(vovworld) – ວາລະໄຂກອງປະຊຸມສະໄໝສາມັນເທື່ອທີ 8, ສະພາແຫ່ງຊາດ ຫວຽດນາມ ຊຸດທີ 13 ໄດ້ຈັດຂຶ້ນໃນຕອນເຊົ້າວັນທີ 20/10, ຢູ່ຮ່າໂນ້ຍ, ດ້ວຍການເຂົ້າຮ່ວມຂອງທ່ານເລຂາທິການໃຫຍ່ຄະນະບໍລິຫານງານສູນກາງພັກ ກອມມູນິດ ຫວຽດນາມ ຫງວຽນຟູ໋ຈ້ອງ, ທ່ານປະທານປະເທດ ເຈືອງເຕີນຊາງ, ທ່ານນາຍົກລັດຖະມົນຕີ ຫງວຽນເຕີນຢູ້ງ ພ້ອມກັບບັນດານັກປະຕິວັດຜູ້ອາວຸໂສ, ບັນດາສະມາຊິກສະພາແຫ່ງຊາດ (ສສຊ), ຜູ້ຕາງໜ້າບັນດາຄະນະນູຕານຸທູດ, ບັນດາອົງການສາກົນອື່ນໆຢູ່ ຮ່າໂນ້ຍ.
ກ່າວຄຳເຫັນທີ່ພິທີໄຂ, ທ່ານປະທານສະພາແຫ່ງຊາດ ຫງວຽນຊິງຮູ່ງ, ໃຫ້ຮູ້ວ່າ: ທີ່ກອງປະຊຸມຄັ້ງນີ້, ສະພາແຫ່ງຊາດຈະປຶກສາຫາລື, ຕົກລົງບາງເນື້ອໃນສຳຄັນ:
“ທີ່ໜຶ່ງແມ່ນພິຈາລະນາ, ຮັບຮອງເອົາ18 ຮ່າງກົດໝາຍ ແລະ 3 ຮ່າງມະຕິ, ປະກອບຄຳເຫັນກ່ຽວກັບ 12 ຮ່າງກົດໝາຍອື່ນ. ໃນນັ້ນມີຫຼາຍຮ່າງກົດໝາຍສຳຄັນ, ກ່ຽວຂ້ອງເຖິງເລື່ອງສືບຕໍ່ປັບປຸງລະບອບເສດຖະກິດ, ການຈັດຕັ້ງກົງຈັກລັດ, ສິດທິມະນຸດ, ສິດ ແລະ ພັນທະພື້ນຖານຂອງພົນລະເມືອງ… ຕາມເນື້ອໃນ ແລະ ຈິດໃຈຂອງລັດຖະທຳມະນູນສະບັບໃໝ່. ທີ່ສອງແມ່ນ, ພິຈາລະນາບັນດາບົດລາຍງານກ່ຽວກັບໝາກຜົນຂອງການປະຕິບັດໜ້າທີ່ພັດທະນາເສດຖະກິດ - ສັງຄົມປີ 2014 ແລະ ໜ້າທີປີ 2015. ທີສາມແມ່ນ, ຈັດຕັ້ງການລົງຄະແນນສຽງໄວ້ວາງໃຈສຳລັບບັນດາຕຳແໜ່ງໂດຍສະພາແຫ່ງຊາດເລືອກຕັ້ງ ຫຼື ໃຫ້ສັດຕະຍາບັນ.”
ນອກຈາກນັ້ນ, ສະພາແຫ່ງຊາດກໍ່ດຳເນີນການຕິດຕາມກວດກາຫົວເລື່ອງສະເພາະສູງສຸດ, ຮັບຟັງບົດລາຍງານໝາກຜົນ, ການຕິດຕາມກວດກາເລື່ອງແກ້ໄຂຂໍ້ສະເໜີແນະຂອງຜູ້ມີສິດເລືອກຕັ້ງ, ຮັບຟັງບົດລາຍງານຂອງລັດຖະບານກ່ຽວກັບວຽກງານປ້ອງກັນ, ຕ້ານການສໍ້ລາດບັງຫຼວງ, ການປະຕິບັດຄຳຕັດສິນຂອງສານ, ການປ້ອງກັນ, ສະກັດກັ້ນການລະເມີດກົດໝາຍ ແລະ ອາດຊະຍາກຳ…, ສະພາແຫ່ງຊາດຈະດຳເນີນການຊັກຖາມ ແລະ ຕອບຄຳຊັກຖາມຂອງ ສສຊ. ສະພາແຫ່ງຊາດກໍ່ສະຫງວນເວລາພິຈາລະນາແຜນນະໂຍບາຍລົງທຶນກໍ່ສ້າງສະໜາມບິນສາກົນລອງແທ່ງ.
ກ່າວຄຳເຫັນທີ່ພິທີໄຂ, ທ່ານນາຍົກລັດຖະມົນຕີ ຫງວຽນເຕີນຢູ້ງ ສະເໜີບົດລາຍງານກ່ຽວກັບສະພາບການເສດຖະກິດ - ສັງຄົມປີ 2014 ແລະ ໜ້າທີ່ປີ 2015, ທ່ານປະທານຄະນະກຳມະການສູນກາງແນວໂຮມປະເທດຊາດ ຫວຽດນາມ ຫງວຽນທ້ຽນເຍີນ ສະເໜີບົດລາຍງານລວບລວມຄຳເຫັນ, ຂໍ້ສະເໜີແນະຂອງຜູ້ມີສິດເລືອກຕັ້ງ. ຈາກນັ້ນ, ສະພາແຫ່ງຊາດຈະຮັບຟັງບົດລາຍງານ: ກວດກາສະພາບການເສດຖະກິດ - ສັງຄົມປີ 2014 ແລະ ໜ້າທີ່ປີ 2015, ບົດລາຍງານ ແລະ ບົດລາຍງານກວດກາກ່ຽວກັບວຽກງານປ້ອງກັນ, ຕ້ານການສໍ້ລາດບັງຫຼວງປີ 2014, ຮັບຟັງສະເໜີ ແລະ ບົດລາຍງານກວດກາກ່ຽວກັບແຜນຮ່າງປ່ຽນໃໝ່ລາຍການ, ປື້ມຕຳລາຮຽນລະບົບສາມັນສຶກສາ
ຕອນບ່າຍ, ສະພາແຫ່ງຊາດຮັບຟັງລາຍງານ ແລະ ບົດລາຍງານກວດກາກ່ຽວກັບໝາກຜົນຂອງການປະຕິບັດແຜນງົບປະມານແຫ່ງລັດປີ 2014, ແຜນຮ່າງງົບປະມານແຫ່ງລັດ ແລະ ວິທີການແບ່ງງົບປະມານສູນກາງປີ 2015. ຮັບຟັງໃບສະເໜີ, ລາຍງານກວດກາ ກ່ຽວກັບບັນດາຮ່າງກົດໝາຍປັບປຸງ, ເພີ່ມເຕີມບາງຂໍ້ມາດຕາຂອງກົດໝາຍວ່າດ້ວຍພາສີຈຳໜ່າຍພິເສດ, ກົດໝາຍວ່າດ້ວຍງົບປະມານແຫ່ງລັດ (ສະບັບປັບປຸງ), ກົດໝາຍວ່າດ້ວຍກວດສອບບັນຊີແຫ່ງລັດ (ສະບັບປັບປຸງ).