(vovworld) – ວັນທີ 18/01, ຢູ່ນະຄອນ ເຊີແນວ, ປະເທດສະວິດ, ຜູ້ຕາງໜ້າຂອງອີຣານ ແລະ ກຸ່ມ P5+1 (ເຊິ່ງລວມມີ 5 ປະເທດກຳມະການປະຈຳສະພາຄວາມໝັ້ນຄົງສປຊ ແມ່ນ: ອາເມລິກາ, ອັງກິດ, ຝຣັ່ງ, ລັດເຊຍ, ຈີນ ແລະ ເຢຍລະມັນ) ເລີ່ມຕົ້ນຮອບເຈລະຈາໃໝ່ຂັ້ນລັດຖະມົນຕີຊ່ວຍວ່າການກະຊວງການຕ່າງປະເທດ ກ່ຽວກັບໂຄງການນິວເຄຼຍຂອງອີຣານ. ຮອບເຈລະຈາດຳເນີນໄປພຽງໃນວັນທີ 18/01 ແລະ ເລີ່ມຕົ້ນດ້ວຍການສະຫຼຸບບັນດາໝາກຜົນທີ່ບັນລຸໄດ້ຈາກການພົບປະ 2 ຝ່າຍໃນ 2 ວັນຜ່ານມາລະຫວ່າງທ່ານລັດຖະມົນຕີວ່າການກະຊວງການຕ່າງປະເທດອີຣານ Mohammad Javad Zarif ແລະ ຜູ້ຮ່ວມຕໍ່າແໜ່ງໃນກຸ່ມ P5+1. ຄາດວ່າ, ໃນຂອບເຂດການພົບປະເຈລະຈາກໍ່ດຳເນີນບັນດາການເຈລະຈາ 2 ຝ່າຍ ແລະ ຫຼາຍຝ່າຍ.
ອີຣານ ແລະ ກຸ່ມ P5+1 ເຫັນດີຮອດທ້າຍເດືອນ 03/2015 ຈະບັນລຸໄດ້ກອບຂໍ້ຕົກລົງ, ຫຼັງຈາກນັ້ນດຳເນີນການປຶກສາຫາລືບັນດາຂໍ້ມາດຕາລະອຽດຂອງຂໍ້ຕົກລົງໃນຮອບເວລາ 3 ເດືອນຕໍ່ໄປກ່ອນກຳນົດເວລາສຸດທ້າຍ. ແຕ່ຜ່ານການເຈລະຈາຫຼາຍຄັ້ງ 2 ຝ່າຍຍັງບໍ່ທັນແກ້ໄຂໄດ້ຄວາມບໍ່ລົງລອຍກັນຕົ້ນຕໍກ່ຽວກັບເລື່ອງຮຽກຮ້ອງຝ່າຍຕາເວັນຕົກຜ່ອນຄາຍບັນດາມາດຕະການລົງໂທດດ້ານເສດຖະກິດ ແລະ ອີຣານ ຢຸດຕິລາຍການເສີມທາດອູຣານີ ລະດັບສູງ.