(ພາບປະກອບຈາກ ຮ່າໂນ້ຍໃໝ່/CNN)
(vovworld) – ວັນທີ 20/6, ສະພາສູງ ອາເມລິກາ ໄດ້ປະຕິເສດ 4 ມາດຕະການຈຳກັດອາວຸດ. ເຖິງຢ່າງໃດກໍ່ຕາມ, ບັນດານັກສ້າງກົດໝາຍຍັງຄົງມານະພະຍາຍາມຍາດໄດ້ຂໍ້ຕົກລົງເພື່ອສະກັດກັ້ນການຄ້າຂາຍອາວຸດ ໃຫ້ບັນດາຜູ້ທີ່ຖືກສົງໄສວ່າແມ່ນພວກກໍ່ການຮ້າຍ. ກໍ່ຄືບັນດາການປະລາໄຊຄັ້ງຕ່າງໆກ່ອນນີ້, 4 ມາດຕະການເປີດກ້ວາງການກວດກາປະຫວັດຫຍໍ້ຂອງຜູ້ຊື້ປືນ ແລະ ຈຳກັດການຂາຍປືນໃຫ້ບັນດາຜູ້ນອນໃນບັນຊີລາຍຊື່ທີ່ຖືກລະແວງສົງໄສວ່າແມ່ນພວກກໍ່ການຮ້າຍ ຂາດບັດສະໜັບສະໜູນ 13 ບັດ ເພື່ອໄດ້ຮັບການຮັບຮອງເອົາທີ່ສະພາສູງ. ໃນ 4 ມາດຕະການດັ່ງກ່າວ, ມີ 2 ມາດຕະການໂດຍພັກປະຊາທິປະໄຕສະເໜີ ແລະ 2 ມາດຕະການຍັງເຫຼືອໂດຍພັກສາທາລະນະສະລັດເໜີ.
ເຫດການຍິງປືນທີ່ນອງເລືອດຫຼ້າສຸດໃນປະຫວັດສາດ ອາເມລິກາ ເມື່ອວັນທີ 12/6 ໄດ້ເພີ່ມທະວີຄວາມກົດດັນຕໍ່ບັນດານັກສ້າງກົດໝາຍ ແລະ ຊຸກຍູ້ເຂົາເຈົ້າຕ້ອງມີການເຄື່ອນໄຫວ. ເຖິງຢ່າງໃດກໍ່ຕາມ, ບັນດາມາດຕະການຮັດແໜ້ນການຄວບຄຸມອາວຸດ ສືບຕໍ່ບໍ່ສາມາດຍາດໄດ້ຈຳນວນບັດສະໜັບສະໜູນຢ່າງພຽງພໍ ເຊິ່ງສະແດງໃຫ້ເຫັນກຳລັງແຮງດ້ານການເມືອງຂອງບັນດາຜູ້ປົກປ້ອງສິດຂອງຜູ້ນຳໃຊ້ປືນໃນສະພາແຫ່ງຊາດ, ກໍ່ຄືສະຫະສະມາຄົມປືນເຫຼັກຍາວແຫ່ງຊາດ (NRA). ພັກສາທາລະນະລັດ ແລະ ບັນດາພັນທະມິດໃນ NRA ຖືວ່າ: ບັນດາຮ່າງກົດໝາຍຄວບຄຸມປືນເຊິ່ງພັກປະຊາທິປະໄຕສະເໜີແມ່ນມີຄວາມຈຳກັດຫຼາຍໂພດ. ໃນຂະນະນັ້ນ, ພັກປະຊາທິປະໄຕປະຕິເສດແຜນການຂອງພັກສາທາລະນະລັດ ເມື່ອຖືວ່າແມ່ນ “ອ່ອນແອໂພດ”.