ຫວຽດນາມຕີລາຄາສູງທັດສະນະແລະບົດບາດຂອງລັດເຊຍຢູ່ອາຊີ-ປາຊີຟິກນັບມື້ນັບເພີ່ມຂຶ້ນ
ທ່ານປະທານປະເທດ ເຈີ່ນດ້າຍກວາງ
(ພາບ: quochoi)
(vovworld) - ວັນທີ 23/05 ສຳນັກຂ່າວສານ TASS (ສະຫະພັນ ລັດເຊຍ) ໄດ້ລົງພິມເນື້ອໃນການສຳພາດຂອງທ່ານປະທານປະເທດ ຫວຽດນາມ ເຈີ່ນດ້າຍກວາງ ຕໍ່ສຳນັກຂ່າວສານນີ້. ໃນການຕອບສຳພາດເປັນຄັ້ງທຳອິດຕໍ່ສື່ມວນຊົນຕ່າງປະເທດ, ທ່ານປະທານປະເທດ ເຈີ່ນດ້າຍກວາງ ຢືນຢັນວ່າ: ອາຊີ - ປາຊີຟິກ ແມ່ນໃຈກາງພັດທະນາທີ່ຂະຫຍັນຂັນເຄື່ອນ, ມີທີ່ຕັ້ງພູມສາດດ້ານເສດຖະກິດ - ການເມືອງ, ຍຸດທະສາດນັບມື້ນັບສຳຄັນໃນໂລກ. ທ່ານປະທານປະເທດ ເຈີ່ນດ້າຍກວາງ ຕີລາຄາສູງທີ່ຕັ້ງ ແລະ ບົດບາດຂອງ ລັດເຊຍ ຢູ່ພາກພື້ນ ອາຊີ - ປາຊີຟິກ ນັບມື້ນັບເພີ່ມຂຶ້ນ ກໍ່ຄືບັນດາການປະກອບສ່ວນຂອງ ລັດເຊຍ ຢູ່ APEC ໃນການກໍ່ສ້າງໂຄງປະກອບພາກພື້ນໃຫ້ໝັ້ນຄົງ. ທ່ານປະທານປະເທດ ຫວັງວ່າ ລັດເຊຍ ສືບຕໍ່ເສີມຂະຫຍາຍບົດບາດມະຫາອຳນາດ ແລະ ມີຄວາມຮັບຜິດຊອບໃນການສ້າງໂຄງປະກອບພາກພື້ນ ໂດຍຜ່ານການເຂົ້າຮ່ວມບັນດາກົນໄກຮ່ວມມື ອາຊຽນ - ລັດເຊຍຢ່າງຕັ້ງໜ້າ, ໜູນຊ່ວຍ ອາຊຽນ ເພີ່ມທະວີບົດບາດ ແລະ ປະສິດທິຜົນການເຄື່ອນໄຫວຂອງບັນດາກົນໄກເຈລະຈາ ກໍ່ຄືບັນດາຂອບເຂດກົດໝາຍສາກົນ, ມີສຽງເວົ້າ ແລະ ມີບົດບາດຕັ້ງໜ້າກ່ວາ ໃນການແກ້ໄຂບັນດາສິ່ງທ້າທາຍຄວາມສະຫງົບປອດໄພຢູ່ພາກພື້ນ. ທ່ານປະທານປະເທດ ເຈີ່ນດ້າຍກວາງ ຢືນຢັນວ່າ ໃນໄລຍະຈະມາເຖິງ ດ້ວຍຖານະເປັນສະມາຊິກ ອາຊຽນ, ທັງເປັນຄູ່ຮ່ວມມືດ້ານຍຸດທະສາດຮອບດ້ານຂອງ ລັດເຊຍ, ຫວຽດນາມ ພ້ອມແລ້ວທີ່ຈະເປັນຂົວເຊື່ອມຕໍ່ຊຸກຍູ້ການຮ່ວມມືລະຫວ່າງ ອາຊຽນ ແລະ ລັດເຊຍ ຢ່າງມີປະສິດທິຜົນ ແລະ ຮອບດ້ານ, ຜ່ານນັ້ນ ຍົກສູງບົດບາດຂອງ ຫວຽດນາມ ແລະ ລັດເຊຍ ຢູ່ພາກພື້ນ ອາຊີຕາເວັນອອກສຽງໃຕ້ ກໍ່ຄື ອາຊີ - ປາຊີຟິກ ກ່ວາອີກ, ປະກອບສ່ວນຢ່າງຕັ້ງໜ້າໃຫ້ສັນຕິພາບ, ສະຖຽນລະພາບ, ການພັດທະນາ ແລະ ຄວາມວັດທະນາຖາວອນໃນໂລກ.