(vovworld) – ພິທີສະເຫຼີມສະຫຼອງ 70 ປີແຫ່ງວັນສ້າງຕັ້ງກອງທັບປະຊາຊົນ ຫວຽດນາມ (22/12) ໄດ້ຈັດຕັ້ງໃນວັນທີ 10/12, ຢູ່ ແບກລີນ, ສະຫະພັນເຢຍລະມັນ, ໂດຍຫ້ອງການທູດການທະຫານສະຖານທູດ ຫວຽດນາມ ປະຈຳ ເຢຍລະມັນ ຈັດຕັ້ງ. ກ່າວຄຳເຫັນໄຂພິທີ, ທ່ານນາງເອກອັກຄະລັດຖະທູດ ຫວຽດນາມ ປະຈຳ ເຢຍລະມັນ ຫງວຽນທິຮ່ວາງແອງ ໄດ້ທົບທວນຄືນປະຫວັດແຫ່ງການສ້າງຕັ້ງ ແລະ ໄລຍະທາງພັດທະນາທີ່ສະຫງ່າລາສີຂອງກອງທັບປະຊາຊົນ ຫວຽດນາມ ໃນຕະຫຼອດ 70 ປີຜ່ານມາ. ທ່ານນາງເອກອັກຄະລັດຖະທູດ ເນັ້ນໜັກຄວາມສຳຄັນຂອງການກໍ່ສ້າງພື້ນຖານປ້ອງກັນປະເທດ, ໃນນັ້ນກອງທັບປະຊາຊົນ ສວມບົດບາດຫຼັກແຫຼ່ງ, ກໍ່ຄືເລື່ອງສະຫງວນແຫລ່ງກຳລັງທີ່ມີຢູ່ແລ້ວເພື່ອຫັນກອງທັບເປັນທັນສະໄໝເພື່ອແນໃສ່ກຽມພ້ອມປົກປັກຮັກສາພື້ນຖານເອກະລາດ, ອະທິປະໄຕຂອງປະເທດຊາດ. ຄຽງຄູ່ກັນນັ້ນ, ເລື່ອງເພີ່ມທະວີກຳລັງຄວາມສາມາດດ້ານປ້ອງກັນປະເທດ, ກອງທັບປະຊາຊົນ ຫວຽດນາມ ກໍ່ເຂົ້າຮ່ວມບັນດາການເຄື່ອນໄຫວສາກົນຢ່າງຕັ້ງໜ້າ, ທັງ 2 ຝ່າຍ ແລະ ຫຼາຍຝ່າຍ, ເພື່ອແນໃສ່ສ້າງຄວາມໄວ້ເນື້ອເຊື່ອໃຈຍຸດທະສາດ, ປັບປຸງສະພາບແວດລ້ອມສັນຕິພາບໃນພາກພື້ນ ແລະ ໃນໂລກ.
ທ່ານນາງເອກອັກຄະລັດຖະທູດ ຫງວຽນທິຮ່ວາງແອງ, ເນັ້ນໜັກວ່າ: ລັດຖະບານ ແລະ ກອງທັບປະຊາຊົນ ຫວຽດນາມ ຕີລາຄາສູງການໜູນຊ່ວຍ, ຊ່ວຍເຫຼືອບຳລຸງສ້າງຂອງ ເຢຍລະມັນ ໃຫ້ແກ່ກອງທັບປະຊາຊົນ ຫວຽດນາມ, ເຊື່ອໝັ້ນວ່າ: ບັນດາທະຫານທີ່ໄດ້ຮັບການບຳລຸງສ້າງຢູ່ ເຢຍລະມັນຈະແມ່ນຂົວເຊື່ອມຕໍ່ປະກອບສ່ວນຮັດແໜ້ນການພົວພັນມິດຕະພາບລະຫວ່າງກອງທັບ ແລະ ປະຊາຊົນ 2 ປະເທດ.