(ພາບ:ca.cand.com.vn)
(TTX)- ວັນທີ 2/10, ທີ່ການປະຊຸມຂ່າວປະຈຳເດືອນຂອງຄະນະຊີ້ນຳເຂດໄຕງວຽນ, ທ່ານ Tran Viet Hung ຮອງຫົວໜ້າຄະນະຊີ້ນຳເຂດໄຕງວຽນ ໃຫ້ຮູ້ວ່າ: ໃນ 9 ເດືອນຕົ້ນປີນີ້, ເສດຖະກິດສັງຄົມທົ່ວເຂດໄຕງວຽນ ມີການຫັນປ່ຽນຫຼາຍຢ່າງ, ຍອດຜະລິດຕະພັນພາຍໃນ (GDP) ເພີ່ມຂຶ້ນ 12,3% ເມື່ອທຽບກັບໄລຍະດຽວກັນຂອງປີ 2011. ການຜະລິດກະສິກຳບັນດາແຂວງໄຕງວຽນ ມີການຫັນປ່ຽນຢ່າງແຮງກ່ຽວກັບດ້ານຫັນປ່ຽນຜົນລະປູກ. ຫຼາຍທ້ອງຖິ່ນໄດ້ທະວີຄູນບັນດາຮູບແບບລົງທຶນກະເສດສຸມ, ການຜະລິດສະອາດ, ນຳໃຊ້ເຕັກໂນໂລຊີສູງໃນຂົງເຂດປູກຕົ້ນກາເຟ, ຕົ້ນໄມ້ກິນໝາກ, ຊາ, ດອກໄມ້, ຜັກສົ່ງອອກ. ກ່ຽວກັບການປະຕິບັດນະໂຍບາຍຊົນເຜົ່າ, ບັນດາແຂວງໄຕງວຽນ ສຸມໃສ່ເອົາໃຈໃສ່ເບິ່ງແຍງຊີວິດການເປັນຢູ່ໃຫ້ແກ່ປະຊາຊົນຊົນເຜົ່າສ່ວນໜ້ອຍ, ໂດຍສະເພາະແມ່ນບັນດາບໍລິເວນເຂດຫ່າງໄກສອກຫລີກ. ປະຈຸບັນ, ມີປະຊາຊົນຊົນເຜົ່າສ່ວນໜ້ອຍ, ຄົນທຸກຍາກກ່ວາ 600.000 ຄົນໄດ້ຮັບບັດປະກັນສຸຂະພາບດ້ວຍຍອດຈຳນວນເງິນກ່ວາ 315 ຕື້ດົ່ງ. ການສຶກສາ, ບຳລຸງສ້າງ, ສາທາລະນະສຸກໄດ້ຮັບຄວາມເອົາໃຈໃສ່, ພັດທະນາຢ່າງຄົບຊຸດ…
ແຕ່ນີ້ຮອດທ້າຍປີ, ຄະນະຊີ້ນຳເຂດໄຕງວຽນ ສືບຕໍ່ສົມທົບກັບບັນດາກະຊວງ, ຂະແໜງການສືບຕໍ່ຜັນຂະຫຍາຍການກວດກາສະພາບຕົວຈິງພື້ນຖານໂຄງລ່າງເຂດຊົນນະບົດ, ຕີລາຄາສະພາບນຳໃຊ້ທີ່ດິນ, ການຜະລິດ, ຊີວິດຂອງປະຊາຊົນຊົນເຜົ່າສ່ວນໜ້ອຍ, ແກ້ໄຂບັນຫາຄົມມະນາຄົມ, ການຄຸ້ມຄອງປົກປັກຮັກສາປ່າ, ພັດທະນາກາເຟແບບຍືນຍົງ, ຄະນະຊີ້ນຳເຂດໄຕງວຽນ ເປັນເສນາທິການໃນການປະກາດໃຊ້ກົນໄກ, ນະໂຍບາຍພິເສດສະເພາະກ່ຽວກັບການພັດທະນາເສດຖະກິດສັງຄົມໃຫ້ແກ່ເຂດໄຕງວຽນ.