ຮອງປະທານປະເທດຫງວຽນທິຢວານເຂົ້າຮ່ວມກອງປະຊຸມສຸດຍອດCICA
(ພາບ: TTXVN)
(vovworld) – ກອງປະຊຸມສຸດຍອດຄັ້ງທີ 4 ກ່ຽວກັບການສົມທົບກັນເຄື່ອນໄຫວ ແລະ ບັນດາມາດຕະການສ້າງຄວາມໄວ້ເນື້ອເຊື່ອໃຈ ອາຊີ (CICA) ໄດ້ຈັດຕັ້ງໃນວັນທີ 21/5, ຢູ່ ຊຽງໄຮ, ປະເທດ ຈີນ. ກ່າວຄຳເຫັນທີ່ກອງປະຊຸມ, ທ່ານນາງຮອງປະທານປະເທດ ຫງວຽນທິຢວານ ຮຽກຮ້ອງບັນດາປະເທດ ອາຊີ ພ້ອມກັນຊຸກຍູ້ການໂອ້ລົມສົນທະນາ, ສ້າງຄວາມໄວ້ເນື້ອເຊື່ອໃຈ ແລະ ການຮ່ວມມື ເພື່ອແນໃສ່ປະຕິບັດຄວາມມຸ່ງມາດປາດຖະໜາລວມຂອງປະຊາຊົນ ອາຊີ ແມ່ນສັນຕິພາບ, ສະຖຽນລະພາບ ແລະ ພັດທະນາ. ທ່ານນາງຮອງປະທານປະເທດ ຫງວຽນທິຢວານ ຢັ້ງຢືນມີຄວາມໄວ້ເນື້ອເຊື່ອໃຈ ຈຶ່ງມີສັນຕິພາບ, ສະຖຽນລະພາບ, ມີສັນຕິພາບ, ສະຖຽນລະພາບ ຍາວນານຈຶ່ງມີການພັດທະນາແບບຍືນຍົງ, ພ້ອມທັງ, ຄວາມໄວ້ເນື້ອເຊື່ອໃຈຕ້ອງໄດ້ຮັບການສ້າງສາຜ່ານບັນດາຄຳໝັ້ນສັນຍາ ແລະ ການເຄື່ອນໄຫວສະເໝີຕົ້ນສະເໝີປາຍຂອງບັນດາປະເທດ, ເໝາະສົມກັບບັນດາມາດຖານລວມ, ນັ້ນແມ່ນປະຕິບັດຕາມກົດບັດ ສປຊ ແລະ ກົດໝາຍສາກົນ. ທ່ານນາງຮອງປະທານປະເທດ ເນັ້ນໜັກວ່າ: ຖະແຫຼງການຂອງກອງປະຊຸມສຸດຍອດ CICA ຊີ້ແຈ້ງ: ສອດຄ່ອງກັບກົດບັດ ສປຊ ແລະ ບັນດາຫຼັກການຂອງກົດໝາຍສາກົນ, ບັນດາປະເທດຢືນຢັນເຄົາລົບນັບຖືອະທິປະໄຕ, ເສລີພາບ, ຜືນແຜ່ນດິນອັນຄົບຖ້ວນຂອງກັນ, ລະງັບໃຈບໍ່ນາບຂູ່ ຫຼື ນຳໃຊ້ອາວຸດໃນການພົວພັນສາກົນ, ແກ້ໄຂບັນດາການຂັດແຍ້ງໂດຍສັນຕິວິທີ. ບົນພື້ນຖານນັ້ນ, ຫວຽດນາມ ປາດຖະໜາບັນດາຄວາມບໍ່ລົງລອຍກັນ ແລະ ການຂັດແຍ້ງກັນໃນປະຈຸບັນຢູ່ພາກພື້ນແກ້ໄຂຕາມຈິດໃຈດັ່ງກ່າວ. ກ່ຽວກັບບັນຫາທະເລຕາເວັນອອກ, ທ່ານນາງຮອງປະທານປະເທດ ຫງວຽນທິຢວານ ຢືນຢັນເຈດຕະນາດີຂອງ ຫວຽດນາມ ຊຸກຍູ້ແກ້ໄຂບັນດາການຂັດແຍ້ງດ້ວຍມາດຕະການສັນຕິພາບ, ສອດຄ່ອງກັບກົດໝາຍສາກົນ, ສົນທິສັນຍາຂອງ ສປຊ ກ່ຽວກັບກົດໝາຍວ່າດ້ວຍທະເລປີ 1982 ແລະ ຖະແຫຼງການກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ (DOC).
ຢູ່ນອກກອງປະຊຸມ, ທ່ານນາງຮອງປະເທດປະເທດ ຫງວຽນທິຢວານ ແບ່ງປັນຄວາມເສົ້າສະລົດໃຈກັບຫົວໜ້າຄະນະຜູ້ແທນ ລາວ ກ່ຽວກັບຄວາມເສຍຫາຍອັນໃຫຍ່ຫຼວງຂອງປະເທດເພື່ອນມິດຍ້ອນອຸປະບັດຕິເຫດເຮືອບິນຕົກໃນເວລາຜ່ານມາ. ໃນການພົບປະກັບທ່ານນາຍົກລັດຖະມົນຕີ ກຳປູເຈຍ Hunsen, 2 ຝ່າຍໄດ້ແລກປ່ຽນກ່ຽວກັບບັນດາມາດຕະການເພີ່ມທະວີຄວາມສາມັກຄີ, ນຳການພົວພັນ 2 ປະເທດກ້າວເຂົ້າສູ່ລວງເລິກ, ມີປະສິດທິຜົນ ແລະ ແທດຈິງ.