ຮອງນາຍົກລັດຖະມົນຕີ ຫວູດຶກດາມ ເຂົ້າຮ່ວມ ກອງປະຊຸມຍ້ອງຍໍຜູ້ມີຄຸນງາມຄວາມດີ
ກອງປະຊຸມທົ່ວປະເທດຍ້ອງຍໍບັນດາຜູ້ມີຄຸນງາມຄວາມດີ
ທີ່ເຂົ້າຮ່ວມບັ້ນຮົບໂຮ່ຈິມິນ - ລະດູບານໃໝ່ 1975
(ພາບ: congan.com.vn)
(vovworld) – ກອງປະຊຸມທົ່ວປະເທດຍ້ອງຍໍບັນດາຜູ້ມີຄຸນງາມຄວາມດີທີ່ເຂົ້າຮ່ວມບັ້ນຮົບໂຮ່ຈິມິນ - ລະດູບານໃໝ່ 1975, ຖືກໄຂຂຶ້ນໃນຕອນເຊົ້າວັນທີ 14/04, ຢູ່ນະຄອນໂຮ່ຈິມິນ. ດ້ວຍການເຂົ້າຮ່ວມຂອງບັນດາທະຫານເຈັບປ່ວຍ ແລະ ເສຍອົງຄະ, ຍາດຕິພີນ້ອງຂອງນັກຮົບເສຍສະຫຼະຊີວິດເພື່ອຊາດ ແລະ ຜູ້ມີຄຸນງາມຄວາມດີໃນການຕໍ່ສູ້ຕ້ານຈັກກະພັດອາເມລິກາ ກູ້ຊາດ, ບັນດາຕົວພະຍານປະຫວັດສາດເຂົ້າຮ່ວມບັ້ນຮົບໂຮ່ຈິມິນ ກວ່າ 300 ຄົນ. ທີ່ກອງປະຊຸມ, ການນຳພັກ, ລັດ ໄດ້ຍ້ອງຍໍ ແລະ ສະແດງຄວາມຮູບຸນຄຸນຢ່າງເລິກເຊິ່ງສຳລັບການເສຍສະຫຼະຊີວິດ ແລະ ການປະກອບສ່ວນອັນໃຫຍ່ຫຼວງເພື່ອເອກະລາດ, ເສລີພາບຂອງຊາດ, ຂອງແມ່ຫວຽດນາມ ວິລະຊົນ, ບັນດານັກຮົບທີ່ເສຍສະຫຼະຊີວິດເພື່ອຊາດ, ທະຫານເຈັບປ່ວຍ ແລະ ເສຍອົງຄະ, ຜູ້ມີຄຸນງາມຄວາມດີ, ຄອບຄົວເປົ້າໝາຍນະໂຍບາຍ. ທ່ານຮອງນາຍົກລັດຖະມົນຕີຫວຽດນາມ ຫວູດຶກດາມ ເນັ້ນໜັກວ່າ.
“ທຸກຄົນລ້ວນແຕ່ເຫັນໄດ້ເຖິງຄວາມເອກອ້າງຖະນົງໃຈຂອງຊາດ, ຄວາມຮູ້ບຸນຄຸນຢ່າງເລິກເຊິ່ງສຳລັບບັນດາລຸ້ນພໍ່, ລຸ້ນອ້າຍ ແລະ ເພີ່ມຄວາມຕັດສິນໃຈສ້າງສາ ແລະ ປົກປັກຮັກສາປະເທດຊາດ. ຊາວຫວຽດນາມ ບໍ່ຈັກວ່າເທົ່າໃດໄດ້ເສຍສະຫຼະຊີວິດເພື່ອຊາດເພື່ອນຳຊີວິດໃໝ່ມາສູ່ພວກເຮົາ”
ເສີມຂະຫຍາຍມູນເຊື້ອກິນເຂົ້າຄິດຮອດຄຸນນາ, ກິນປາຄິດຮອດຄຸນນ້ຳ ຂອງຊາດ, ຂະບວນການຕອບບຸນແທນຄຸນ ໃນຕະຫຼອດໄລຍະ 5 ປີຜ່ານມາ, ໄດ້ລະດົມຈຳນວນເງິນກວ່າ 1.500 ຕື້ດົງ ຈາກປະຊາຊົນ ເພື່ອເບິ່ງແຍງຊີວິດການເປັນຢູ່ໃຫ້ແກ່ຜູ້ມີຄຸນງາມຄວາມດີ, ປະຕິບັດການກໍ່ສ້າງໃໝ່ ແລະ ສ້ອມແປງເຮືອນຊານນັບພັນຫຼັງໃຫ້ຄອບຄົວເປົ້າໝາຍນະໂຍບາຍ.