ບັນດາການນຳອາຊຽນເຂົ້າຮ່ວມພິທີໄຂກອງປະຊຸມ
ສຸດຍອດການລົງທຶນ-ການຄ້າອາຊຽນ-ຈີນ
(ພາບ: nguyentandung.org)
(vovworld)- ດ້ວຍຫົວເລື່ອງ “ພັດທະນາການຮ່ວມມືໃນພາກພື້ນ: ກາລະໂອກາດໃໝ່, ກຳລັງໜູນໃໝ່ ແລະ ໄລຍະໃໝ່“ ງານຕະຫຼາດນັດ ວາງສະແດງອາຊຽນ-ຈີນ 2013 ແລະ ກອງປະຊຸມສຸດຍອດການລົງທຶນ-ການຄ້າອາຊຽນ-ຈີນ ຄັ້ງທີ 10 ໄດ້ໄຂຂຶ້ນໃນ ຕອນເຊົ້າວັນທີ 3/9, ຢູ່ນະຄອນໜານໜິງ, ເມືອງເອກຂອງເຂດປົກຄອງດ້ວຍຕົນເອງຊົນເຜົ່າຈວາງ, ແຂວງກວາງຊີ, ປະເທດຈີນ.
ກ່າວຄຳເຫັນໄຂກອງປະຊຸມ, ທ່ານນາຍົກລັດຖະມົນຕີຈີນ ຫລີເຄຊຽງ ຢືນຢັນວ່າ: ການຊຸກຍູ້ການພົວພັນຮ່ວມມືກັບບັນດາປະເທດອາຊຽນ ແມ່ນ1 ໃນບັນດາການໃຫ້ບຸລິມະສິດໃນນະໂຍບາຍການຕ່າງປະເທດຂອງຈີນ. ຍາມໃດຈີນ ກໍ່ສະໜັບສະໜູນອາຊຽນພັດທະນາຢ່າງໝັ້ນຄົງເຂັ້ມແຂງເພື່ອສັນຕິພາບ, ສະຖຽນລະພາບ ແລະ ວັດທະນາຖາວອນໃນພາກພື້ນ.
ໃນບົດກ່າວປາໄສທີ່ພິທີໄຂ ງານຕະຫຼາດນັດອາຊຽນ-ຈີນ 2013 ແລະ ກອງປະຊຸມສຸດຍອດການລົງທຶນ-ການຄ້າອາຊຽນ-ຈີນ ຄັ້ງທີ 10, ທ່ານນາຍົກລັດຖະມົນຕີຫງວຽນເຕິນຢຸງ ໄດ້ຢືນຢັນວ່າ: ຫວຽດນາມ ພວມພອ້ມກັບບັນດາປະເທດອາຊຽນ ສ້າງປະຊາຄົມອາຊຽນ ແລະ ເປັນເຈົ້າການຕັ້ງໜ້າເຂົ້າຮ່ວມວິວັດການເຊື່ອມໂຍງເຂົ້າກັບພາກພື້ນ ແລະ ໂລກ. ທ່ານນາຍົກລັດຖະມົນຕີຫງວຽນເຕິນຢຸງ ເນັ້ນໜັກວ່າ:
“ຍາມໃດຫວຽດນາມ ກໍ່ສະໜັບສະໜູນ ແລະ ຖື ການຮ່ວມມືລະຫວ່າງອາຊຽນ-ຈີນ ເປັນສຳຄັນ, ພ້ອມທັງເຊື່ອໝັ້ນວ່າ: ຂອບເຂດການຮ່ວມມືນີ້ຈະປະກອບສ່ວນຊຸກຍູ້ການພົວພັນສອງຝ່າຍຫວຽດນາມ-ຈີນ ບັນລຸປະສິດທິຜົນ. ຍາມໃດ ລັດຖະບານຫວຽດນາມ ກໍ່ສົ່ງເສີມ ແລະ ສ້າງທຸກໆເງື່ອນໄຂອຳນວນຄວາມສະດວກເພື່ອໃຫ້ບັນດານັກທຸລະກິດຈີນ ແລະ ອາຊຽນ ພັດທະນາການຮ່ວມມືດຳເນີນທຸລະກິດ, ລົງທຶນຢູ່ຫວຽດນາມ. ຫວຽດນາມ ກໍ່ສະໜັບສະໜູນການຄົ້ນຄ້ວາ, ແລກປ່ຽນເພື່ອຍົກລະດັບການຮ່ວມມືໃນເຂດການຄ້າເສລີຫວຽດນາມ-ຈີນ ໃຫ້ສອດຄ່ອງກັບຜົນປະໂຫຍດລວມຂອງຝ່າຍຕ່າງໆ, ເພື່ອຜ້ອມກັນພັດທະນາ, ພ້ອມກັນຊົມໃຊ້ຜົນປະໂຫຍດ.“