(vovworld) – ນັກຂ່າວວິທະຍຸກະຈາຍສຽງຫວຽດນາມ ປະຈຳຝຣັ່ງ ໃຫ້ຂ່າວວ່າ: ໃນລະຫວ່າງວັນທີ 28/2 ຫາ 1/3, ຢູ່ສຳນັກງານອົງການຮ່ວມມື ແລະ ພັດທະນາເສດຖະກິດ (ຫຼື OECD) ທີ່ປາຣີ, ໄດ້ດຳເນີນບັນດາການເຄື່ອນໄຫວສະເຫຼີມສະຫຼອງ 50 ປີ ແຫ່ງວັນສ້າງຕັ້ງສູນພັດທະນາຂອງ OECD. ຫວຽດນາມໄດ້ກາຍເປັນສະມາຊິກຂອງສູນດັ່ງກ່າວແຕ່ເດືອນ 3/2008 ແລະ ມີການເຄື່ອນໄຫວຮ່ວມມືຕ່າງໆກັບສູນໃນບັນດາຂົງເຂດທີ່ຕ່າງຝ່າຍຕ່າງມີຄວາມສົນໃຈຄື: ຄົ້ນຄ້ວານະໂຍບາຍພັດທະນາ, ຍົກສູງປະສິດທິຜົນການໜູນຊ່ວຍ, ພັດທະນາແຫຼ່ງຊັບພະຍາກອນມະນຸດ. ໃນ 2 ປີ, 2010 ແລະ 2011 ຫວຽດນາມ ໄດ້ມີການສົມທົບກັນຢ່າງແໜ້ນແຟ້ນກັບສູນດັ່ງກ່າວໃນການພິມຈຳໜ່າຍບັດດາບົດລາຍງານ ແງ່ຫວັງເສດຖະກິດ ອາຊີຕາເວັນອອກສ່ຽງໃຕ້ ສະບັບທຳອິດຂອງ OECD. ທ່ານ Mario Pezzini, ຜູ້ອຳນວຍການສູນ OECD ຮັບຮູ້ວ່າ:
“ຫວຽດນາມ ແມ່ນປະເທດພັດທະນາຢ່າງກ້າວກະໂດດ, ພວມສືບຕໍມີການເຕີບໂຕ, ພັດທະນາທາງດ້ານເສດຖະກິດ, ສັງຄົມເປັນຢ່າງດີ, ສາມາດຊ່ວຍແນະນຳບົດຮຽນຕ່າງໆເພື່ອບັນລຸໄດ້ບັນດາຜົນງານຄືປະຈຸບັນໃຫ້ບັນດາປະເທດ, ດັ່ງນັ້ນ, ກ່ອນອື່ນໝົດ OECD ອາດຈະສ້າງຂອບເຂດໜຶ່ງ ເພື່ອໃຫ້ຫວຽດນາມສາມາດແນະນຳບົດຮຽນຂອງຕົນ ກັບບັນດາປະເທດອື່ນ ແລະ ສ້າງເງື່ອນໄຂໜູນຊ່ວຍບັນດາປະເທດອື່ນຖອດຖອນບົດຮຽນຈາກຫວຽດນາມ”
ຄະນະຜູ້ແທນຫວຽດນາມ ໂດຍທ່ານ ເຢືອງຈີຢູງ, ຜູ້ຊ່ວຍວຽກລັດຖະມົນຕີການຕ່າງປະເທດ, ເອກອັກຄະລັດຖະທູດຫວຽດນາມປະຈຳ ຝຣັ່ງ ນຳໜ້າໄດ້ເຂົ້າຮ່ວມບັນດາການເຄື່ອນໄຫວສະເຫຼີມສະຫຼອງ 50 ປີ ແຫ່ງວັນສ້າງຕັ້ງສູນພັດທະນາ ແລະ ກອງປະຊຸມຂັ້ນສູງເມື່ອວັນທີ 1/3. ເຂົ້າຮ່ວມບັນດາການເຄື່ອນໄຫວຄັ້ງນີ້, ຫວຽດນາມມີຄວາມສົນໃຈເປັນພິເສດເຖິງຮ່າງຍຸດທະສາດພັດທະນາຂອງ OECD ເຊິ່ງຄາດວ່າຈະຮັບຮອງເອົາທີ່ເວທີປາໄສພັດທະນາຂອງ OECD ໃນເດືອນ 5/2012. ຈຸດໝາຍຂອງຍຸດທະສາດແມ່ນໜູນຊ່ວຍບັນດາປະເທດພວມພັດທະນາວາງແຜນຍຸດທະສາດພັດທະນາປະເທດຊາດ, ປະກອບສ່ວນເຂົ້າໃນການພັດທະນາເສດຖະກິດໃນໂລກແບບຍືນຍົງໃນສະຕະວັດທີ 21 ແລະ ປະກອບສ່ວນປະຕິບັດບັນດາເປົ້າໝາຍສະຫັດສະຫວັດ.