ຫວຽດນາມ ເປັນເຈົ້າການປົກປ້ອງ ແລະ ຊຸກຍູ້ສິດທິມະນຸດ
(VOVWORLD) - ວັນທີ 14 ກໍລະກົດ, ຢູ່ຮ່າໂນ້ຍ, ກະຊວງການຕ່າງປະເທດ ຫວຽດນາມ ໄດ້ສົມທົບກັບ ອົງການພັດທະນາ ສປຊ (UNDP) ຈັດຕັ້ງກອງປະຊຸມສຳມະນາສາກົນກ່ຽວກັບການສ້າງບົດລາຍງານກາງສະໄໝ ກ່ຽວກັບຄວາມສະໝັກໃຈປະຕິບັດບັນດາຂໍ້ສະເໜີແນະຂອງກົນໄກສຳຫຼວດກວດກາປະຈຳໄລຍະ ກ່ຽວກັບສິດທິມະນຸດ ( UPR) ອາຍຸການ ທີ III ຂອງ ສະພາສິດທິມະນຸດ ສປຊ.
 ກອງປະຊຸມສຳມະນາ ຖືກດຳເນີນໃນວັນທີ 14 ກໍລະກົດ ຢູ່ຮ່າໂນ້ຍ (ພາບ: baoquocte.vn) |
ກ່າວຄຳເຫັນທີ່ກອງປະຊຸມສຳມະນາ, ທ່ານ ດັ້ງຮວ່າງຢາງ, ຮອງລັດຖະມົນຕີກະຊວງການຕ່າງປະເທດ ຫວຽດນາມ ໄດ້ຢັ້ງຢືນວ່າ ຫວຽດນາມ ສະໜັບສະໜູນຫຼັກການຍຸຕິທຳ, ໂປ່ງໃສ, ບໍ່ຈຳແນກການປະພຶດ, ສົນທະນາຢ່າງແທ້ຈິງ ແລະຮ່ວມມືກັນຢ່າງມີປະສິດທິຜົນໃນຂົງເຂດສິດທິມະນຸດ. ຫວຽດນາມ ຖືເປັນສຳຄັນ, ເຂົ້າຮ່ວມຢ່າງຄົບຖ້ວນ ແລະ ຍາມໃດກໍເອົາໃຈໃສ່ເຖິງວິວັດທະນາການ UPR ແລະ ໃຫ້ຄຳໝັ້ນສັນຍາຢ່າງແຮງວ່າ ຈະສືບຕໍ່ປະກອບສ່ວນຢ່າງຕັ້ງໜ້າ, ມີຄວາມຮັບຜິດຊອບຕໍ່ວຽກງານຂອງ ສະພາສິດທິມະນຸດ ແລະ ພວມສະໝັກເລືອກຕັ້ງເປັນສະມາຊິກສະພາສິດທິມະນຸດ ສປຊ ອາຍຸການ 2023 – 2025.
ກ່ຽວກັບ ສປຊ, ທ່ານ Kamal Malhotra, ຜູ້ປະສານງານ ສປຊ ປະຈຳ ຫວຽດນາມ ໄດ້ຕີລາຄາວ່າ ຫວຽດນາມ ໄດ້ເປັນເຈົ້າການໃນການຮັບມືກັບບັນດາສິ່ງທ້າທາຍໃນການປົກປ້ອງ ແລະ ຊຸກຍູ້ສິດທິມະນຸດ, ພ້ອມແລ້ວທີ່ຈະຮັບຮອງ ແລະ ມີການກະທຳຜັນຂະຫຍາຍບັນດາຂໍ້ສະເໜີແນະໃນບັນດາຂົງເຂດທີ່ຍັງປະສົບກັບຄວາມຫຍຸ້ງຍາກ.