ພາບ:Reuters
|
(vovworld)- ວັນທີ 17/7, ເຮືອບິນໂດຍສານຂອງບໍລິສັດການບິນ ມາເລເຊຍ ຂົນສົ່ງຜູ້ໂດຍສານ 298 ຄົນຖືກຕົກຢູ່ໃກ້ກັບນະຄອນ Donetsk, ພາກຕາເວັນອອກ ຢູແກຼນ, ໃກ້ກັບຊາຍແດນກັບລັດເຊຍ. ເຮືອບິນ Boeing 777 ເລກໝາຍ MH17 ຂອງບໍລິສັດການບິນ Malaysia Airlines ພວມເດີນທາງຈາກ Amsterdam (ປະເທດ ໂຮນລັງ) ກັບເມືອນະຄອນຫຼວງ Kuala Lumpur ຂອງ ມາເລເຊຍ. ຜູ້ໂດຍສານ 283 ຄົນ ແລະ ຈຸບິນ 15 ຄົນເສຍຊີວິດທັງໝົດ. ແຈ້ງຂ່າວລ້າສຸດຂອງຫ້ອງການຜູ້ຕາງຫນ້າ Malaysia Airlines ປະຈຳເອີລົບ ໃຫ້ຮູ້ວ່າ: ໃນຈຳນວນຜູ້ໂດຍສານຖືກເສຍຊີວິດນັ້ນ, ມີຊາວ ໂຮນລັງ 154 ຄົນ, ອົດສະຕາລີ 27 ຄົນ, ມາເລເຊຍ 28 ຄົນ, ອິນໂດເນເຊຍ 12 ຄົນ, ອັງກິດ 9 ຄົນ, ເຢຍລະມັນ 4 ຄົນ, ແບນຊີກ 4 ຄົນ, ຟິລິບປີນ 3 ຄົນ, ການາດາ 1 ຄົນ ແລະ 41 ຄົນບໍ່ທັນຮູ້ໄດ້ວ່າແມ່ນຖືສັນຊາດໃດ.
ເຈົ້າໜ້າທີ່ ຢູແກຼນ ໃຫ້ຮູ້ວ່າ: ເຮືອບິນລຳນີ້ຖືກຍິງຕົກ. ເຖິງຢ່າງໃດກໍ່ຕາມ, ໃນຈຸດເວລານີ້, ຍັງບໍ່ທັນຮັບຮູ້ສາຍເຫດຂອງໂສກນາດຕະກຳຢ່າງຈະແຈ້ງ. ທ່ານປະທານາທິບໍດີ ຢູແກຼນ Petro Poroshenko ໄດ້ຮຽກຮ້ອງສ້າງຕັ້ງຄະນະກຳມະການແຫ່ງລັດເພື່ອສືບສວນກ່ຽວກັບຖ້ຽວ ບິນ MH17 ຂອງບໍລິສັດການບິນ Malaysia Airlines. ຈາກ Kuala Lumpur, ທ່ານນາຍົກລັດຖະມົນຕີ ມາເລເຊຍ Najib Razak ໃຫ້ຮູ້ວ່າ: ທ່ານຖືກຊັອກໜັກ ຕໍ່ໜ້າໂສກນາດຕະກຳນີ້ ແລະ ຈັດຕັ້ງການປະຊຸມດ່ວນ, ເພື່ອແຈ້ງຂ່າວກັບຍາດຕີພີ່ນ້ອງຜູ້ໂດຍສານ ແລະ ຈຸບິນໃນຖ້ຽວບິນດັ່ງກ່າວ.
ການນຳບັນດາປະເທດໄດ້ສະແດງຄວາມເສົ້າສະຫຼົດໃຈຢ່າງເລິກເຊິ່ງມາ ຍັງຍາດຕິພີ່ນ້ອງຜູ້ໂດຍສານ ແລະ ຈຸບິນໃນຖ້ຽວບິນນີ້ ແລະ ຮຽກຮ້ອງດຳເນີນການສືບສວນຢ່າງພາວະວິໄສ ແລະ ຊື່ຕົງກ່ຽວກັບສາຍເຫດພາໄປເຖິງໂສກນາດຕະກຳດັ່ງກ່າວ. ທ່ານເລຂາທິການໃຫຍ່ ສປຊ Ban Ki – moon ຮຽກຮ້ອງໃຫ້ດຳເນີນການສືບສວນສາກົນຮອບດ້ານ ແລະ ກະຈ່າງແຈ້ງກ່ຽວກັບເຫດການດັ່ງກ່າວ. ສະພາຄວາມໝັ້ນຄົງ ສປຊ ກໍ່ຈັດກອງປະຊຸມດ່ວນໃນມື້ນີ້.
ເມື່ອໄດ້ຮັບຂ່າວກ່ຽວກັບກໍລະນີເຮືອບິນ MH 17 ຂອງມາເລເຊຍ ຕົກ, ວັນທີ 18/7/2014, ທ່ານປະທານປະເທດຫວຽດນາມເຈືອງເຕີນຊາງ, ທ່ານນາຍົກລັດຖະມົນຕີ ຫງວຽນເຕີນຢູງ ແລະ ທ່ານຮອງນາຍົກລັດຖະມົນຕີ ຟ້າມບີງມີງ ໄດ້ສົ່ງໂທລະເລກສະແດງຄວາມເສົ້າສະຫລົດໃຈມາຍັງກະສັດມາເລເຊຍ, ນາຍົກລັດຖະມົນຕີ ມາເລເຊຍ ແລະ ທ່ານລັດຖະມົນຕີມາເລເຊຍ. ໃນວັນດຽວກັນ, ທ່ານນາຍົກລັດຖະມົນຕີ ຫງວຽນເຕີນຢູງ ໄດ້ສ່ົງໂທລະເລກສະແດງຄວາມເສົ້າສະຫລົດໃຈມາຍັງນາຍົກລັດຖະມົນຕີ ໂຮນລັງ Mark Rutte.
ເມື່ອຕອບຄຳຖາມຂອງນັກຂ່າວກ່ຽວກັບກໍລະນີເຮືອບິນ MH 17 ຂອງບໍລິສັດການບິນມາເລເຊຍ ຖືກຕົກ, ໂຄສົກກະຊວງການຕ່າງປະເທດຫວຽດນາມ ເລຫາຍບີງ ຊີ້ແຈ້ງວ່າ: “ຫວຽດນາມຮູ້ສຶກເສົ້າສະຫລົດໃຈທີ່ສຸດ ເມື່ອໄດ້ຮັບຂ່າວເຮຶອບິນ MH 17 ຂອງມາເລເຊຍຖືກຕົກເຮັດໃຫ້ຫລາຍຄົນເສຍຊີວິດ. ພວກຂ້າພະເຈົ້າ ສະແດງຄວາມເສົ້າສະຫລົດໃຈມາລັດຖະບານ, ປະຊາຊົນບັນດາປະເທດ ແລະ ຄອບຄົວຜູ້ຖືກປະສົບເຄາະຮ້າຍ.”