ໄຂເວທີປາໄສການທ່ອງທ່ຽວຫວຽດນາມແລະສ.ເກົາຫຼີ
ທ່ານລັດຖະມົນຕີກະຊວງກິລາ, ວັດທະນະທຳ ແລະ ທ່ອງທ່ຽວ ຮ່ວາງແອງຕ໋ວນ ກ່າວຄຳເຫັນໄຂເວທີປາໄສ
(ພາບ: Cường-Duy/Vietnam+)
(vovworld) – ເວທີປາໄສໄຂການທ່ອງທ່ຽວຫວຽດນາມ ແລະ ສ. ເກົາຫຼີ ໄຂຂຶ້ນໃນວັນທີ 17/9 ເພື່ອແນໃສ່ແນະນຳບັນດາຄວາມສາມາດບົ່ມຊ້ອນ, ຜະລິດຕະພັນການທ່ອງທ່ຽວຂອງ ຫວຽດນາມ ກັບປະຊາຊົນ ສ. ເກົາຫຼີ ພ້ອມທັງສ້າງເງື່ອນໄຂໃຫ້ແກ່ວິສາຫະກິດທ່ອງທ່ຽວ 2 ປະເທດແລກປ່ຽນ, ເພີ່ມທະວີການຮ່ວມມືດ້ານວັດທະນະທຳ, ທ່ອງທ່ຽວ. ນີ້ແມ່ນການເຄື່ອນໄຫວໃນຂອບເຂດງານບຸນວັດທະນະທຳ, ທ່ອງທ່ຽວ ຫວຽດນາມ ປີ 2014 ໂດຍກົມໃຫຍ່ທ່ອງທ່ຽວ ຫວຽດນາມ ຈັດຕັ້ງຢູ່ນະຄອນໃຫຍ່ຂອງ ສ. ເກົາຫຼີ ແມ່ນ Seoul ແລະ Gwangchu ແຕ່ວັນທີ 17 – 22/9. ທ່ານລັດຖະມົນຕີກະຊວງກິລາ, ວັດທະນະທຳ ແລະ ທ່ອງທ່ຽວ ຮ່ວາງແອງຕ໋ວນ ແລະ ທ່ານອັກຄະລັດຖະທູດ ຫວຽດນາມ ປະຈຳ ສ. ເກົາຫຼີ ຟ້າມຮືວຈີ໋ ເປັນປະທານຮ່ວມເວທີປາໄສ. ກ່າວຄຳເຫັນທີ່ເວທີປາໄສ, ທ່ານອັກຄະລັດຖະທູດ ຟ້າມຮືວຈີ໋ ຖືວ່າ: 2 ປະເທດມີຄວາມສາມາດບົ່ມຊ້ອນອັນໃຫຍ່ຫຼວງເພື່ອຊຸກຍູ້ການພົວພັນແລກປ່ຽນວັດທະນະທຳ, ການທ່ອງທ່ຽວເວົ້າລວມ ແລະ ການທ່ອງທ່ຽວ ກອບ ເວົ້າສະເພາະ. ທ່ານອັກຄະລັດຖະທູດ ສະແດງຄວາມເຊື່ອໝັ້ນວ່າ ຖ້າຫາກມີການຮ່ວມມືຢ່າງແໜ້ນແຟ້ນລະຫວ່າງບັນດາບໍລິສັດທ່ອງທ່ຽວ, ບັນດາບໍລິສັດການບິນ, ໂຮມແຮມ, ເດີນກອບ, ວິສາຫະກິດ ທ່ອງທ່ຽວ 2 ປະເທດຈະມີບັນດາລາຍການທ່ອງທ່ຽວ ກອບ ລາຄາຖືກ, ມີຄຸນນະພາບ ແລະ ດຶງດູດຜູ້ຫຼີ້ນກອບ ຂອງ ສ. ເກົາຫຼີ ໄປຍັງ ຫວຽດນາມ. ຄຽງຄູ່ກັນນັ້ນ, ທ່ານອັກຄະລັດຖະທູດ ຟ້າມຮືວຈີ໋ ກໍ່ສະເໜີໃຫ້ບັນດາອົງການທີ່ກ່ຽວຂ້ອງຂອງ ສ. ເກົາຫຼີ ຈະເຮັດໃຫ້ລະບຽບການເຂົ້າເມືອງໃຫ້ພົນລະເມືອງ ຫວຽດນາມ ເປັນງ່າຍດາຍ, ຈາກນັ້ນສົ່ງເສີມ ແລະ ສ້າງເງື່ອນໄຂໃຫ້ແກ່ແຂກທ່ອງທ່ຽວ ຢ້ຽມຢາມ ສ. ເກົາຫຼີ.