(vovworld) – ວັນທີ 1/10, ອະດີດນາຍົກລັດຖະມົນຕີ ນອກແວ ທ່ານ Jens Stoltenberg ໄດ້ກາຍເປັນເລຂາທິການໃຫຍ່ຄົນໃໝ່ຂອງອົງການນາໂຕ. ກ່າວຄຳເຫັນພາຍຫຼັງພິທີດຳລົງຕຳແໜ່ງ, ທ່ານ Stoltenberg ຮຽກຮ້ອງໃຫ້ ລັດເຊຍ ປ່ຽນແປງທ່າທີ, ກໍ່ຄືການກະທຳຢູ່ ເອີລົບຕາເວັນອອກ, ພິເສດແມ່ນຢູ່ ຢູແກຼນ. ທ່ານກໍ່ຢັ້ງຢືນວ່າ: ນາໂຕ ພ້ອມແລ້ວທີ່ຈະເຊື່ອມຕໍ່ການພົວພັນທີ່ມີລັກສະນະສ້າງສັນກັບ ລັດເຊຍ. ທີ່ການສະເໜີຕົວຕໍ່ວົງການນັກຂ່າວພາຍຫຼັງພິທີຮັບດຳລົງຕຳແໜ່ງຢູ່ສຳນັກງານຕົ້ນຕໍຂອງ ນາໂຕ, ທ່ານ Jens Stoltenberg ຖືວ່າ: ວິກິດການຢູ່ ຢູແກຼນ ແມ່ນການທ້າທາຍອັນໃຫຍ່ຫຼວງ ສຳລັບຄວາມສະຫງົບຂອງ ເອີລົບ ແລະ ມະຫາສະໝຸດອັດລັງຕິກ. ທ່ານກໍ່ຖະແຫຼງວ່າຈະສືບຕໍ່ສະໜັບສະໜູນ ຢູແກຼນ ເອກະລາດ, ມີຜືນແຜ່ນດິນອັນຄົບຖ້ວນ ແລະ ທີ່ສະຖຽນລະພາບ.
ທ່ານເລຂາທິການໃຫຍ່ Stoltenberg ຖະແຫຼງວ່າ: ນາໂຕ ບໍ່ຊອກຫາວິທີປະທະກັນກັບ ລັດເຊຍ ແຕ່ບໍ່ອາດສາມາດ ແລະ ຈະບໍ່ປະນິປະນອມຕໍ່ບັນດາຫຼັກການເຊິ່ງສຳພັນທະມິດການທະຫານນີ້ ກໍ່ຄືປ້ອງກັນຄວາມສະຫງົບຢູ່ ເອີລົບ ແລະ ອາເມລິກາ ເໜືອ ໄດ້ວາງອອກ, ດ້ວຍເລື່ອງຄັດສະເໜີມາດຕາທີ 5 ຂອງ ສົນທິສັນຍາ ວໍຊິງຕັນ ກ່ຽວກັບການປ້ອງກັນລວມໝູ່.