ກອງປະຊຸມຄັ້ງທີ 4 ຄະນະບໍລິຫານງານສູນກາງພັກກອມມູນິດຫວຽດນາມຊຸດທີ 11 ໄດ້ອັດລົງໃນຕອນເຊົ້າວັນທີ 31/12, ພາຍຫຼັງເຮັດວຽກດ້ວຍຄວາມຮີບດ່ວນ, ເຂັ້ມງວດ, ມີຈິດໃຈປ່ຽນໃໝ່, ແທດຈິງມາເປັນເວລາ 6 ວັນ. ກ່າວປາໄສອັດກອງປະຊຸມ, ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ໋ຈ້ອງ ຊີ້ແຈງວ່າ: ກອງປະຊຸມໄດ້ສະແດງນ້ຳໃຈຮັບຜິດຊອບສູງ, ເສີມຂະຫຍາຍປະຊາທິປະໄຕ, ສະຕິປັນຍາ, ປຶກສາຫາລືຢ່າງກົງໄປກົງມາ, ປະກອບຄຳຄິດຄຳເຫັນສຳຄັນຫຼາຍຢ່າງເຂົ້າໃນບັນດາແຜນຮ່າງ, ບົດລາຍງານ. ກົມການເມືອງສູນກາງພັກໄດ້ຮັບຮູ້ ແລະ ໃຫ້ຄຳຕອບຕໍ່ບັນດາບັນຫາທີ່ມີຄຳເຫັນແຕກຕ່າງກັນ. ໃນບົດກ່າວປາໄສ, ທ່ານເລຂາທິການໃຫຍ່ ຫງວຽນຟູ໋ຈ້ອງ ເນັ້ນໜັກເຖິງ 2 ບັນຫາ, ນັ້ນແມ່ນປຸກລະດົມທຸກໆ ແຫຼ່ງກຳລັງເພື່ອລົງທຶນກໍ່ສ້າງລະບົບໂຄງປະກອບໂຄງລ່າງ, ຕອບສະໜອງຄວາມຕ້ອງການຫັນເປັນອຸດສາຫະກຳ ແລະ ທັນສະໄໝໄລຍະ 2011 – 2020 ແລະ ບາງບັນຫາຮີບດ່ວນກ່ຽວກັບການກໍ່ສ້າງພັກໃນປະຈຸບັນ. ກ່ຽວກັບການລົງທຶນກໍ່ສ້າງລະບົບໂຄງປະກອບໂຄງລ່າງ, ທ່ານເລຂາທິການໃຫຍ່ ຫງວຽນຟູ໋ຈ້ອງເນັ້ນໜັກວ່າ:
“ທີ່ກອງປະຊຸມ, ຄະນະບໍລິຫານງານສູນກາງພັກໄດ້ປະກາດໃຊ້ມະຕິເພື່ອ ຊີ້ນຳ, ນຳພາ ການພັດທະນາໂຄງປະກອບໂຄງລ່າງແຕ່ນີ້ຮອດປີ 2020. ພັດທະນາລະບົບໂຄງປະກອບໂຄງລ່າງເສດຖະກິດ, ສັງຄົມລະຫວ່າງບັນດາຂະແໜງການຢ່າງຄົບຊຸດ, ຫັນເປັນທັນສະໄໝໃນຂອບຂະໜາດທົ່ວປະເທດເທື່ອລະກ້າວ. ມີກົນໄກ, ນະໂຍບາຍປຸກລະດົມທຸກໆແຫຼ່ງກຳລັງຂອງສັງຄົມ, ຮັບປະກັນຜົນປະໂຫຍດຢ່າງເໝາະສົມ ເພື່ອດຶງດູດບັນດານັກລົງທຶນ, ນັບທັງນັກລົງທຶນຕ່າງປະເທດ ”
ກ່ຽວກັບບາງບັນຫາຮີບດ່ວນໃນການກໍ່ສ້າງພັກໃນປະຈຸບັນ, ທ່ານເລຂາທິການໃຫຍ່ ຫງວຽນຟູ໋ຈ້ອງ ຊີ້ແຈງວ່າ:
“ພັກເຮົາພວມຍື່ນຕໍ່ໜ້າຫຼາຍບັນຫາໃໝ່ຕ້ອງໄດ້ຮັບການແກ້ໄຂ, ມີຫຼາຍວຽກງານສັບສົນທີ່ສຸດ. ໃນສະພາບການນັ້ນ, ຖ້າພັກເຮົາບໍ່ໝັ້ນຄົງທາງດ້ານການເມືອງ, ແນວຄິດ, ບໍ່ເປັນເອກະພາບກັນຢ່າງສູງກ່ຽວກັບເຈດຈຳນົງ, ການກະທຳ... ແມ່ນບໍ່ສາມາດນຳພາ ແລະ ນຳປະເທດຊາດສືບຕໍ່ກ້າວຂຶ້ນໄດ້. ດັ່ງນັ້ນ, ໃນຄັ້ງນີ້ສູນກາງພັກຕັດສິນໃຈຕ້ອງສືບຕໍ່ດຳເນີນການປັບປຸງ, ກໍ່ສ້າງພັກດ້ວຍຈິດໃຈຕັ້ງໜ້າ ແລະ ໝັ້ນຄົງກ່ວາ, ແຂງແຮງກ່ວາ, ເພື່ອແນໃສ່ສ້າງບາດກ້າວປ່ຽນແປງໃໝ່ໃນທຸກດ້ານ, ສະກັດກັ້ນ ແລະ ຍູ້ການເສື່ອມທາດຂາດຄຸນຖອຍໄປ, ເພີ່ມທະວີສາຍພົວພັນຢ່າງສະໜິດແໜ້ນກັບ ປະຊາຊົນ, ຍົກສູງກຳລັງຄວາມສາມາດນຳພາ ແລະ ກຳລັງຕໍ່ສູ້ຂອງພັກ, ຖືນີ້ແມ່ນບັນຫາເປັນຕາຍຂອງພັກເຮົາ, ຂອງລະບອບເຮົາ”