(vovworld) - ຕອນເຊົ້າວັນທີ 24/02 (ຕາມເວລາທ້ອງຖິ່ນ), ຢູ່ສຳນັກງານສະຫະປະຊາຊາດ, ທີ່ນະຄອນນິວຢອກ, ປະເທດອາເມລິກາ, ທ່ານເອກອັກຄະລັດຖະທູດ ເລຮ່ວາຍຈຸງ, ຫົວໜ້າຄະນະຜູ້ຕາງໜ້າຫວຽດນາມ ປະຈຳສະຫະປະຊາຊາດ, ໄດ້ເປັນປະທານການເຈລະຈາຂັ້ນສູງໃນຂອບເຂດວາລະປະຊຸມກ່ຽວກັບບັນດາການເຄື່ອນໄຫວພັດທະນາຂອງສະພາເສດຖະກິດສັງຄົມສະຫະປະຊາຊາດ (ECOSOC). ດ້ວຍຫົວຂໍ້ທີ່ວ່າ “ສະພາບສາກົນໃນຂົງເຂດພັດທະນາພວມປ່ຽນແປງ ແລະ ມີຄວາມໝາຍສຳລັບລະບົບສະຫະປະຊາຊາດ”, ການເຈລະຈາຂັ້ນສູງມີຄວາມໝາຍກຳນົດທິດໃຫ້ບັນດາກອງປະຊຸມ ແລະ ການສຳມະນາໃນກອງປະຊຸມຂອງ ECOSOC ທີ່ດຳເນີນໃນ 3 ວັນ ແຕ່ວັນທີ 24 – 26/02. ການເຈລະຈາກ່ຽວຂ້ອງເຖິງຫົວຂໍ້ຂອງລາຍການດຳເນີນງານພັດທະນາພາຍຫຼັງປີ 2015, ດ້ວຍຈຸດສຸມແມ່ນພັດທະນາຢ່າງໝັ້ນຄົງ, ເຂັ້ມແຂງ, ມີຄວາມໝາຍ ແລະ ສົ່ງຜົນກະທົບຄືແນວໃດເຖິງບັນດາການເຄື່ອນໄຫວພັດທະນາຂອງລະບົບສະຫະປະຊາຊາດ...
ທ່ານເອກອັກຄະລັດຖະທູດ ເລຮ່ວາຍຈຸງ ໃຫ້ຮູ້ວ່າ, ນີ້ເປັນເທື່ອທຳອິດທີ່ ECOSOC ຈັດຕັ້ງກອງປະຊຸມສະເພາະກ່ຽວກັບບັນຫາຮ່ວມມືພັດທະນາຂອງສະຫະປະຊາຊາດ. ຢູ່ທີ່ນີ້, ຜູ້ຕາງໜ້າຂອງອົງການຮ່ວມມື ແລະ ພັດທະນາເສດຖະກິດ (OECD) ຢືນຢັນວ່າ ຫວຽດນາມ ແມ່ນໜຶ່ງໃນບັນດາບົດຮຽນທີ່ໄດ້ຮັບຜົນສຳເລັດ. ທ່ານເລຂາທິການໃຫຍ່ສະຫະປະຊາຊາດ Ban Ki Moon ແລະ ການນຳກອງທຶນຕ່າງໆ, ໂຄງການພັດທະນາຂອງສະຫະປະຊາຊາດ ກໍ່ລ້ວນແຕ່ຕີລາຄາສູງບົດບາດຂອງຫວຽດນາມ.
ໃນຂະນະນັ້ນ, ເມື່ອຕີລາຄາກ່ຽວກັບການພັດທະນາ ກໍ່ຄືບົດບາດຂອງຫວຽດນາມ ໃນປະຈຸບັນ, ທ່ານນາງ Kanni Wignaraja, ຜູ້ອຳນວຍການຫ້ອງການປະສານງານຮ່ວມມືພັດທະນາສະຫະປະຊາຊາດ ຖືວ່າ, ຫວຽດນາມ ແມ່ນປະເທດພັດທະນາຢ່າງວ່ອງໄວ, ຍາມໃດກໍ່ມານະພະຍາຍາມຮັກສາຄວາມດູນດ່ຽງ ເພື່ອແນໃສ່ຮັບປະກັນວິວັດການພັດທະນາຢ່າງໝັ້ນຄົງ.