ທ່ານນາງ ດັ້ງທິງອກທິ້ງ ທີ່ກອງປະຊຸມ
(ພາບ: ສຳນັກຂ່າວສານ ຫວຽດນາມ)
(vovworld) – ວັນທີ 18/7, ທີ່ວາລະປະຊຸມຂັ້ນສູງຂອງສະພາເສດຖະກິດ - ສັງຄົມ ສປຊ (ECOSOC) ໄດ້ໄຂຂຶ້ນທີ່ສຳນັກງານ ສປຊ ຢູ່ນິວຢອກ, ປະເທດ ອາເມລິກາ. ນີ້ແມ່ນວາລະປະຊຸມຂັ້ນສູງຄັ້ງທຳອິດຂອງ ECOSOC ທີ່ ຫວຽດນາມ ໄດ້ເຂົ້າຮ່ວມດ້ວຍຖານະເປັນສະມາຊິກອາຍຸການ 2016 – 2018. ຄະນະຜູ້ແທນ ຫວຽດນາມ ໂດຍທ່ານນາງຮອງປະທານປະເທດ ດັ້ງທິງອກທິ້ງ ນຳໜ້າ. ວາລະປະຊຸມປີນີ້ໄດ້ປຶກສາຫາລືກ່ຽວກັບບັນດາມາດຕະການເພື່ອຫັນບັນດາຄຳໝັ້ນສັນຍາຂອງໂຄງການດຳເນີນງານ 2030 ກ່ຽວກັບການພັດທະນາແບບຍືນຍົງ, ໃນນັ້ນສຸມໃສ່ເຂົ້າຫົວຂໍ້ “ບໍ່ໃຫ້ຜູ້ໃດຖືກປະໄວ້ທາງຫຼັງ”.
ກ່າວຄຳເຫັນທີ່ວາລະປະຊຸມຂັ້ນສູງ, ທ່ານນາງຮອງປະທານປະເທດ ດັ້ງທິງອກທິ້ງ ເນັ້ນໜັກເຖິງຄວາມຈຳເປັນຕ້ອງປ່ຽນແປງຈີນຕະນາການພັດທະນາ, ພິເສດແມ່ນຍາມໃດກໍ່ຮັບປະກັນການສົມທົບກັນຢ່າງຄົບຖ້ວນ ແລະ ກົມກຽວທັງ 3 ເສົ້າຄ້ຳເສດຖະກິດ, ສັງຄົມ ແລະ ສິ່ງແວດລ້ອມ. ທ່ານນາງ ດັ້ງທິງອກທິ້ງ ຢັ້ງຢືນວ່າ: ຫວຽດນາມ ໃຫ້ຄຳໝັ້ນສັນຍາສືບຕໍ່ປະກອບສ່ວນຕັ້ງໜ້າເຂົ້າໃນວຽກງານລວມຂອງ ECOSOC ແລະ ຊຸກຍູ້ການປະຕິບັດໂຄງການດຳເນີນງານ 2030 ກ່ຽວກັບການພັດທະນາແບບຍືນຍົງຢ່າງເຂັ້ມງວດ ດ້ວຍຄວາມຕັດສິນໃຈດ້ານການເມືອງສູງສຸດ.
ແລະກໍ່ໃນວັນດຽວກັນ, ເມື່ອເຂົ້າຮ່ວມງານວາງສະແດງກ່ຽວກັບສິ່ງແວດລ້ອມ “ສຽງຮ້ອງຈາກທຳມະຊາດ”, ທ່ານນາງ ດັ້ງທິງອກທິ້ງ ຮຽກຮ້ອງໃຫ້ບັນດາປະເທດ, ສປຊ, ບັນດາອົງການຈັດຕັ້ງສາກົນ ແລະ ປະຊາຊົນທຸກຄົນຈົ່ງເຄົາລົບ, ຕິດພັນ ແລະ ປົກປັກຮັກສາທຳມະຊາດ.