ສະພາຄວາມໝັ້ນຄົງສະຫະປະຊາຊາດກ່າວປະນາມການໃຊ້ຄວາມຮຸນແຮງຢູ່ສາທາລະນະລັດປະຊາທິປະໄຕກົງໂກ
ສະພາຄວາມໝັ້ນຄົງສະຫະປະຊາຊາດກ່າວປະນາມ
ການໃຊ້ຄວາມຮຸນແຮງຢູ່ກົງໂກ
(ພາບ: AFP)
(vovworld) - ວັນທີ 25/02, ສະພາຄວາມໝັ້ນຄົງສະຫະປະຊາຊາດກ່າວປະນາມການໃຊ້ຄວາມຮຸນແຮງຫວ່າງມໍ່ໆມານີ້ຢູ່ເຂດ Kansai, ເຂດຕອນກາງພາກໃຕ້ ປະເທດສາທາລະນະລັດປະຊາທິປະໄຕກົງໂກ, ພ້ອມທັງຮຽກຮ້ອງລັດຖະບານປະເທດນີ້ດຳເນີນການສືບສວນຢ່າງເຂັ້ມງວດ ແລະ ຍຸຕິທຳ. ໃນຖະແຫຼງການສື່ມວນຊົນເຊິ່ງໄດ້ປະກາດຢູ່ນິວຢອກ, ປະເທດອາເມລິກາ, ສະພາຄວາມໝັ້ນຄົງສະຫະປະຊາຊາດ ໄດ້ສະແດງຄວາມວິຕົກກັງວົນພິເສດ ຕໍ່ໜ້າບັນດາຂໍ້ມູນຫວ່າງມໍ່ໆມານີ້ກ່ຽວກັບກຳລັງທະຫານລາດຢູ່ເຂດນີ້ໄດ້ລະເມີດກົດໝາຍວ່າດ້ວຍມະນຸດສະທຳຢ່າງຮ້າຍແຮງ, ໃນນັ້ນມີການຮັບເດັກເປັນພົນທະຫານ, ສັງຫານສາມັນຊົນ. ສະພາຄວາມໝັ້ນຄົງສະຫະປະຊາຊາດ ເນັ້ນໜັກວ່າ ລັດຖະບານ ກົງໂກ ຕ້ອງຮັບຜິດຊອບການປົກປ້ອງສາມັນຊົນ, ພ້ອມທັງກະຕຸກຊຸກຍູ້ບັນດາເຈົ້າໜ້າທີ່ມານະພະຍາຍາມຟື້ນຟູຄວາມເປັນລະບຽບຮຽບຮ້ອຍ.