ພິທີລົງນາມໃນບັນດາບົດບັນທຶກຊ່ວຍຈຳກອງປະຊຸມ
(ພາບ: TTXVN)
(vovworld) – ໃນຂອບເຂດກອງປະຊຸມຂັ້ນລັດຖະມົນຕີ ຫວຽດນາມ - ລາວ - ກຳປູເຈຍ ກ່ຽວກັບການຮ່ວມມືປ້ອງກັນ, ຕ້ານຢາເສບຕິດຄັ້ງທີ 15 ດຳເນີນໄປຢູ່ນະຄອນ ໂຮ່ຈີມິນ, ທີ່ວາລະອັດກອງປະຊຸມໃນວັນທີ 10/12, ຄະນະກຳມະການແຫ່ງຊາດປ້ອງກັນ, ຕ້ານ AIDS ແລະ ປ້ອງກັນ, ຕ້ານໄພຢາເສບຕິດ, ໂສເພນີ ຫວຽດນາມ, ຄະນະກຳມະການແຫ່ງຊາດປ້ອງກັນ, ຕ້ານຢາເສບຕິດ ລາຊະອານາຈັກ ກຳປູເຈຍ ແລະ ສປປ ລາວ ເຫັນດີເປັນເອກະພາບອອກຖະແຫຼງການຮ່ວມ ແລະ ລົງນາມໃນບັນດາບົດບັນທຶກຊ່ວຍຈຳກອງປະຊຸມ.
ຖະແຫຼງການຮ່ວມຂອງກອງປະຊຸມຊີ້ແຈ້ງວ່າ: 3 ປະເທດຈະເພີ່ມທະວີການຜັນຂະຫຍາຍມາດຕະການສະກັດກັ້ນການເຄື່ອນໄຫວຊື້ - ຂາຍ ແລະ ຂົນສົ່ງຢາເສບຕິດຢ່າງຜິດກົດໝາຍບົນເສັ້ນຊາຍແດນ ທັງທາງບົກ, ທາງນ້ຳ ແລະ ທາງອາກາດ; ສົມທົບກັນສືບສວນຮ່ວມຜ່ານຊາຍແດນ…ພ້ອມກັນນັ້ນ, ຍູ້ແຮງການຮ່ວມມືຮອບດ້ານກັບບັນດາປະເທດ ອາຊຽນ ຢ່າງແໜ້ນແຟ້ນ ແລະ ເຂົ້າຮ່ວມກອງປະຊຸມເຈົ້າໜ້າທີ່ຂັ້ນສູງ ອາຊຽນ ກ່ຽວກັບບັນດາບັນຫາຢາເສບຕິດຢ່າງຕັ້ງໜ້າ. ຕາມຖະແຫຼງການຮ່ວມແລ້ວ, ບັນດາຝ່າຍຈະຍົກສູງຄວາມຮັບຮູ້ຂອງປະຊາຊົນ, ພິເສດແມ່ນປະຊາຊົນເຂດຊາຍແດນ, ກ່ຽວກັບໄພຈາກຢາເສບຕິດ ແລະ ອາດຊະຍາກຳ, ກໍ່ສ້າງບັນດາເຂດຊຸມຊົນຊາຍແດນບໍ່ມີຢາເສບຕິດ ແລະ ບໍ່ມີອາດຊະຍາກຳ. ທ່ານພົນໂທ ເລກຸ໋ຍເວືອງ, ລັດຖະມົນຕີຊ່ວຍວ່າການກະຊວງຕຳຫລວດ, ຫົວໜ້າຄະນະ ຫວຽດນາມ ປະທານກອງປະຊຸມ ໃຫ້ຄຳໝັ້ນສັນຍາວ່າ:
“ດ້ວຍບົດບາດເປັນປະທານກອງປະຊຸມຄັ້ງທີ 15, ຫວຽດນາມ ໃຫ້ຄຳໝັ້ນສັນຍາຈະເຮັດຈົນສຸດຄວາມສາມາດຂອງຕົນ ເພື່ອປະຕິບັດບັນດາເນື້ອໃນທີ່ໄດ້ຕົກລົງຢ່າງມີໄຊ. ເພື່ອສຳເລັດໜ້າທີ່ຮັບຜິດຊອບຂອງຕົນ, ຫວຽດນາມ ກໍປາດຖະໜາຢາກໄດ້ຮັບຄວາມເຫັນດີເຫັນພ້ອມ, ການສະໜັບສະນູນ, ການຮ່ວມມືຢ່າງແໜ້ນແຟ້ນຂອງຄະນະກຳມະການແຫ່ງຊາດປ້ອງກັນ ຕ້ານຢາເສບຕິດ ລາຊະອານາຈັກ ກຳປູເຈຍ ແລະ ຄະນະກຳມະການແຫ່ງຊາດປ້ອງກັນ ຕ້ານ ຢາເສບຕິດ ສປປ ລາວ. ດ້ວຍມູນເຊື້ອແຫ່ງການພົວພັນມິດຕະພາບລະຫວ່າງ 3 ປະເທດ ແລະ ຈາກໝາກຜົນກອງປະຊຸມນີ້, ຂ້າພະເຈົ້າເຊື່ອໝັ້ນຢ່າງແນ່ວແນ່ວ່າ: ການຕໍ່ສູ້ປ້ອງກັນ ຕ້ານຢາເສບຕິດຂອງ 3 ປະເທດພວກເຮົາ ຈະບັນລຸໄດ້ບັນດາໝາກຜົນຢ່າງມີໄຊ”
ກອງປະຊຸມຂັ້ນລັດຖະມົນຕີ ຫວຽດນາມ - ລາວ - ກຳປູເຈຍ ກ່ຽວກັບການຮ່ວມມືປ້ອງກັນ, ຕ້ານຢາເສບຕິດຄັ້ງທີ 16 ຈະດຳເນີນຢູ່ ກຳປູເຈຍ ໃນປີ 2016.