(ທ່ານປະທານປະເທດ ເຈືອງເຕີນຊາງ ໄດ້ມອບຫຼຽນກາດາວຄຳ
ໃຫ້ເຫຼົ່າທັບປ້ອງກັນອາກາດ - ກອງທັບອາກາດ)
(vovworld) - ພິທີສະເຫຼີມສະຫຼອງ 50 ປີແຫ່ງວັນມູນເຊື້ອເຫຼົ່າທັບປ້ອງກັນອາກາດ - ກອງທັບອາກາດ ໄດ້ຖືກຈັດຕັ້ງຂຶ້ນຢ່າງສົມກຽດໃນຕອນເຊົ້າວັນທີ 18/10, ຢູ່ ຮ່າໂນ້ຍ. ກ່າວຄຳເຫັນນະທີນີ້, ທ່ານປະທານປະເທດຫວຽດນາມ ເຈືອງເຕີນຊາງ ເນັ້ນໜັກວ່າ: ໃນໄລຍະປະຈຸບັນ, ການສ້າງສາ ແລະ ປົກປັກຮັກສາປະເທດ ສສ ຫວຽດນາມ ແມ່ນ 2 ໜ້າທີ່ຍຸດທະສາດ. ໃນສະພາບການໂລກ ແລະ ພາກພື້ນມີການຜັນແປຢ່າງສັບສົນ, ໜ້າທີ່ປົກປັກຮັກສາເອກະລາດ, ອະທິປະໄຕ, ຜືນແຜ່ນດິນອັນຄົບຖ້ວນ, ເຂດທະເລ, ໝູ່ເກາະ, ປົກປັກຮັກສາລະບອບສັງຄົມນິຍົມແມ່ນຄວາມຮັບຜິດຊອບຂອງທົ່ວພັກ, ທົ່ວປວງຊົນ, ທົ່ວກອງທັບ ແລະ ທົ່ວລະບົບການເມືອງ ເຊິ່ງກຳລັງປະກອບອາວຸດປະຊາຊົນແມ່ນແກ່ນສານ, ໃນນັ້ນເຫຼົ່າທັບປ້ອງກັນອາກາດ - ກອງທັບອາກາດ ມີຄວາມເອກອ້າງທະນົງໃຈ ແລະ ຄວາມຮັບຜິດຊອບຢ່າງໃຫຍ່ຫຼວງ.
ຕາມທ່ານປະທານປະເທດ ຫວຽດນາມ ເຈືອງເຕີນຊາງແລ້ວ, ເພື່ອປະຕິບັດໜ້າທີ່ອັນໜັກໜ່ວງນີ້ ຕ້ອງສ້າງເຫຼົ່າທັບໃຫ້ໝັ້ນຄົງເຂັ້ມແຂງຮອບດ້ານ, ເປັນກຳລັງຫຼວງ, ທັນສະໄໝ, ຈົ່ງຮັກພັກດີຕໍ່ພັກ ແລະ ປະເທດຊາດ. ທ່ານປະທານປະເທດ ເຈືອງເຕີນຊາງ ເນັ້ນໜັກວ່າ:
“ເພື່ອສືບທອດ ແລະ ເສີມຂະຫຍາຍມູນເຊື້ອສະຫຼາດສະຫຼຽວ, ມີຫົວຄິດປະດິດສ້າງຂອງລຸ້ນພໍ່, ລຸ້ນອ້າຍ, ຂອງກອງທັບພວກເຮົາ. ເຫຼົ່າທັບຕ້ອງເອົາໃຈໃສ່ເຖິງວຽກງານຄົ້ນຄ້ວາ, ສະຫຼຸບພຶດຕິກຳຕົວຈິງ, ທັງພຶດຕິກຳ 50 ປີແຫ່ງການຕໍ່ຕ້ານຂອງເຫຼົ່າທັບ ແລະ ພຶດຕິກຳຂອງສົງຄາມທັນສະໄໝໃນໂລກ. ສ້າງບັນດາວິທີການຮົບສຳລັບແຕ່ລະເປົ້າໝາຍ, ວິທີສົມທົບກັບບັນດາກຳລັງໃນທ່າສະໜາມປ້ອງກັນອາກາດປະຊາຊົນຂອງປະເທດຊາດ. ເພີ່ມທະວີວຽກງານຝຶກອົບຮົມຊຶ່ງຕ້ອງໄກ້ຊິດຕິດແທດກັບພຶດຕິກຳການສູ້ຮົບຕົວຈິງ.”
ໂດຍຕາງໜ້າໃຫ້ພັກ, ລັດ, ທ່ານປະທານປະເທດ ເຈືອງເຕີນຊາງ ໄດ້ມອບຫຼຽນໄຊດາວຄຳ, ເຊິ່ງແມ່ນລາງວັນອັນສູງສົ່ງຂອງພັກ, ລັດ ມອບໃຫ້ເຫຼົ່າທັບປ້ອງກັນອາກາດ - ກອງທັບອາກາດ.