ອັງກິດ ເປັນປະທານກອງປະຊຸມສຸດຍອດ ການຄໍ້າປະກັນດ້ານສະບຽງອາຫານທົ່ວໂລກ
(VOVWORLD) - ທ່ານນາຍົກລັດຖະມົນຕີ ອັງກິດ Sunak ໄດ້ຍົກອອກບາງຂໍ້ລິເລີ່ມສຳລັບການຄ້ຳປະກັນດ້ານສະບຽງອາຫານທົ່ວໂລກ, ເປັນຕົ້ນແມ່ນ: ສ້າງຕັ້ງສູນວິທະຍາສາດອອນໄລ ເພື່ອແນໃສ່ພັດທະນາບັນດາແນວພັນປູກທີ່ມີຄວາມທົນທານກັບຜົນກະທົບຂອງດິນຟ້າອາກາດ ແລະ ຮັບມືກັບພະຍາດໄດ້ເປັນຢ່າງດີກວ່າ.
 ທ່ານນາຍົກລັດຖະມົນຕີ ອັງກິດ Rishi Sunak ກ່າວຄຳເຫັນທີ່ພິທີໄຂກອງປະຊຸມ (ພາບ: Dan Kitwood/Getty) |
ວັນທີ 20 ພະຈິກ, ຢູ່ນະຄອນຫຼວງ ລອນດອນ, ອັງກິດ ໄດ້ເປັນປະທານ ແລະ ເປັນເຈົ້າພາບຈັດຕັ້ງກອງປະຊຸມສຸດຍອດ ການຄ້ຳປະກັນດ້ານສະບຽງອາຫານທົ່ວໂລກຢູ່ສຳນັກງານ Lancaster. ກອງປະຊຸມຖືກຈັດຂຶ້ນຕາມຂໍ້ລິເລີ່ມຂອງທ່ານນາຍົກລັດຖະມົນຕີ ອັງກິດ Rishi Sunak ທີ່ໄດ້ຍົກອອກມາໃນເດືອນກັນຍາຜ່ານມາ, ພາຍຫຼັງທີ່ ລັດເຊຍ ຖະແຫຼງຖອນຕົວອອກຈາກຂໍ້ລິເລີ່ມທັນຍາພືດທະເລດຳ, ດ້ວຍການເຂົ້າຮ່ວມຂອງຜູ້ຕາງໜ້າທີ່ມາຈາກ 20 ປະເທດ ແລະ ບັນດາອົງການຈັດຕັ້ງສາກົນ.
ໃນກອງປະຊຸມ, ທ່ານນາຍົກລັດຖະມົນຕີ ອັງກິດ Sunak ໄດ້ຍົກອອກບາງຂໍ້ລິເລີ່ມສຳລັບການຄ້ຳປະກັນດ້ານສະບຽງອາຫານທົ່ວໂລກ, ເປັນຕົ້ນແມ່ນ: ສ້າງຕັ້ງສູນວິທະຍາສາດອອນໄລ ເພື່ອແນໃສ່ພັດທະນາບັນດາແນວພັນປູກທີ່ມີຄວາມທົນທານກັບຜົນກະທົບຂອງດິນຟ້າອາກາດ ແລະ ຮັບມືກັບພະຍາດໄດ້ເປັນຢ່າງດີກວ່າ. ເນື່ອງໃນໂອກາດນີ້, ທ່ານນາຍົກລັດຖະມົນຕີ Sunak ກໍປະກາດປຶ້ມປົກຂາວພັດທະນາສາກົນໃໝ່ ກ່ຽວກັບສະພາບຂາດສະບຽງອາຫານ, ຍົກອອກວິທີເຊິ່ງ ອັງກິດຈະຮ່ວມມືກັບບັນດາປະເທດເພື່ອແກ້ໄຂສະພາບອຶດຫິວ ແລະ ການປ່ຽນແປງຂອງດິນຟ້າອາກາດ.