ໄຂງານຕະຫຼາດນັດການຄ້າຫວຽດນາມ-ລາວ2015
ມິ້ບິ່ງ, ນັກຂ່າວ VOV ປະຈຳລາວ -
(ໄຂງານຕະຫຼາດນັດການຄ້າ ຫວຽດນາມ-ລາວ 2015)
(vovworld) - ຕອນບ່າຍວັນທີ 02/07, ກະຊວງອຸດສາຫະກຳການຄ້າຫວຽດນາມ ໄດ້ສົມທົບກັບກະຊວງອຸດສາຫະກຳການຄ້າລາວ ຈັດງານຕະຫຼາດນັດການຄ້າຫວຽດນາມ - ລາວ, ຢູ່ສູນກອງປະຊຸມ ແລະ ວາງສະແດງສາກົນລາວ ທີ່ນະຄອນຫຼວງວຽງຈັນ, ເພື່ອແນໃສ່ໂຄສະນາເຄື່ອງໝາຍການຄ້າ, ຊຸຸກຍູ້ການສົ່ງອອກ ແລະ ເປີດກວ້າງເຄືອຂ່າຍຈຳໜ່າຍສິນຄ້າຫວຽດນາມ ເຂົ້າຕະຫຼາດລາວ ແລະ ພາກອີສານຂອງໄທ. ງານຕະຫຼາດນັດດຳເນີນໄປໃນລະຫວ່າງວັນທີ 02 – 06/07, ດ້ວຍການເຂົ້າຮ່ວມຂອງບັນດາວິສາຫະກິດຫວຽດນາມ ແລະ ລາວ, ໃນນັ້ນຫວຽດນາມ ມີວິສາຫະກິດ 100 ແຫ່ງເຂົ້າຮ່ວມ, ວາງສະແດງບັນດາຜະລິດຕະພັນຄື: ການຢາ ແລະ ເຄື່ອງອຸປະກອນການແພດ; ຈັກອຸດສາຫະກຳ, ກໍ່ສ້າງ ແລະ ວັດສະດຸກໍ່ສ້າງ; ຜະລິດຕະພັນກະເສດ, ເຄື່ອງປ່າຂອງດົງ ແລະ ສິນໃນນ້ຳ…
ກ່າວຄຳເຫັນທີ່ພິທີໄຂງານຕະຫຼາດນັດ, ທ່ານລັດຖະມົນຕີຊ່ວຍວ່າການກະຊວງອຸດສາຫະກຳການຄ້າຫວຽດນາມ ຫງວຽນເກີມຕູ ໃຫ້ຮູ້ວ່າ, ງານຕະຫຼາດນັດຈະສ້າງເງື່ອນໄຂໃຫ້ບັນດາວິສາຫະກິດຫວຽດນາມ ມີໂອກາດໂຄສະນາເຄື່ອງໝາຍການຄ້າ, ຊອກຫາຕະຫຼາດ ແລະ ຄວາມຕ້ອງການໃຊ້ສອຍ, ຜ່ານນັ້ນສ້າງເຄືອຂ່າຍແຈກຢ່າຍ ແລະ ຈຳໜ່າຍສິນຄ້າໄປຍັງຕະຫຼາດລາວ ແລະ ພາກອີສານຂອງໄທ.
“ງານຕະຫຼາດນັດປີນີ້ ໄດ້ຮັບການຈັດຕັ້ງດ້ວຍຈຸດປະສົງສ້າງເງື່ອນໄຂສະດວກໃຫ້ບັນດາອົງການຄຸ້ມຄອງຂອງ 2 ປະເທດພົບປະກັນ, ເພື່ອພ້ອມກັນແລກປ່ຽນ, ຊອກຮູ້ບັນຫາທີ່ຍັງຕິດຂັດໃນວິວັດການປະຕິບັດການພົວພັນແລກປ່ຽນສິນຄ້າ, ສ້າງເງື່ອນໄຂໃຫ້ບັນດາວິສາຫະກິດຊອກຮູ້, ພົບປະເຊິ່ງກັນ ແລະ ກັນ. ບັນດາງານຕະຫຼາດນັດຄືແນວນີ້, ມີຄວາມໝາຍສຳຄັນຍິ່ງ ສຳລັບການພົວພັນທາງການຄ້າລະຫວ່າງ 2 ຝ່າຍ. ໃນອະນາຄົດ, ອາດຈະຈັດຫຼາຍງານຕະຫຼາດນັດດ້ວຍຫົວຂໍ້ແຕກຕ່າງກັນ, ຢູ່ຫຼາຍແຂວງນະຄອນອື່ນໆອີກ.”
ມິ້ບິ່ງ, ນັກຂ່າວ VOV ປະຈຳລາວ