ທ່ານ ຫວູວັນນິງ ຖະຫວາຍທູບທຽນ ປະທານໂຮ່ຈີມິນ ຢູ່
ສະຖານທູດ ຫວຽດນາມ ປະຈຳ ອັງກິດ (ພາບ: VGP)
(vovworld) – ໃນຂອບເຂດການຢ້ຽມຢາມ ແລະ ເຮັດວຽກຢູ່ລາຊະອານາຈັກ ອັງກິດ, ຕອນຄ່ຳວັນທີ 12/9, ທ່ານຮອງນາຍົກລັດຖະມົນຕີ ຫວູວັນນິງ ໄປຢ້ຽມຢາມ ແລະ ໂອ້ລົມກັບພະນັກງານ, ພາລະກອນສະຖານທູດ ຫວຽດນາມ ປະຈຳ ອັງກິດ ກ່ອນທີ່ເດີນທາງໄປຢ້ຽມຢາມ ແລະ ເຮັດວຽກຢູ່ ສະວິດ. ທ່ານຮອງນາຍົກລັດຖະມົນຕີ ຫວູວັນນິງ ຕີລາຄາສູງຄວາມມານະພະຍາຍາມຂອງບັນດາພະນັກງານ, ພາລະກອນສະຖານທູດ ຫວຽດນາມ ປະຈຳ ອັງກິດ ທີ່ໄດ້ຈັດຕັ້ງບັນດາເຫດການຂອງຄະນະປະຕິບັດງານຢູ່ ລາຊະອານາຈັກ ອັງກິດ ສຳເລັດຜົນ, ເນັ້ນໜັກວ່າ, ບັນດາເຫດການນີ້ໄດ້ສ້າງຄວາມດູດດຶ່ມຕໍ່ລາຊະວົງ, ລັດຖະບານ ອັງກິດ, ດຶງດູດວິສາຫະກິດ, ມະຫາວິທະຍາໄລຂອງອັງກິດ ນັບຮ້ອຍແຫ່ງ ເຂົ້າຮ່ວມ ແລະ ແບ່ງປັນ, ຮ່ວມມືກັບ ຫວຽດນາມ. ທ່ານຮອງນາຍົກລັດຖະມົນຕີ ໃຫ້ຮູ້ວ່າ: ທີ່ບັນດາເຫດການ, ຝ່າຍ ຫວຽດນາມ ແນະນຳກັບບັນດາຄູ່ຮ່ວມມືຂອງ ອັງກິດ ກ່ຽວກັບປະເທດທີ່ມີພົນລະເມືອງ 90 ລ້ານຄົນ, ດ້ວຍກຳລັງຊື້ - ຂາຍນັບມື້ນັບເພີ່ມຂຶ້ນ, ລະບອບການເມືອງມີສະຖຽນລະພາບ, ລັດຖະບານຍືດໝັ້ນບັນດາມາດຕະການຮັກສາເສດຖະກິດມະຫາພາກເປັນປົກຫະຕິ, ຄວບຄຸມໄພເງິນເຟີ້ຢ່າງມີປະສິດທິຜົນ, ພ້ອມທັງ ປ່ຽນໃໝ່, ເຊື່ອມໂຍງຢ່າງເລິກເຊິ່ງ, ກ້ວາງຂວາງເຂົ້າກັບພື້ນຖານເສດຖະກິດສາກົນຢ່າງບໍ່ຢຸດຢັ້ງ. ນີ້ຈະແມ່ນການຮ່ວມມື, ລົງທຶນທີ່ມີປະສິດທິຜົນ ກັບບັນດາວິສາຫະກິດ ອັງກິດ ໃນໄລຍະຈະມາເຖິງ, ພິເສດ ແມ່ນໃນ 3 ຂົງເຂດຮ່ວມມືລະຫວ່າງ ພາກລັດ - ເອກະຊົນ ເພື່ອພັດທະນາໂຄງລ່າງ, ເຂົ້າຮ່ວມການຊື້ - ຂາຍວິສາຫະກິດ ແລະ ຕະຫລາດການເງິນ.