ສຳນັກຂ່າວສານ AFP ຂອງ ຝລັ່ງ ໄດ້ຄັດສະເໜີຄຳເວົ້າຂອງເຈົ້າໜ້າທີ່ທາງການທູດບາງທ່ານຂອງ ອີຢູ ໂດຍໃຫ້ຮູ້ວ່າ ບັນດາເອກອັກຄະລັດຖະທູດ ໄດ້ເຫັນດີເປັນເອກະພາບ ຕໍ່ກຳນົດເວລາມາດຕະການລົງໂທດ ລັດເຊຍ ຕື່ມອີກ 6 ເດືອນ, ໝາຍຄວາມວ່າຮອດທ້າຍເດືອນ ມັງກອນ 2022. ບັນດາມາດຕະການລົງໂທດ ແນ່ໃສ່ບັນດາຂົງເຂດສຳຄັນຢູ່ ລັດເຊຍ ເປັນຕົ້ນແມ່ນ ທະນາຄານ, ພະລັງງານ ແລະ ການປ້ອງກັນຊາດ. ການຕັດສິນດັ່ງກ່າວຈະປຶກສາຫາລື ແລະ ເຊັນຮັບຮອງເອົາຜ່ານທີ່ກອງປະຊຸມລັດຖະມົນຕີການຕ່າງປະເທດບັນດາປະເທດ ອີຢູ ໃນວັນທີ 12 ກໍລະກົດ ຈະມາເຖິງນີ້. ຂໍ້ຕົກລົງດັ່ງກ່າວໄດ້ຍົກອອກມາໃນສະພາບການທີ່ ບຣຸກແຊນ ຕີລາຄາສາຍພົວພັນກັບ ມົດສະກູ ວ່າ ຍັງຄົງຢູ່ໃນລະດັບຕ່ຳສຸດ.

        ປັດຈຸບັນ, ອີຢູ ພວມຊັ່ງຊາດັດປັບຍຸດທະສາດທາງການທູດກັບປະເທດບ້ານໃກ້ເຮືອນຄຽງທາງທິດຕາເວັນອອກ, ໃນນັ້ນ, ທ່ານປະທານາທິບໍດີ ຝລັ່ງ Emmanuel Macron ຖືວ່າ ສຳພັນທະມິດພວມຖືກ “ຈຳກັດ” ໃນນະໂຍບາຍລົງໂທດ.