ຫວຽດນາມມີຄວາມຮັບຜິດຊອບຕໍ່ບັນດາບັນຫາປ້ອງກັນຄວາມສະຫງົບໃນພາກພື້ນແລະໂລກ
ບັນດາຜູ້ແທນເຂົ້າຮ່ວມກອງປະຊຸມ
(ພາບ: qdnd.vn)
(vovworld) – “ຄວາມສະຫງົບປອດໄພໃຫ້ແກ່ ອາຊຽນ ຖືມະນຸດເປັນໃຈກາງ”. ນັ້ນແມ່ນຫົວຂໍ້ຂອງກອງປະຊຸມສຳມະນາກຸ່ມນັກຊ່ຽວຊານປ້ອງກັນຄວາມສະຫງົບໃນພາກພື້ນ ອາຊີ-ຟາຊີຟິກ ປີ 2015 ໂດຍກະຊວງປ້ອງກັນປະເທດຫວຽດນາມ ແລະ ກອງບັນຊາການຮົບພິເສດ ປາຊີຟິກ-ອາເມລິກາ ສົມທົບກັນຈັດຕັ້ງໃນຕອນເຊົ້າວັນທີ 25/5 ຢູ່ນະຄອນ ດ່ານັ້ງ. ເຂົ້າຮ່ວມກອງປະຊຸມສຳມະນາມີຜູ້ແທນ 90 ຄົນທີ່ມາຈາກ 10 ປະເທດສະມາຊິກ ອາຊຽນ, ຄະນະເລຂາ ອາຊຽນ, ບັນດາປະເທດຄື: ອົດສະຕາລີ, ນິວຊີແລນ, ຍີ່ປຸ່ນ ແລະ ໂມງກົນ. ກອງປະຊຸມສຳມະນາຄັ້ງນີ້ ເພື່ອແນໃສ່ແບ່ງປັນທັດສະນະຂອງ ຫວຽດນາມ ແລະ ສະແດງໃຫ້ເຫັນບົດບາດ, ຄວາມຮັບຜິດຊອບຂອງກອງທັບປະຊາຊົນຫວຽດນາມ ຕໍ່ບັນດາບັນຫາປ້ອງກັນຄວາມສະຫງົບຢູ່ພາກພື້ນ ແລະ ໂລກ ເຊິ່ງຕ່າງຝ່າຍຕ່າງມີຄວາມສົນໃຈ. ທ່ານ ພົນຈັດຕະວາ ໂດ້ແທງບີ່ງ, ຜູ້ບັນຊາເຫຼົ່າຮົບພິເສດ, ກະຊວງປ້ອງກັນປະເທດ ຫວຽດນາມ ໃຫ້ຮູ້ວ່າ:
“ບັນຫາກໍ່ການຮ້າຍ,ຄວາມສະຫງົບປອດໄພບົນທະເລ,ໄພພິບັດທຳມະຊາດ ພວມມີຜົນກະທົບຢ່າງເລິກເຊິ່ງ, ກ້ວາງຂວາງ ຕໍ່ສັນຕິພາບ, ສະຖຽນລະພາບ ແລະ ຄວາມສະຫງົບປອດໄພລວມຂອງແຕ່ລະປະເທດ, ພາກພື້ນ ແລະ ທົ່ວໂລກ. ແກ້ໄຂບັນດາສິ່ງທ້າທາຍດັ່ງກ່າວຮຽກຮ້ອງຄວາມມານະພະຍາຍາມການຮ່ວມມື ແລະ ຄວາມຮັບຜິດຊອບຂອງທຸກປະເທດ, ໃນນັ້ນມີກອງທັບທີ່ສວມບົດບາດສຳຄັນ. ກອງປະຊຸມກໍແມ່ນໂອກາດ ເພື່ອໃຫ້ພວກເຮົາສືບຕໍ່ແບ່ງປັນບັນດາບົດຮຽນໃນພຶດຕິກຳຕົວຈິງ, ຊອກຫາບັນດາມາດຕະການ ເພື່ອຮັບມືກັບສິ່ງທ້າທາຍນາໆປະການ ເພື່ອສັນຕິພາບ, ພັດທະນາ, ວັດຖະນາຖາວອນລວມຂອງພາກພື້ນ ແລະ ໂລກ.”