ຫວຽດນາມ-ສ.ເກົາຫຼີຮ່ວມມືແກ້ໄຂຜົນຮ້າຍຢ້ອນ
ຫລັງຈາກລະເບີດພາຍຫລັງສົງຄາມ
(ພາບສຳນັກຂ່າວສານຫວຽດນາມ)
(vovworld) - ຕອນບ່າຍວັນທີ 14/06, ຢູ່ຮ່າໂນ້ຍ, ກະຊວງປ້ອງກັນປະເທດ ແລະ ອົງການຮ່ວມມືສາກົນ ສ.ເກົາຫຼີ (KOICA) ປະຈຳ ຫວຽດນາມ ຈັດຕັ້ງພິທີລົງນາມບົດບັນທຶກປຶກສາຫາລືໂຄງການ “ຫວຽດນາມ - ສ.ເກົາຫຼີ ຮ່ວມມືກັນແກ້ໄຂຜົນຮ້າຍຢ້ອນຫລັງຈາກລູກລະເບີດບໍ່ທັນແຕກພາຍຫລັງສົງຄາມ”. ໂຄງການເພື່ອແນໃສ່ຈຸດໝາຍເພີ່ມທະວີກຳລັງຄວາມສາມາດຄຸ້ມຄອງໃນວຽກງານແກ້ໄຂຜົນຮ້າຍຢ້ອນຫລັງຈາກລູກລະເບີດບໍ່ທັນແຕກພາຍຫລັງສົງຄາມ ໂດຍຜ່ານການສ້າງກຳລັງຄວາມສາມາດໃຫ້ສູນເກັບກູ້ລະເບີດຍັງບໍ່ທັນແຕກແຫ່ງຊາດ ຫວຽດນາມ; ຮັບປະກັນຄວາມປອດໄພໃຫ້ປະຊາຊົນ, ປະກອບສ່ວນພັດທະນາເສດຖະກິດ - ສັງຄົມຂອງ ທ້ອງຖິ່ນ ດ້ວຍການສຳຫລວດ ແລະ ມ້າງ ທຳລາຍລູກລະເບີດບໍ່ທັນແຕກຫລັງສົງຄາມໃນເນື້ອທີ່ 8.000 ເຮັກຕາຢູ່ 2 ແຂວງ ບີງດິງ ແລະ ກວາງບີງ. ພ້ອມທັງ ໂຄງການກໍ່ເພື່ອແນໃສ່ຍົກສູງຄວາມຮັບຮູ້ກ່ຽວກັບໄພອັນຕະລາຍຂອງລູກລະເບີດໃຫ້ປະຊາຊົນ ແລະ ໜູນຊ່ວຍບັນດາຜູ້ປະສົບເຄາະຮ້າຍຈາກລູກລະເບີດ ເພື່ອເຊື່ອມຕົວເຂົ້າກັບປະຊາຄົມຄືນໃໝ່; ໜູນຊ່ວຍຍົກສູງວຽກງານແກ້ໄຂຜົນຮ້າຍຢ້ອນຫລັງຈາກລູກລະເບີດບໍ່ທັນແຕກໃນທົ່ວປະເທດຢ່າງມີປະສິດທິຜົນ. ໃນໂຄງການດັ່ງກ່າວ ອົງການຮ່ວມມືສາກົນ ສ.ເກົາຫຼີ ຈະໃຫ້ຊ່ວຍເຫຼືອລ້າແກ່ສູນເກັບກູ້ລະເບີດຍັງບໍ່ທັນແຕກແຫ່ງຊາດ ຫວຽດນາມ ປະມານ 20 ລ້ານ USD ເພື່ອປະຕິບັດໂຄງການດັ່ງກ່າວໃນຮອບເວລາ 5 ປີ, ຄາດວ່ານັບແຕ່ປີ 2016 – 2020.