງລັດຖະບານຕ້ອງຕິດພັນກັບບັນດາມະຕິສູນກາງພັກ, ຕ້ອງມີລັກສະນະລວບລວມ, ຕິດພັນກັບຊີວິດຕົວຈິງ, ຕິດພັນກັບສະພາບການເສດຖະກິດ - ສັງຄົມຂອງປະເທດຊາດ, ຕິດພັນກັບໜ້າທີ່ຂອງບັນດາກະຊວງ, ຂະແໜງການ, ປະກອບສ່ວນຮັບປະກັນຜົນສັກສິດ, ປະສິດທິຜົນວຽກງານຊີ້ນຳບໍລິຫານຂອງລັດຖະບານ.