(ທ່ານນາງປະທານສະພາແຫ່ງຊາດ ຫງວຽນທິກິມເງິນ)
(vovworld) - ຕອນເຊົ້າວັນທີ 20/07, ຢູ່ຮ່າໂນ້ຍ, ສະພາແຫ່ງຊາດຫວຽດນາມ ຊຸດທີ 14 ໄດ້ໄຂກອງປະຊຸມສະໄໝສາມັນຄັ້ງປະຖົມມະເລີກ ຢ່າງເປັນທາງການ. ເຂົ້າຮ່ວມພິທີໄຂກອງປະຊຸມມີທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟຸຈ້ອງ, ທ່ານປະທານປະເທດ ເຈີ່ນດ້າຍກວາງ, ທ່ານນາຍົກລັດຖະມົນຕີ ຫງວຽນຊວນຟຸກ, ທ່ານນາງປະທານສະພາແຫ່ງຊາດ ຫງວຽນທິກິມເງິນ, ບັນດາການນຳ, ອະດີດການນຳພັກ, ລັດ, ລັດຖະບານ, ສະພາແຫ່ງຊາດ, ສູນກາງແນວໂຮມປະເທດຊາດຫວຽດນາມ, ຜູ້ຕາງໜ້າບັນດາກະຊວງ, ຄະນະ, ຂະແໜງການ, ບັນດາຄະນະທຸຕານຸທູດ, ພ້ອມກັບບັນດາສະມາຊິກສະພາແຫ່ງຊາດຊຸດທີ 14.
ກ່າວຄຳເຫັນໄຂກອງປະຊຸມສະໄໝສາມັນ, ທ່ານນາງປະທານສະພາແຫ່ງຊາດ ຫງວຽນທິກິມເງິນ ຢືນຢັນວ່າ, ການເລືອກຕັ້ງສະມາຊິກສະພາແຫ່ງຊາດຊຸດທີ 14 ແລະ ສະມາຊິກສະພາປະຊາຊົນທຸກຂັ້ນອາຍຸການ 2016 – 2021 ໃນວັນທີ 22/05 ຜ່ານມາ, ຜູ້ມີສິດເລືອກຕັ້ງໃນທົ່ວປະເທດໄດ້ຄັດເລືອກ ແລະ ເລືອກຕັ້ງສະມາຊິກສະພາແຫ່ງຊາດ 494 ທ່ານ, ເຊິ່ງແມ່ນບັນດາຜູ້ດີເດັ່ນໃຫ້ກຸ່ມກ້ອນມະຫາສາມັກຄີທົ່ວປວງຊົນທັງຊາດ, ຕາງໜ້າໃຫ້ເຈດຈຳນົງ ແລະ ພູມປັນຍາຂອງປະຊາຊົນ. ນີ້ແມ່ນໄຊຊະນະອັນໃຫຍ່ຫຼວງຂອງປະຊາຊົນຫວຽດນາມ ໃນວິວັດການດຳເນີນຊີວິດປະຊາທິປະໄຕ, ສະແດງໃຫ້ເຫັນເຈດຈຳນົງດ້ານການເມືອງ, ຄວາມຮັບຜິດຊອບຂອງພົນລະເມືອງ ແລະ ບົດບາດຂອງລະບົບການເມືອງສຳລັບເຫດການສຳຄັນຍິ່ງນີ້. ທ່ານນາງປະທານສະພາແຫ່ງຊາດ ຫງວຽນທິກິມເງິນ ກ່າວວ່າ.
“ສະພາແຫ່ງຊາດຊຸດທີ 14 ເລີ່ມປະຕິບັດໜ້າທີ່ໃນສະພາບທີ່ທົ່ວພັກ, ທົ່ວປວງຊົນ ແລະ ທົ່ວກອງທັບ ພວມຕັ້ງໜ້າປະຕິບັດມະຕິກອງປະຊຸມໃຫຍ່ຄັ້ງທີ 12 ຂອງພັກ, ກ້າວເຂົ້າສູ່ໄລຍະພັດທະນາໃໝ່. ພ້ອມກັບບັນດາຄວາມສະດວກໂດຍພື້ນຖານຍ້ອນຜົນງານຂອງພາລະກິດ 30 ປີແຫ່ງການປ່ຽນໃໝ່ນຳມາໃຫ້, ຫວຽດນາມ ກໍພວມຢືນຢູ່ຕໍ່ໜ້າບັນດາຄວາມຫຍຸ້ງຍາກ, ສິ່ງທ້າທາຍ. ຄວາມຮຽກຮ້ອງຕ້ອງການໃນການກໍ່ສ້າງ ແລະ ປົກປັກຮັກສາປະເທດຊາດໃນໄລຍະໃໝ່ ທີ່ໄດ້ວາງອອກໃຫ້ສະພາແຫ່ງຊາດ, ໃຫ້ບັນດາສະມາຊິກສະພາແຫ່ງຊາດ ບັນດາໜ້າທີ່ອັນໜັກໜ່ວງແຕ່ສູງສົ່ງ. ດ້ວຍຄວາມໄວ້ວາງໃຈ ແລະ ຄວາມໄວ້ເນື້ອເຊື່ອໃຈຂອງປະຊາຊົນ, ຜູ້ມີສິດເລືອກຕັ້ງໃນທົ່ວປະເທດ, ສະມາຊິກສະພາແຫ່ງຊາດ 494 ທ່ານ ທີ່ຫາກໍ່ໄດ້ຮັບການເລືອກຕັ້ງຈະແມ່ນແຫຼ່ງກຳລັງແຮງ ແລະ ແມ່ນກຳລັງໜູນຢ່າງໃຫຍ່ຫຼວງເພື່ອໃຫ້ສະພາແຫ່ງຊາດຊຸດທີ 14 ສູ້ຊົນປະຕິບັດສຳເລັດບັນດາໜ້າທີ່ສຳຄັນເຊິ່ງປະຊາຊົນມອບໝາຍໃຫ້”.
ພາຍຫຼັງບົດກ່າວປາໄສຂອງທ່ານນາງປະທານສະພາແຫ່ງຊາດ ຫງວຽນທິກິມເງິນ, ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟຸຈ້ອງ ໄດ້ມີບົດກ່າວປາໄສສຳຄັນທີ່ວາລະໄຂກອງປະຊຸມສະໄໝສາມັນຄັ້ງປະຖົມມະເລີກ, ສະພາແຫ່ງຊາດຊຸດທີ 14.
( ປະທານຄະນະກຳມະການແນວໂຮມປະເທດຊາດ
ຫວຽດນາມ ຫງວຽນທ້ຽນເຍີນ )
ແລະກໍ່ໃນວາລະປະຊຸມ, ສະພາແຫ່ງຊາດຮັບຟັງບົດລາຍງານສະຫລຸບການເລືອກຕັ້ງສະມາຊິກສະພາແຫ່ງຊາດຊຸດທີ 14 ແລະ ສະມາຊິກສະພາປະຊາຊົນທຸກຂັ້ນອາຍຸການ 2016 – 2021; ໝາກຜົນແຫ່ງການກວດກາຖານະເປັນສະມາຊິກສະພາແຫ່ງຊາດ. ສະເໜີບົດລາຍງານສັງລວມຄຳເຫັນ, ຂໍ້ສະເໜີແນະຂອງຜູ້ມີສິດເລືອກຕັ້ງ ແລະ ປະຊາຊົນໃນທົ່ວປະເທດໃນການເລືອກຕັ້ງສະມາຊິກສະພາແຫ່ງຊາດຊຸດທີ 14 ແລະ ສະມາຊິກສະພາປະຊາຊົນທຸກຂັ້ນອາຍຸການ 2016 – 2021. ປະທານຄະນະກຳມະການແນວໂຮມປະເທດຊາດ ຫວຽດນາມ ຫງວຽນທ້ຽນເຍີນ ໃຫ້ຮູ້ວ່າ:
“ຜູ້ມີສິດເລືອກຕັ້ງຮັບຮູ້ ແລະ ເອົາໃຈໃສ່ເປັນພິເສດບັນດາໂຄງການດຳເນີນງານ ກໍ່ຄືຄຳໝັ້ນສັນຍາຂອງບັນດາຜູ້ອອກສະໝັກຮັບເລືອກຕັ້ງທີ່ກອງປະຊຸມພົບປະກັບຜູ້ມີສິດເລືອກຕັ້ງ ແລະ ປາດຖະໜາຢາກໃຫ້ບັນດາຜູ້ໄດ້ຮັບການເລືອກຕັ້ງ ປະຕິບັດໂຄງການດຳເນີນງານ ແລະ ຄຳໝັ້ນສັນຍາຂອງຕົນຢ່າງຄົບຖ້ວນ. ພ້ອມທັງສະເໜີມີກົນໄກ ເພື່ອໃຫ້ແນວໂຮມປະເທດຊາດ ຫວຽດນາມ ແລະ ປະຊາຊົນຕິດຕາມກວດກາເລື່ອງປະຕິບັດໂຄງການດຳເນີນງານ ຄຳໝັ້ນສັນຍາຂອງສະມາຊິກສະພາແຫ່ງຊາດແຕ່ລະຄົນ. ຜູ້ມີສິດເລືອກຕັ້ງ ແລະ ປະຊາຊົນ ປາດຖະໜາວ່າ ບັນດາສະມາຊິກສະພາແຫ່ງຊາດຊຸດທີ 14, ສະມາຊິກສະພາປະຊາຊົນທຸກຂັ້ນອາຍຸການ 2016 – 2021 ຈະປະຕິບັດຄວາມຮັບຜິດຊອບຂອງຜູ້ເປັນຕົວແທນປະຊາຊົນເປັນຢ່າງດີ, ມີການພົບປະ ຮັບຟັງຄຳເຫັນ ແລະ ສ່ອງແສງຢ່າງເປັນປະຈຳ ແລະ ຄົບຖ້ວນ, ມີແນວຄິດຈິດໃຈອັນບໍລິສຸດ, ມີຄວາມມຸ່ງມາດປາດຖະໜາ, ມີຄຳເຫັນ, ຂໍ້ສະເໜີແນະຂອງປະຊາຊົນກັບບັນດາອົງການແຫ່ງລັດ, ຕິດຕາມກວດກາບັນດາອົງການສຳນັກງານແຫ່ງລັດແກ້ໄຂບັນດາຂໍ້ສະເໜີແນະຂອງປະຊາຊົນ ເພື່ອຕອບໃຫ້ປະຊາຊົນ, ເສີມຂະຫຍາພູມປັນຍາ, ຄວາມຮັບຜິດຊອບເພື່ອປ່ຽນໃໝ່, ຍົກສູງຄຸນນະພາບການເຄື່ອນໄຫວຂອງສະພາແຫ່ງຊາດ ແລະ ສະພາປະຊາຊົນທຸກຂັ້ນ.”
ຕອນບ່າຍວັນທີ 20/7, ທ່ານນາງປະທານສະພາແຫ່ງຊາດຫວຽດນາມ ຫງວຽນທິກິມເງິນ ໄດ້ສະເໜີໃບຍື່ນສະເໜີກ່ຽວກັບຈຳນວນຮອງປະທານ ສະພາແຫ່ງຊາດ, ຈຳນວນກຳມະການໃນຄະນະປະຈຳ ສະພາແຫ່ງຊາດ. ໃບຍື່ນສະເໜີໄດ້ສະເໜີ ສະພາແຫ່ງຊາດພິຈາລະນາໂຄງປະກອບຂອງຄະນະປະຈຳ ສະພາແຫ່ງຊາດຫວຽດນາມຊຸດທີ 14 ຊຶ່ງປະກອບດ້ວຍສະມາຊິກ 18 ທ່ານ. ລະອຽດລວມມີ : ປະທານ ສະພາແຫ່ງຊາດ, 4 ຮອງປະທານສະພາແຫ່ງຊາດ ແລະ 13 ກຳມະການໃນຄະນະປະຈຳ ສະພາແຫ່ງຊາດ.
ກອງປະຊຸມສະໄໝສາມັນຄັ້ງປະຖົມມະເລີກ, ສະພາແຫ່ງຊາດຊຸດທີ 14 ດຳເນີນນັບແຕ່ວັນທີ 20 – 29/07.