ທ່ານ ຫງວຽນຕ໋ຽນລອງ, ຜູ້ອຳນວຍການລະບົບກະຈາຍສຽງ
ພາກພາສາຕ່າງປະເທດແຫ່ງຊາດ, ວິທະຍຸກະຈາຍສຽງ ຫວຽດນາມ
(vovworld) – ວັນທີ 8∕12, ປື້ມ”ບັນຊີວົງຕະກຸນປະທານາທິບໍດີ V.V.Putin” ຂອງນັກປະພັນ Aleksandr Putin ໄດ້ສະເໜີຕົວຢ່າງເປັນທາງການດ້ວຍພາສາຫວຽດຢູ່ ຮ່າໂນ້ຍ. ພິທີສະເໜີຕົວປື້ມຫົວນີ້ໂດຍ ວິທະຍຸກະຈາຍສຽງ ຫວຽດນາມ, ສະມາຄົມມິດຕະພາບ ຫວຽດນາມ - ລັດເຊຍ, ສະມາຄົມມິດຕະພາບ ລັດເຊຍ - ຫວຽດນາມ, ໂຮງພິມຈຳໜ່າຍຕຳຫຼວດປະຊາຊົນຮ່ວມຈັດຕັ້ງ. ເຂົ້າຮ່ວມພິທີມີທ່ານຮອງປະທານສະພາແຫ່ງຊາດ ອວງຈູລືວ ແລະ ທ່ານ ຫງວຽນເທ໋ກີ, ກຳມະການສູນກາງພັກ, ຜູ້ອຳນວຍການໃຫຍ່ ວິທະຍຸກະຈາຍສຽງ ຫວຽດນາມ.
ປື້ມ”ບັນຊີວົງຕະກຸນປະທານາທິບໍດີ V.V.Putin” ບໍ່ພຽງແຕ່ແມ່ນການຊອກຮູ້ກ່ຽວກັບກົກເຄົ້າຊາວກະສິກອນຂອງວົງຕະກຸນ Putin, ຫາກມັນຄືດັ່ງປະຫວັດແຫ່ງປະເທດ ລັດເຊຍໃນຕະຫຼອດເກືອບ 4 ສະຕະວັດ, ແມ່ນບົດປະພັນຄົ້ນຄ້ວາວັດທະນະທຳ, ປະຫວັດສາດ, ຊົນຊາດວິທະຍາຢ່າງເລິກເຊິ່ງ. ກ່າວຄວາມເຫັນທີ່ພິທີ, ທ່ານ ຫງວຽນຕ໋ຽນລອງ, ຜູ້ອຳນວຍການລະບົບກະຈາຍສຽງພາກພາສາຕ່າງປະເທດແຫ່ງຊາດ, ວິທະຍຸກະຈາຍສຽງ ຫວຽດນາມ, ຊີ້ແຈ້ງວ່າ:
“ຈຳນວນປື້ມກ່ຽວກັບປະທານາທິບໍດີ Putin ທີ່ໄດ້ແປເປັນພາສາຫວຽດແມ່ນຫຼາຍພໍສົມຄວນຢູ່ ຫວຽດນາມ. ເຖິງຢ່າງໃດກໍ່ຕາມ, ປື້ມຫົວນີ້ແມ່ນປື້ມໜຶ່ງດຽວກ່ຽວກັບວົງຕະກຸນຂອງປະທານາທິບໍດີ Putin. ປື້ມໄດ້ພັນລະນາການພັດທະນາຂອງວົງຕະກຸນຕິດພັນກັບຮີດຄອງປະເພນີ ກໍ່ຄືແຕ່ລະໄລຍະປະຫວັດສາດຂອງປະຊາຊົນ ລັດເຊຍ. ພວກຂ້າພະເຈົ້າເຊື່ອໝັ້ນວ່າ, ປື້ມ”ບັນຊີວົງຕະກຸນປະທານາທິບໍດີ V.V.Putin” ທີ່ແປເປັນພາສາ ຫວຽດນີ້, ທັງເປັນປື້ມທີ່ມີຄວາມໝາຍຢ່າງແນ່ນອນກ່ຽວກັບວິຊາການສຶກສາ, ທັງເປັນຂອງຂວັນດ້ານວັດທະນະທຳ, ຈິດໃຈທີ່ໜ້ານັບຖື, ປະກອບສ່ວນປັບປຸງສາຍພົວພັນມິດຕະພາບທີ່ເປັນມູນເຊື້ອອັນດີງາມລະຫວ່າງ ຫວຽດນາມ - ລັດເຊຍກວ່າອີກ”.
ສິ່ງທີ່ໜ້າສົນໃຈແມ່ນປື້ມຫົວນີ້ໄດ້ສ່ອງແສງບັນດາເຫດການທີ່ເກີດຂຶ້ນຢູ່ປະເທດລັດເຊຍ ກ່ອນທີ່ທ່ານ V.V.Putin ກາຍເປັນນັກເຄື່ອນໄຫວດ້ານການເມືອງ ແລະ ປະທານາທິບໍດີແຫ່ງລັດເຊຍ. ທ່ານ Aleksandr Putin, ຜູ້ຂຽນປື້ມດັ່ງກ່າວ, ໃຫ້ຮູ້ວ່າ:
“ຫວຽດນາມ ແມ່ນປະເທດທີ່ມີຄວາມໃກ້ຊິດມິດຕະພາບກັບພວກຂ້າພະເຈົ້າຢ່າງສະເໝີຕົ້ນສະເໝີປາຍ. ຂ້າພະເຈົ້າຫວັງວ່າ, ປື້ມຫົວນີ້ຈະເຮັດໃຫ້ພວກເພື່ອນມີຄວາມເຂົ້າໃຈຢ່າງເລິກເຊິ່ງກວ່າກ່ຽວກັບສະພາບການຢູ່ປະເທດ ລັດເຊຍໃນປະຈຸບັນ ແລະ ປະກອບສ່ວນເຂົ້າໃນການເພີ່ມທະວີຄວາມເຂົ້າອົກເຂົ້າໃຈເຊິ່ງກັນ ແລະ ກັນ ແລະ ພັດທະນາການຮ່ວມມືສອງຝ່າຍ ຫວຽດນາມ - ສະຫະພັນລັດເຊຍ”.