(vovworld) – ຕອນບ່າຍວັນທີ 19/9, ຢູ່ນະຄອນຫຼວງວຽງຈັນ, ກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນຄັ້ງທີ 35 (AIPA 35) ໄດ້ອັດລົງຢ່າງຈົບງາມ. ພາຍຫຼັງດຳເນີນມາເປັນເວລາ 5 ວັນ, ບັນດາປະເທດສະມາຊິກ AIPA 35 ໄດ້ເປັນເອກະພາບນຳກັນໃນຫຼາຍບັນຫາລວມກ່ຽວກັບເສດຖະກິດ, ການເມືອງ, ວັດທະນະທຳ, ສັງຄົມ. AIPA 35 ໄດ້ອອກແຈ້ງການຮ່ວມໂດຍຊີ້ແຈ້ງວ່າ : ຊຸກຍູ້ການຮ່ວມມືລັດຖະສະພາໃນການກໍ່ສ້າງປະຊາຄົມປ້ອງກັນຄວາມສະຫງົບ, ການເມືອງອາຊຽນ, ເພີ່ມທະວີການຮ່ວມມືລະຫວ່າງ ບັນດາປະເທດສະມາຊິກ AIPA ເພື່ອໂຕ້ຕອບກັບໂລກລະບາດ Ebola , ເພີ່ມທະວີການຮ່ວມມືລັດຖະສະພາພາຄີເພື່ອປ້ອງກັນ ແລະ ຄວບຄຸມໂລກລະບາດບໍ່ຕິດແປດ, ປັບປຸງຊຸກຍູ້ການສອນວິຊາຊີບ; ຊຸກຍູ້ຍຸດທະສາດການເຕີບໂຕ ແລະ ພັດທະນາຂຽວໃນອາຊຽນ, ຊຸກຍູ້ວິສາຫະກິດ.......
ກ່ອນໜ້ານັ້ນຄື ຕອນບ່າຍວັນທີ 18/9, ຄະນະກຳມາທິການແຈ້ງການຮ່ວມຂອງກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດ ບັນດາປະເທດ ອາຊີຕາເວັນອອກສ່ຽງໃຕ້ ຄັ້ງທີ 35 (AIPA – 35) ໄດ້ດຳເນີນການປຶກສາຫາລື ແລະ ປະກອບຄຳເຫັນໃສ່ແຈ້ງການຮ່ວມກ່ອນທີ່ຍື່ນສະເໜີຮັບຮອງເອົາທີ່ວາລະອັດກອງປະຊຸມ. ແຈ້ງການຮ່ວມຊີ້ແຈ້ງບັນດາເນື້ອໃນຢ່າງຄົບຖ້ວນ, ເຊິ່ງລວມມີການສະຫລຸບບົດກ່າວປາໄສຂອງບັນດາຫົວໜ້າຄະນະຜູ້ແທນບັນດາປະເທດສະມາຊິກ AIPA – 35 ທີ່ກອງປະຊຸມຄົບຄະນະຄັ້ງທີ 1, ບັນດາເນື້ອໃນປຶກສາຫາລື ແລະ ມະຕິໄດ້ຍົກອອກມາທີ່ກຳມາທິການສະມາຊິກສະພາແຫ່ງຊາດຍິງ AIPA, ກຳມາທິການກ່ຽວກັບບັນດາບັນຫາການເມືອງ, ກຳມາທິການກ່ຽວກັບບັນດາບັນຫາເສດຖະກິດ, ກຳມາທິການບັນດາບັນຫາການຈັດຕັ້ງ, ກຳມາທິການບັນດາບັນຫາສັງຄົມ. ມະຕິຂອງກຳມາທິການກ່ຽວກັບບັນຫາການເມືອງສະໜັບສະໜູນບັນດາຄຳໝັ້ນສັນຍາຂອງ ອາຊຽນ ເພື່ອແນໃສ່ເພີ່ມທະວີບັນດາຄວາມມານະພະຍາຍາມໃນການຮ່ວມມືດ້ານປ້ອງກັນຄວາມສະຫງົບການເມືອງ ແລະ ຜັນຂະຫຍາຍປະຕິບັດການຫັນປະຊາຄົມປ້ອງກັນຄວາມສະຫງົບການເມືອງ (APSC) ໃນປີ 2015 ປະກົດຜົນເປັນຈິງ. ພິເສດ, ກຳມາທິການ ເນັ້ນໜັກຄວາມສຳຄັນຂອງການຮັກສາສັນຕິພາບ, ສະຖຽນລະພາບ, ຄວາມປອດໄພການເດີນເຮືອຢູ່ທະເລຕາເວັນອອກ ແລະ ຮຽກຮ້ອງໃຫ້ທຸກໆຝ່າຍກ່ຽວຂ້ອງລະງັບໃຈ, ແກ້ໄຂຄວາມຂັດແຍ້ງດ້ວຍມາດຕະການໂດຍສັນຕິວິທີ, ບໍ່ນຳໃຊ້ອາວຸດ, ເຄົາລົບກົດໝາຍສາກົນ.