(vovworld) – ວັນທີ 2/7, ຢູ່ ຮ່າໂນ້ຍ, ທ່ານຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດຫວຽດນາມ ຟ້າມບິ່ງມີງ ໄດ້ໃຫ້ການຕ້ອນຮັບທ່ານເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສາທາລະນະລັດ, ປະຊາທິປະໄຕ ແລະ ປະຊາຊົນ ອານເຊຣີ Mohamed Berrah ເນື່ອງໃນໂອກາດທີ່ທ່ານເອກອັກຄະລັດຖະທູດ ເລີ່ມປະຕິບັດໜ້າທີ່ການທູດຢູ່ ຫວຽດນາມ. ທີ່ການຕ້ອນຮັບ, ທ່ານຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດຫວຽດນາມ ຟ້າມບິ່ງມີງ ຢືນຢັນວ່າ: ລັດຖະບານພ້ອມກັບບັນດາກະຊວງ, ຂະແໜງການຂອງຫວຽດນາມ ຈະຮ່ວມມືຢ່າງແໜ້ນແຟ້ນ, ສ້າງທຸກເງື່ອນໄຂສະດວກ ເພື່ອໃຫ້ທ່ານເອກອັກຄະລັດຖະທູດປະຕິບັດສຳເລັດໜ້າທີ່ການທູດເປັນຢ່າງດີ. ທ່ານຮອງນາຍົກລັດຖະມົນຕີ ຟ້າມບິ່ງມີງ ແລະ ທ່ານເອກອັກຄະລັດຖະທູດ Mohamed Berrah ເຫັນດີເປັນເອກະສັນສືບຕໍ່ເພີ່ມທະວີແລກປ່ຽນຄະນະຜູ້ແທນທຸກຂັ້ນ; ສືບຕໍ່ສົມທົບກັນ ແລະ ຮ່ວມມືຢ່າງແໜ້ນແຟ້ນຢູ່ບັນດາເວທີປາໄສພາກພື້ນ ແລະ ສາກົນ; ເພີ່ມທະວີການຮ່ວມມືໃນບັນດາຂົງເຂດ ເຊິ່ງຕ່າງຝ່າຍຕ່າງມີທ່າແຮງຄື: ນ້ຳມັນອາຍແກສ, ການລົງທຶນ, ການຄ້າ ແລະ ແຮງງານ.
ທ່ານເອກອັກຄະລັດຖະທູດ Mohamed Berrah ໃຫ້ຄຳໝັ້ນສັນຍາວ່າ: ຈະມານະພະຍາຍາມປະກອບສ່ວນສືບຕໍ່ພັດທະນາ, ເປີດກ້ວາງການພົວພັນຮ່ວມມື 2 ຝ່າຍຜ່ານການຊຸກຍູ້ການແລກປ່ຽນບັນດາການຢ້ຽມຢາມຂັ້ນສູງ ແລະ ບັນດາກະຊວງ, ຂະແໜງການ 2 ປະເທດ, ກໍຄືການຮ່ວມມື ແລະ ສະໜັບສະໜູນເຊິ່ງກັນ ແລະ ກັນ ລະຫວ່າງອານເຊຣີ -ຫວຽດນາມ ຢູ່ບັນດາອົງການຈັດຕັ້ງສາກົນ ແລະ ເວທີປາໄສຫຼາຍຝ່າຍ. ທ່ານເອກອັກຄະລັດຖະທູດ Mohamed Berrah ຢືນຢັນວ່າ: ທ່ານຈະມານະພະຍາຍາມຈົນສຸດຄວາມສາມາດຂອງຕົນ ເພື່ອປັບປຸງ ແລະ ເຮັດໃຫ້ການພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືຫຼາຍດ້ານລະຫວ່າງ ຫວຽດນາມ ແລະ ອານເຊຣີ ເລິກເຊິ່ງ, ກ້ວາງຂວາງຍິ່ງກ່ວາອີກ.