(vovworld) – ພິທີໄຂວາລະປຶກສາຫາລືຮ່ວມຂັ້ນສູງສະມັດຊາໃຫຍ່ ສະຫະປະຊາຊາດຊຸດທີ 69 ໄຂຂຶ້ນໃນຕອນເຊົ້າວັນທີ 24/9 ຕາມເວລາທ້ອງຖີ່ນ, ທີ່ສຳນັກງານຂອງ ສປຊ ຢູ່ນິວຢອກ, ປະເທດ ອາເມລິກາ. ເຂົ້າຮ່ວມພິທີໄຂມີທ່ານເລຂາທິການໃຫຍ່ ສປຊ Ban Ki – moon, ປະທານ ສປຊ ຊຸດທີ 69 ທ່ານ Sam Kahamba Kutesa, ພ້ອມກັບປະມຸກລັດ, ນາຍົກລັດຖະມົນຕີ 120 ທ່ານ ແລະ ລັດຖະມົນຕີຫຼາຍທ່ານເຊິ່ງແມ່ນຫົວໜ້າຄະນະຜູ້ແທນທີ່ມາຈາກ 193 ປະເທດສະມາຊິກ ສປຊ. ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ ຫວຽດນາມ ຟ້າມບິ່ງມິງ, ເຂົ້າຮ່ວມວາລະປະຊຸມ.
ກ່າວຄຳເຫັນທີ່ພິທີໄຂ, ທ່ານເລຂາທິການໃຫຍ່ ສປຊ Ban Ki – moon ທົບທວນຄືນ 1 ປີແຫ່ງການເຄື່ອນໄຫວຂອງສະມັດຊາໃຫຍ່ ສປຊ ຊຸດທີ 68 ນັບແຕ່ເດືອນ 9/2013 ດ້ວຍຂໍ້ສັງເກດວ່າ:
“ປີຜ່ານມາ, ແມ່ນປີຊົ່ວຮ້າຍສຳລັບບັນດາຫຼັກການຂອງກົດບັດ ສປຊ. ສິດທິມະນຸດ ແລະ ກົດໝາຍພວມຖືກບຸກໂຈມຕີ, ນັບແຕ່ບັນດາເຫດວາງລະເບີດຕະຫຼອດຮອດການເຂັ່ນຂ້າຕົວປະກັນ, ເລື່ອງຕັ້ງໃຈກໍ່ໄພອຶດຫິວໃຫ້ແກ່ປະຊາຊົນການບຸກໂຈມຕີບັນດາໂຮງໝໍ, ຮາກຖານ ແລະ ຂະບວນລົດກູ້ຊ່ວຍມະນຸດສະທຳຂອງ ສປຊ.”
ໃນສັບປະດາດຳເນີນວາລະປຶກສາຫາລື, ຫົວໜ້າຂອງທຸກໆຄະນະເຂົ້າຮ່ວມວາລະປຶກສາຫາລືຈະມີບົດກ່າວປາໄສສຳຄັນເຕື້ອງເຖິງບັນດາບັນຫາທີ່ຕົນສົນໃຈ, ກໍ່ຄືທັດສະນະຂອງຕົນສຳລັບບັນດາບັນຫາຮີບດ່ວນໃນຊີວິດສາກົນ.