ສະພາແຫ່ງຊາດຫວຽດນາມແລະລາວເພີ່ມທະວີການຮ່ວມມື2ຝ່າຍ
ທ່ານຮອງປະທານສະພາແຫ່ງຊາດ ອວງຈູລືວ
(vovworld) - ຕອນເຊົ້າວັນທີ 15/08, ທ່ານຮອງປະທານສະພາແຫ່ງຊາດ ອວງຈູລືວ ມີການພົບປະເຈລະຈາກັບທ່ານ ສົມພັນ ແພງຄຳມີ ຮອງປະທານສະພາແຫ່ງຊາດ ສປປ. ລາວ, ເນື່ອງໃນໂອກາດຄະນະຜູ້ແທນສະພາແຫ່ງຊາດ ລາວ ພວມມີການຢ້ຽມຢາມ ແລະ ເຮັດວຽກຢູ່ ຫວຽດນາມ. ທີ່ການພົບປະເຈລະຈາ, ທ່ານຮອງປະທານສະພາແຫ່ງຊາດ ອວງຈູລືວ ຢືນຢັນວ່າ: ພັກ, ລັດ ແລະ ປະຊາຊົນ ຫວຽດນາມ ຍາມໃດກໍ່ມີຄວາມເຊື່ອໝັ້ນຕໍ່ການພົວພັນແບບພິເສດລະຫວ່າງ ຫວຽດນາມ - ລາວ. ທ່ານຮອງປະທານສະພາແຫ່ງຊາດ ອວງຈູລືວ ໃຫ້ຮູ້ວ່າ: ປະຈຸບັນ, ກະຊວງການຕ່າງປະເທດ ຫວຽດນາມ ພວມຕັ້ງໜ້າປັບປຸງແຜນຮ່າງສະເຫຼີມສະຫຼອງ 55 ປີແຫ່ງວັນສ້າງຕັ້ງການພົວພັນທາງການທູດ ແລະ 40 ປີແຫ່ງວັນເຊັນສົນທິສັນຍາມິດຕະພາບ ແລະ ການຮ່ວມມື ຫວຽດນາມ - ລາວ ໃນປີ 2017.
ທ່ານຮອງປະທານສະພາແຫ່ງຊາດ ອວງຈູລືວ ຢືນຢັນວ່າ: ສະພາແຫ່ງຊາດ, ບັນດາອົງການສຳນັກງານຂອງສະພາແຫ່ງຊາດ, ບັນດາແຂວງ, ນະຄອນຂອງ ຫວຽດນາມ ຍາມໃດກໍ່ກຽມພ້ອມ ແລະ ຕັ້ງໜ້າແລກປ່ຽນຄຳເຫັນ, ແບ່ງປັນບົດຮຽນພຶດຕິກຳຕົວຈິງກັບຝ່າຍ ລາວ ໃນບັນດາຂົງເຂດນີ້. ສະພາແຫ່ງຊາດ ຫວຽດນາມ ປາດຖະໜາວ່າ ບັນດາອົງການສຳນັກງານຂອງ 2 ສະພາແຫ່ງຊາດ ສືບຕໍ່ເສີມຂະຫຍາຍໝາກຜົນທີ່ບັນລຸໄດ້ໃນບັນດານການເຄື່ອນໄຫວຮ່ວມມື 2 ຝ່າຍ, ສົມທົບກັນຈັດຕັ້ງການຕິດຕາມກວດກາເລື່ອງປະຕິບັດບັນດາຂໍ້ຕົກລົງຮ່ວມມືລະຫວ່າງ 2 ປະເທດ ເຊິ່ງໄດ້ຮັບການລົງນາມແລ້ວ, ປະກອບສ່ວນນຳການພົວພັນຮ່ວມມືລະຫວ່າງ 2 ປະເທດເຂົ້າສູ່ແທດຈິງ.
2 ຝ່າຍເຫັນດີເປັນເອກະພາບໃນໄລຍະຈະມາເຖິງ, ສຸມໃສ່ເພີ່ມທະວີການແລກປ່ຽນຄະນະຜູ້ແທນທຸກຂັ້ນ, ໃຫ້ບຸລິມະສິດສູງກ່ຽວກັບການກະກຽມການຢ້ຽມຢາມ ລາວ ຂອງປະທານສະພາແຫ່ງຊາດ ຫວຽດນາມ ໃນໄລຍະຈະມາເຖິງ. ຮອງປະທານສະພາແຫ່ງຊາດ 2 ທ່ານ ສະເໜີກຳມາທິການການຕ່າງປະເທດຂອງສະພາແຫ່ງຊາດເປັນເສນາທິການຊ່ວຍການນຳສະພາແຫ່ງຊາດ, ສົມທົບກັບບັນດາອົງການຂອງສະພາແຫ່ງຊາດ 2 ປະເທດ ຈັດຕັ້ງບັນດາໂຄງການຕິດຕາມກວດກາເລື່ອງປະຕິບັດບັນດາຂໍ້ຕົກລົງຮ່ວມມືລະຫວ່າງ 2 ປະເທດ, ພິເສດສຳລັບບັນດາໂຄງການຮ່ວມມືກ່ຽວກັບເສດຖະກິດລະຫວ່າງ 2 ປະເທດ ທີ່ພວມໄດ້ຮັບການຜັນຂະຫຍາຍຢູ່ ລາວ.