ຫວຽດນາມຄັດຄ້ານບັນດາການກະທຳລະເມີດຢ່າງຮຸນແຮງ,ພ້ອມທັງເດັດດຽວປົກປັກຮັກສາອະທິປະໄຕປະເທດຊາດ
(vovworld) – ຫວຽດນາມຄັດຄ້ານບັນດາການກະທຳລະເມີດຢ່າງຮຸນແຮງ, ພ້ອມທັງເດັດດຽວປົກປັກຮັກສາອະທິປະໄຕປະເທດຊາດ - ນີ້ແມ່ນຄຳຢັ້ງຢືນຂອງທ່ານນາຍົກລັດຖະມົນຕີ ຫວຽດນາມ ຫງວຽນເຕີນຢູ້ງ ເມື່ອຕອນບ່າຍວັນທີ 15/5, ໃນການພົບປະກັບຜູ້ມີສິດເລືອກຕັ້ງເມືອງ ຮົ່ງບ່າງ, ນະຄອນ ຫາຍຟ່ອງ, ໃນລາຍການພົບປະກັບຜູ້ມີສິດເລືອກຕັ້ງກ່ອນກອງປະຊຸມສະໄໝສາມັນເທື່ອທີ 7, ສະພາແຫ່ງຊາດ ຫວຽດນາມ ຊຸດທີ 13.
ທ່ານນາຍົກລັດຖະມົນຕີ ຫງວຽນເຕີນຢູ້ງ ພົບປະກັບຜູ້ມີສິດເລືອກຕັ້ງເມືອງ ຮົ່ງບ່າງ, ນະຄອນ ຫາຍຟ່ອງ
(ພາບ: dantri.com.vn)
ໂດຍຕາງໜ້າໃຫ້ຄະນະ ສສຊ ນະຄອນ ຫາຍຟ່ອງ, ທ່ານນາຍົກລັດຖະມົນຕີ ຫງວຽນເຕີນຢູ້ງ ສະແດງທັດສະນະຢ່າງຈະແຈ້ງກ່ຽວກັບການເຄື່ອນໄຫວຂອງ ຈີນ ນຳຮ້ານເຈາະນ້ຳມັນນ້ຳເລິກ ພ້ອມກັບກຳ່ປັນຫຼາຍປະເພດ, ໃນນັ້ນມີກຳ່ປັນປະກອບອາວຸດ ແລະ ເຮືອບິນປ້ອງກັນ ແລະ ຕັ້ງຮ້ານເຈາະນ້ຳມັນດັ່ງກ່າວຢູ່ເຂດນອນເລິກກ່ວາ 80 ໄມທະເລໃນເຂດໄຫຼ່ທະວີບ ແລະ ເຂດເສດຖະກິດຈຳເພາະຂອງ ຫວຽດນາມ. ການເຄື່ອນໄຫວດັ່ງກ່າວຂອງ ຈີນ ລະເມີດເຖິງກົດໝາຍສາກົນ, ສົນທິສັນຍາ ສປຊ ກ່ຽວກັບກົດໝາຍວ່າດ້ວຍທະເລ ປີ 1982 ແລະ ຖະແຫຼງການກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ຢ່າງຮ້າຍແຮງ, ນາບຂູ່ໂດຍກົງເຖິງສັນຕິພາບ, ສະຖຽນລະພາບ, ຄວາມສະຫງົບ, ປອດໄພໃນການເດີນທະເລຢູ່ທະເລຕາເວັນອອກ. ທ່ານນາຍົກລັດຖະມົນຕີ ເນັ້ນໜັກວ່າ: ພັກ, ລັດ ຫວຽດນາມ ມີຄວາມລະງັບໃຈທີ່ສຸດ, ສະແດງທຸກເຈດຕະນາດີ ແລະ ນຳໃຊ້ທຸກໆຊ່ອງພົບປະເຈລະຈາ ເພື່ອແລກປ່ຽນກັບຂັ້ນຕ່າງໆຂອງ ຈີນ. ບັນດາກຳລັງປະຕິບັດກົດໝາຍບົນທະເລຂອງ ຫວຽດນາມ ຄືຕຳຫຼວດທະເລ, ກຳລັງກວດກາການປະມົງໃນພື້ນທີ່ຕົວຈິງກໍ່ລະງັບໃຈທີ່ສຸດ, ຄັດຄ້ານ, ຮຽກຮ້ອງ ຈີນ ຖອນຮ້ານເຈາະນ້ຳມັນ ແລະ ບັນດາກຳ່ປັນປະກອບອາວຸດ, ກຳ່ປັນທະຫານອອກຈາກເຂດທະເລຂອງ ຫວຽດນາມ. ເຖິງຢ່າງໃດກໍ່ຕາມ, ຝ່າຍ ຈີນ ບໍ່ພຽງແຕ່ຕອບສະໜອງຕາມຄຳຮຽກຮ້ອງຢ່າງສົມເຫດສົມຜົນຂອງ ຫວຽດນາມ ເທ່ົານັ້ນຫາກຍັງຕູ່ຫາ, ຖີ້ມໂທດ ໃຫ້ ຫວຽດນາມ, ພ້ອມທັງເພີ່ມທະວີກຳ່ປັນປະກອບອາວຸດ ນາບຂູ່, ລະເມີດເຖິງຊັບສົມບັດ ແລະ ກໍ່ປາດແຜໃຫ້ກຳລັງປະຕິບັດກົດໝາຍບົນທະເລຂອງ ຫວຽດນາມ. ທ່ານນາຍົກລັດຖະມົນຕີ ຫງວຽນເຕີນຢູ້ງ ໃຫ້ຮູ້ວ່າ: ຍາມໃດ ຫວຽດນາມ ກໍ່ປາດຖະໜາຢາກພ້ອມກັບ ຈີນ ແກ້ໄຂຄວາມຂັດແຍ້ງກັນດ້ວຍມາດຕະການສັນຕິພາບບົນພື້ນຖານກົດໝາຍສາກົນ, ສະເໝີພາບ ແລະ ເຄົາລົບເຊິ່ງກັນ ແລະ ກັນ ເພື່ອຜົນປະໂຫຍດຂອງ ປະຊາຊົນ 2 ປະເທດ, ເພື່ອສັນຕິພາບ, ສະຖຽນລະພາບຂອງພາກພື້ນ ແລະ ຂອງໂລກ. ທ່ານນາຍົກລັດຖະມົນຕີ ຊີ້ແຈ້ງວ່າ: ຫວຽດນາມ ຄັດຄ້ານບັນດາການກະທຳລະເມີດຢ່າງຮຸນແຮງ, ພ້ອມທັງເດັດດຽວປົກປັກຮັກສາອະທິປະໄຕຂອງປະເທດຊາດ ແລະ ຜົນປະໂຫຍດອັນຊອບທຳຂອງຕົນ ໃຫ້ເໝາະສົມກັບກົດໝາຍສາກົນ. ທ່ານນາຍົກລັດຖະມົນຕີ ຢືນຢັນວ່າ: ຫວຽດນາມ ຍາມໃດກໍ່ເຮັດຈົນສຸດຄວາມສາມາດຂອງຕົນສ້າງທຸກໆເງື່ອນໄຂ ແລະ ຮັບປະກັນຄວາມປອດໄພໃຫ້ແກ່ປະຊາຊົນ, ວິສາຫະກິດ ແລະ ບັນດາອົງການຕ່າງປະເທດຢູ່ ຫວຽດນາມ ຖືກຕາມຂໍ້ກຳນົດຂອງກົດໝາຍ ແລະ ບັນດາຄຳໝັ້ນສັນຍາສາກົນຂອງ ຫວຽດນາມ.